Mei he YA Fakauiké
Naʻá Ma Tafoki kia Kalaisi ke maʻu ʻa e Melinó ʻi He Nofo ʻEma Ongo Pēpeé ʻi he NICU
ʻOku nofo ʻa e tokotaha naʻá ne faʻú ʻi ʻAitahō, USA.
Naʻe akoʻi kimaua ʻe he konga fakamanavahē taha ʻo ʻema moʻuí ʻa e mālohi fakalongolongo ʻo e nonga ʻo fakafou ʻia Sīsū Kalaisí.
Laʻitaá ʻi he angalelei ʻa e tokotaha faʻutohí
Ko e meʻaʻofa lelei taha kuó u maʻu mo hoku uaifi ko Haití ko ʻema foki mo ʻema ongo māhanga tangatá ki ʻapi mei he ʻiuniti tokangaekina makehe ʻo e kau pēpeé (NICU).
Naʻá ku fetaulaki mo Haiti lolotonga ʻema ako ʻi he ʻunivēsití, pea ʻikai fuoloa mei heʻema mali ʻi he Temipale Rexburg Idaho, ne ma ʻiloʻi ʻoku feitama ʻa Haiti ʻi ha ongo māhanga. Naʻá ma fiefia lahi—ka ʻi he hili ha ngaahi māhina mei ai, naʻe kehe ʻa e ngaahi meʻá. Naʻe fāʻeleʻi ʻema ongo māhangá ʻi heʻena uike 27 pē, naʻá na taki pāuni pē ʻe 2 nai. Naʻe ʻave fakavave kinaua ki he NICU, ʻa ia naʻá na nofo ai ʻi he māhina ʻe fā naʻe hokó ʻo feifeingaʻi ke na moʻui.
Falala ʻi he Loto-Mamahí
Naʻe kau ʻa e ngaahi ʻaho ko iá ʻi he fakamamahi taha kuó ma aʻusiá. Ne ma maʻu ha ngaahi tā telefoni taʻetūkua mei he kau toketaá—ʻo ʻomi ha ongoongo ʻo ha ngaahi faingataʻa lahi ange pe ko ha ngaahi tafa fakafaitoʻo lahi ange. Naʻe fakatupu lōmekina. Naʻe lahi ha ngaahi pō taʻemamohe ʻo ha ngaahi lotu, loʻimataʻia mo e taʻepauʻia moʻoni.
ʻI he lotolotonga ʻo e ngaahi felekeu kotoa ko ʻení, naʻá ma fakahoko ha fili ʻiloʻilo pau ke falala ki he Tamai Hēvaní. Naʻe ʻikai faingofua. Naʻe ʻikai te ma ʻilo pe ko e hā ʻe hoko ʻi he kahaʻú, ka naʻá ma falala ki he tui ne ma fakatupulaki ʻi heʻema moʻuí. Ko e potufolofola ʻe taha naʻá ne ʻomi ha mālohi lahí ko e Hilamani 5:12, ʻa ia ʻoku pehē ke langa ho fakavaʻé ʻi he “maka ʻo hotau huhuʻí, ʻa ia ko Kalaisi.”
Naʻe tokoni ʻa e veesi ko iá ke fakamanatu mai naʻe ʻikai ke ma tuenoa. Kuo foua ʻe Kalaisi ʻa e hala ʻo e mamahí mo e taʻepauʻiá. Naʻe mahino kiate Ia ʻa e ongo naʻá ma maʻú. ʻI heʻema fokotuʻu ia ʻi he uho ʻo ʻema moʻuí, naʻe kamata ke ma fakatokangaʻi ha fakamanatu fakalongolongo naʻe ʻiate kimaua ʻa e ʻOtuá.
Pīkitai ki he ʻAmanaki Leleí
Naʻe ʻomi ʻe he ʻalu ki he temipalé mo e tangutu ʻi he loki silesitialé ha ngaahi mōmeniti ʻo e nongá naʻá ma mātuʻaki fiemaʻu moʻoni. Naʻe ʻikai te ma ʻilo pe ko e hā ʻe hokó, ka naʻá ma ongoʻi ʻoku fakanonga kimaua. ʻOku ʻikai ʻuhinga ia ʻe hoko ʻa e meʻa kotoa ʻi he founga ne ma ʻamanaki ki aí, ka naʻe ʻuhinga ia naʻe ʻikai ke ma tuenoa.
Ko e veesi ʻe taha naʻe ongo ʻaupito kiate au lolotonga ʻa e taimi ko ʻení ko e Tokāteline mo e Ngaahi Fuakava 121:7: “Ke ʻi ho laumālié ʻa e melino; ʻe kiʻi fuofuoloa siʻi pē ʻa hoʻo faingataʻaʻiá pea mo hoʻo ngaahi mamahí.” Naʻe liliu ʻe he veesi ko iá ʻeku fakakaukaú. Naʻe ongo mafatukituki homa ngaahi faingataʻaʻiá ʻi he taimi ko iá, ka ʻi he tuʻunga taʻengatá, ko ha kiʻi taimi siʻi pē.
Naʻe tokoni ʻa e tokanga taha kia Sīsū Kalaisí ke ma vakai ki he kuohilí ʻo fakalaka atu ʻi he mamahí pea kamata ke vakai ki he ngaahi tāpuakí—ko e fakaʻau ke mālohi ange ʻema ongo māhangá, siʻisiʻi ange ʻa e ngaahi tā telefoni mei he kau toketaá, pea mo e lahi ʻo e ʻofa mo e ngaahi lotu mei he fāmilí mo e ngaahi kaungāmeʻá.
Ko Hono Tauhi ha Fakakaukau Taʻengatá
Naʻe faifai pē peá ma foki ki ʻapi mo homa ongo fohá ʻi he ʻaho Kilisimasí. ʻI heʻeku toe vakai atu ki aí, ʻoku ou houngaʻia moʻoni. ʻOku tupulaki homa ongo fohá, pea neongo he ʻikai ke u loto ke hoko e ngaahi māhina ko iá ki ha toe taha angé, he ʻikai ke u liliu e ngaahi lēsoni naʻá ma ako aí. Naʻe mahino kiate kimaua ʻa e ʻuhinga ke falala ki he ʻOtuá pea pikitai ki he ʻamanaki lelei ʻia Sīsū Kalaisí.
ʻOku ʻikai iku tatau ʻa e talanoa ʻa e tokotaha kotoa pē. Ka naʻa mo e kehe ʻa e olá, ʻoku ʻomi ʻe Sīsū Kalaisi ha nonga, fiemālie mo ha ivi ke te ikuna. Kapau ʻokú ke ʻi he lotolotonga ʻo ha meʻa faingataʻa ʻi he taimí ni, kātaki ʻo manatuʻi ʻoku ʻikai ko e ngataʻangá ʻa e moʻui ko ʻení. ʻOku ʻofa ʻa e Tamai Hēvaní ʻiate koe. ʻOku ʻi ai Haʻane palani maʻau. Pea ʻi Heʻene tokoní, naʻa mo e ngaahi taimi faingataʻa tahá ʻe lava ke hoko ia ko ha meʻa fungani.
Naʻe pehē ʻe ʻEletā Kēleti W. Kongo ʻo e Kau ʻAposetolo ʻe Toko Hongofulu Mā Uá, “ʻI he taimi ʻoku tau falala ai ki he ʻOtuá mo ʻEne ʻofa kiate kitautolú, ʻe malava ke fengāueʻaki fakataha ʻetau ngaahi loto-mamahi lahi tahá koeʻuhí ko ʻetau leleí, ʻi he ngataʻangá.” Kuó u mātā ʻa e foʻi moʻoni ko iá ʻi heʻeku moʻuí.
ʻI he taimi ʻoku faingataʻa ai ʻa e moʻuí, ʻi he taimi ʻoku taʻepau ai ʻa e hala ʻi muʻá—hanga kia Kalaisi. Tuku ke Ne tokoni ke fuesia ʻetau ngaahi mafasiá. Te tau lava ʻo hokohoko atu ʻiate Ia. Te tau lava ʻo maʻu ʻa e ʻamanaki leleí ʻiate Ia. Pea ʻi ha fakakaukau ʻoku taʻengatá, te tau lava ʻo falala, neongo ha meʻa ʻoku tau foua he taimí ni ʻoku ʻikai ko e ngataʻanga ia ʻo e talanoá.