Հիսուս Քրիստոսն ուրախություն է բերում

Ձեր կյանքը նախատեսված է երջանկություն և ուրախություն ունենալու համար։ Դա է ձեր կյանքի նպատակը։ Դա Երկնային Հոր երջանկության ծրագրի նպատակն է։ Սա չի նշանակում, որ դուք երբեք տխուր չեք լինի կամ դժվար ժամանակներ չեք ունենա։ Բայց դա նշանակում է, որ Փրկիչը կարող է օգնել ձեզ հաղթահարել դժվար ժամանակները և ուրախություն գտնել։

Ուրախությունը չի գալիս ձեր հանգամանքներից, այն գալիս է Հիսուս Քրիստոսին հետևելուց։ Դուք կարող եք վատ օր, վատ շաբաթ կամ վատ տարի ունենալ։ Բայց ուրախությունը ձեր կյանքում տխրության բացակայությունը չէ, այլ Քրիստոսի ներկայությունն է ձեր կյանքում։

Փրկչի ուրախությունն ավելի մեծ է և ավելի տևական, քան որևէ այլ բան։ Սատանան կգայթակղի ձեզ զվարճություն և բավարարվածություն փնտրել եսասիրական ձևերով կամ աշխարհիկ հաճույքներից։ Հիսուս Քրիստոսին և Նրա պատվիրաններին հակասող որևէ բան չի կարող ձեզ իրական, տևական ուրախություն և երջանկություն բերել։ Հիշեք, որ այս երկրի բաները ժամանակավոր են։ Հիսուս Քրիստոսի ավետարանն առաջարկում է ուրախություն և երջանկություն, որոնք խոր, սուրբ և հավիտենական են։

Ընտրեք ուրախությունը։ Թեև ճիշտ է, որ այս աշխարհում կան տխրություն և դժվարություններ, Երկնային Հայրը աշխարհը լցրել է նաև բազմաթիվ գեղեցիկ, առողջարար բաներով։ Փնտրեք դրանք։ Փորձեք ամեն օր նկատել ուրախանալու պատճառներ, գուցե նույնիսկ գրի առնեք դրանք։ Սրանք ձեր սիրող Երկնային Հոր պարգևներն են։

Ուրախություն և երջանկություն բերեք այլոց։ Հիսուս Քրիստոսը ուրախության լիություն գտավ մեզ ուրախություն պարգևելով։ Դուք կարող եք հետևել Նրա օրինակին՝ գտնելով ուրախություն և երջանկություն ուրիշներին ծառայելով։ Օգնեք ինչ-որ մեկին զգալ սիրված։ Անկեղծ հաճոյախոսություն արեք: Խրախուսեք դժվարության մեջ գտնվող մեկին։ Եթե երբևէ զգաք, որ ձեր կյանքում ավելի շատ ուրախության կարիք ունեք, փորձեք ուրախություն պարգևել մեկ ուրիշին։

Զվարթ եղեք Տիրոջը երկրպագելիս։ Երբ եկեղեցի եք գնում, կենտրոնացեք այն ուրախության վրա, որը Հիսուս Քրիստոսը տալիս է ձեզ, և գովաբանեք Նրան դրա համար։ Ձեր ներդրումն ունեցեք եկեղեցու ձեր ժողովներում ուրախ ոգի բերելու գործում։ Սուրբ երաժշտությունը դարձրեք ձեր երկրպագության մասը՝ տանը և եկեղեցում։

Դուք կարող եք ուրախություն զգալ նույնիսկ կյանքի դժվարությունների ժամանակ։ Դուք կարող եք զարմանալ, թե ինչպես է դա հնարավոր, բայց դա ճիշտ է։ Հիսուս Քրիստոսի, Նրա բուժիչ զորության և Նրա հավերժական խոստումների նկատմամբ ձեր հավատքը կարող է ձեզ մշտական ուրախություն պարգևել։ Նրա ուրախությունը ստվերում է տխրությունը և բերում խաղաղություն, որը գերազանցում է ամեն հասկացողություն։

Աստծո սելեստիալ արքայությունում ձեզ լիակատար ուրախություն է սպասում։ Հիսուս Քրիստոսը հաղթահարեց այն ամենը, ինչը կարող էր խանգարել ձեզ ստանալ հավերժական ուրախություն։ Երբ դուք վստահեք և հետևեք Նրան, այս ուրախությունը ձերը կլինի։