Ճշմարտությունը կազատի ձեզ

Երկնային Հայրը ցանկանում է, որ Իր դուստրերն ու որդիները միշտ սովորեն: Դուք ունեք նյութական և հոգևոր պատճառներ՝ ուսման ձգտելու և այն սիրելու համար: Կրթություն ստանում ենք ոչ միայն գումար վաստակելու համար: Այն ձեր հավերժական նպատակի մի մասն է՝ ավելի նմանվելու Երկնային Հորը:

Շիտակությամբ ապրելը նշանակում է, որ դուք սիրում եք այն, ինչ ճիշտ է Աստծո աչքում՝ ավելի շատ, քան սիրում եք անձնական հարմարավետությունը, հանրաճանաչությունը կամ հարմարությունները։ Դա նշանակում է անել այն, ինչ ճիշտ է, պարզապես այն պատճառով, որ դա ճիշտ է:

Դուք թանկարժեք մի բան ունեք, որով կարող եք կիսվել։ Հիսուս Քրիստոսի ավետարանը պարունակում է կյանքի հարցերի պատասխանները: Այն դեպի խաղաղություն և երջանկություն տանող ուղին է: Դուք գուցե ամեն ինչ չիմանաք, բայց բավականաչափ գիտեք՝ սիրելու ձեր մերձավորներին, կիսվելու ճշմարիտ սկզբունքներով նրանց հետ և հրավիրելու նրանց ավելին իմանալու։

Միշտ սովորեք: Փնտրեք հնարավորություններ՝ ընդլայնելու ձեր միտքն ու ձեր հմտությունները: Այդ հնարավորությունները կարող են ներառել միջնակարգ կրթություն դպրոցում կամ մասնագիտական ուսուցում, ինչպես նաև ոչ պաշտոնական ուսուցում այն աղբյուրներից, որոնց վստահում եք: Ներգրավեք Տիրոջը ձեր ջանքերում և Նա կառաջնորդի ձեզ:

Սովորեք հոգևոր ճշմարտություններ։ Երբ սովորեք ձեզ շրջապատող աշխարհի մասին, սովորեք նաև Փրկչի մասին, որը ստեղծել է աշխարհը: Ուսումնասիրեք Նրա կյանքն ու ուսմունքները: Սեմինարիան, ինստիտուտը և ավետարանի անհատական ուսումնասիրությունը դարձրեք ձեր ողջ կյանքի ուսումնառության մասը: Այն կարող է պատրաստել ձեզ ծառայելու միսիայում և կիսվելու ավետարանով ձեր ողջ կյանքի ընթացքում։

Ապրեք ազնվությամբ։ Մի՛ գողացեք, մի՛ ստեք, մի՛ խաբեք որևէ կերպ՝ դպրոցում, աշխատանքի վայրում, առցանց, ամենուրեք։ Եղեք Հիսուս Քրիստոսի նույն հավատարիմ հետևորդը հրապարակայնորեն և անձնական կյանքում:

Կրթությունը մեծացնում է Տիրոջը ծառայելու ձեր կարողությունը, այդ թվում՝ որպես միսիոներ։ Այն ձեզ ուժ է տալիս՝ օրհնելու ուրիշներին, հատկապես ձեր ընտանիքին: Որքան շատ եք սովորում, այնքան ավելի շատ կարող եք օգնել կառուցել Աստծո արքայությունը և ի բարին ազդել աշխարհի վրա:

Ազնվությունը բերում է խաղաղություն և ինքնահարգանք: Երբ ձեր խոսքերն ու արարքները համահունչ են ճշմարտության հետ, դուք ցույց եք տալիս, որ ուրիշ մարդիկ և Տերը կարող են վստահել ձեզ:

Երբ դուք պաշտպանում եք Հիսուս Քրիստոսի ուսմունքները, Նա սատարում է ձեզ: Հիսուս Քրիստոսը ձեր ուժն է: Ուրիշները կարող են չհամաձայնվել ձեր համոզմունքների հետ, բայց ձեր համարձակությունն ու անկեղծությունը կնկատվի։ Անկախ նրանից՝ ուրիշները կհետևեն ձեր օրինակին, թե ոչ, ձեր վկայությունը, վստահությունը և հավատքն առ Քրիստոս կաճի: