Սիրեք Աստծուն, սիրեք ձեր մերձավորին

Աստված սիրում է ձեզ: Նա ձեր Հայրն է: Նրա կատարյալ սերը կարող է ոգեշնչել, որ դուք սիրեք Նրան: Երբ ձեր սերը Երկնային Հոր հանդեպ ամենակարևոր ազդեցությունն է ձեր կյանքում, շատ որոշումներ ավելի հեշտ են դառնում:

Բոլոր պատվիրաններից երկու մեծագույններն են՝ սիրել Աստծուն և սիրել մերձավորին։ Իսկ ո՞վ է քո մերձավորը։ Ամեն ո՛ք: Սուրբ գրություններում և մարգարեների կողմից ուսուցանված մնացած ամեն ինչ կապված է այս երկու պատվիրանների հետ:

Բոլոր մարդիկ ձեր եղբայրներն ու քույրերն են, ներառյալ, իհարկե, մարդիկ, որոնք տարբերվում են ձեզանից կամ համաձայն չեն ձեզ հետ: Երկնային Հայրը ցանկանում է, որ Իր զավակները սիրեն միմյանց: Երբ դուք ծառայում եք Նրա զավակներին, դուք ծառայում եք Նրան:

Աստծո հանդեպ սեր ցույց տվեք՝ պահելով Նրա պատվիրանները: Օրինակ՝ Հանգստության օրը սուրբ պահելով, այդ թվում՝ հավատարմորեն պատրաստվելով և ստանալով հաղորդությունը, դուք ցույց եք տալիս Աստծուն, որ պատրաստ եք շաբաթվա մեկ օրը նվիրաբերել Նրան: Երբ ծոմ եք պահում և վճարում տասանորդն ու նվիրաբերությունները, դուք ցույց եք տալիս Աստծուն, որ Նրա աշխատանքը ձեզ համար ավելի կարևոր է, քան նյութական բաները: Երբ դուք օգտագործում եք Աստծո և Քրիստոսի անունները ակնածանքով, և երբեք չեք օգտագործում անտեղի կամ անկամտածված, դուք ցույց եք տալիս, որ երախտապարտ եք այն ամենի համար, ինչ Նրանք արել են ձեզ համար:

Յուրաքանչյուրին վերաբերվեք՝ որպես Աստծո զավակի: Որպես Հիսուս Քրիստոսի աշակերտ, դուք կարող եք օրինակ ծառայել՝ բոլոր ռասաների, կրոնների և այլ խմբերի մարդկանց սիրով և հարգանքով վերաբերվելով, հատկապես նրանց, ովքեր երբեմն վիրավորական խոսքերի և գործողությունների զոհ են դառնում։ Օգնեք նրանց, ովքեր կարող են իրենց միայնակ, մեկուսացված կամ անօգնական զգալ։ Օգնեք նրանց զգալ Երկնային Հոր սերը ձեր միջոցով: Կիսվեք նրանց հետ Նրա տված օրհնություններով և հրավիրեք նրանց հետևել Հիսուս Քրիստոսին։

Համոզվեք, որ ձեր լեզուն արտացոլում է ձեր սերը Աստծո և ուրիշների հանդեպ՝ անկախ նրանից, թե դուք շփվում եք անձամբ, թե վիրտուալ։ Ասեք այնպիսի բաներ, որոնք ոգևորում են, և մի ասեք որևէ բան, որը կարող է պառակտող, վնասակար կամ վիրավորական լինել, նույնիսկ՝ կատակով: Ձեր խոսքերը կարող են հզոր լինել: Թող ձեր խոսքերը լավ ազդեցություն ունենան ուրիշների վրա:

Սեր ցուցաբերեք ձեր ընտանիքի նկատմամբ։ Աստծո բոլոր զավակներին սիրելը սկսվում է տնից: Կատարեք ձեր բաժինը՝ ձեր տունը դարձնելով մի վայր, որտեղ բոլորը կարող են զգալ Փրկչի սերը:

Աստծո հետ ձեր հարաբերությունները կամրապնդվեն, երբ դուք արտահայտեք ձեր սերը՝ հնազանդվելով Նրա պատվիրաններին և պահելով Նրա հետ ունեցած ձեր ուխտերը:

Ուրիշների հետ ձեր հարաբերությունները կամրապնդվեն, երբ դուք արտահայտեք ձեր սերը քրիստոսանման ծառայության միջոցով: Դուք ուրախություն կգտնեք՝ աշխարհն ավելի սիրող վայր դարձնելով: