Դուք օրհնված եք քահանայության բանալիներով և իշխանությամբ

Քահանայության բոլոր բանալիներն ու իշխանությունը գալիս են Հիսուս Քրիստոսի միջոցով։ Քահանայության յուրաքանչյուր կրող կարող է իր իշխանությունը հետագծել մինչև Նա։ Փրկիչն է որոշում, թե ով է ստանում այս իշխանությունը և ով է ստանում քահանայության բանալիները։ Մենք վստահում ենք Նրա կատարյալ գիտելիքին։

Հիսուս Քրիստոսը վերականգնել է Իր քահանայությունը մեր օրերում։ Նա ուղղորդում է քահանայության օգտագործումը։ Ադամը, Մովսեսը, Պետրոսը և պատմության ընթացքում շատ այլ մարգարեներ ստացան քահանայության բանալիները։ Մեր օրերում Ջոզեֆ Սմիթը քահանայության բանալիները ստացավ Հովհաննես Մկրտչից, Պետրոսից, Մովսեսից, Եղիասից, Եղիայից և ուրիշներից։ Առաջին Նախագահության և Տասներկու Առաքյալների Քվորումի անդամներն այսօր կրում են երկրի վրա քահանայության բոլոր բանալիները։ Տեղական քահանայության ղեկավարները և քվորումի նախագահները նույնպես կրում են քահանայության բանալիները իրենց կոչումների համար։ Քահանայության բանալիները կառավարում են Աստծո գործը։ Նրանք իշխանություն և լիազորություն են տալիս տղամարդկանց և կանանց՝ օգնելու այդ գործում։

Քահանայության իշխանությունն օրհնում է Աստծո բոլոր զավակներին։ Քանի որ քահանայությունը վերականգնվել է, դուք կարող եք ստանալ արարողություններ և Աստծո հետ ուխտեր կապել։ Դուք կարող եք գործել Աստծո անունով, երբ ստանում եք հանձնարարություն կամ կոչում իշխանություն ունեցող մեկից։

Ընդունեք Եկեղեցու կոչումները և հավատարմորեն ծառայեք։ Երբ դուք ստանում եք Եկեղեցու կոչում, դուք Աստծուց լիազորություն եք ստանում ծառայելու այդ դերում։ Դուք կարող եք նաև Աստծուց առաջնորդություն ստանալ ձեր ծառայության համար։ Ծառայելով՝ դուք ներկայացնում եք Հիսուս Քրիստոսին։ Նրան ձեր լավագույնը տվեք։

Սատարեք նրանց, ում Աստված կանչել է ծառայելու։ Սատարելը նշանակում է ավելին, քան պարզապես ձեռք բարձրացնելը, երբ Եկեղեցու ժողովում անուն է կարդացվում։ Դա նշանակում է աջակցել և օգնել։ Փնտրեք եղանակներ՝ ցույց տալու, որ դուք աջակցում եք այն մարդկանց, որոնց Հիսուս Քրիստոսը կանչել է ծառայելու Իր Եկեղեցում։

Կատարեք հանձնարարություններ ձեր Եկեղեցու ղեկավարների, այդ թվում՝ ձեր քվորումի կամ դասարանի նախագահության կողմից տրված։ Նրանք Աստծուց իշխանություն ունեն, որը նրանք ձեզ են արտոնում այդ առաջադրանքի համար։ Ձեզ կարող է հանձնարարվել ծառայել ինչ-որ մեկին, ողջունել մարդկանց, երբ նրանք ժամանում են հաղորդության ժողովին, կամ օգնել որևէ միջոցառման հետ կապված։ Անկախ առաջադրանքից, այն համարեք Հիսուս Քրիստոսի աշակերտը լինելու և Աստծո զավակներին ծառայելու հնարավորություն։

Դուք կարող եք վստահ լինել, որ ձեր ստացած արարողությունները լիազորված են Հիսուս Քրիստոսի կողմից։ Սա այն հիմնական բաներից մեկն է, որը Հիսուս Քրիստոսի Եկեղեցին դարձնում է եզակի։ Քահանայության արարողություններում է բացահայտվում Աստծո զորությունը։

Դուք կդառնաք գործիք Տիրոջ ձեռքերում։ Երբ դուք ծառայեք Տիրոջը Իր իշխանությամբ և Իր ծառաների ղեկավարությամբ, ովքեր կրում են քահանայության բանալիները, Նա կօգնի ձեզ իմանալ, թե ինչպես ծառայել ուրիշներին Իր գործում։ Հիսուս Քրիստոսը ձեր ուժն է: Ձեր ծառայությունը կօգնի ձեզ ավելի մոտենալ Նրան և ուրախություն կպարգևի ձեզ։