Աստծո ծրագիրը ձեզ համար է

Երկնային Հայրը ծրագրի հեղինակն է։ Նա ձեր հոգու Հայրն է, և Նա սիրում է ձեզ։ Նա ցանկանում է ձեզ տալ Իր ամենամեծ օրհնությունը՝ հավիտենական կյանք Իր հետ։ Այլ կերպ ասած, Նա ցանկանում է, որ դուք ավելի նմանվեք Իրեն և ապրեք այն ուրախ, փառահեղ կյանքը, որով Նա է ապրում։ Նա ամենազոր է և գիտի ամեն ինչ։ Դուք կարող եք վստահել Նրան, նույնիսկ երբ կյանքը դժվար է։

Հիսուս Քրիստոսը հնարավոր է դարձնում այդ ծրագիրը։ Աշխարհի ստեղծումից առաջ Երկնային Հայրը Նրան ընտրեց որպես ձեր Փրկիչ։ Հիսուս Քրիստոսը միակն է, ով կարող է ձեզ վերադարձնել ձեր Երկնային Հոր մոտ։ Ահա թե ինչու մենք ընտրում ենք հետևել Նրան։ Ամեն ինչ կախված է այդ ընտրությունից։

Ամուսնությունն ու ընտանիքը կարևոր են Աստծո ծրագրում։ Դուք Աստծո ընտանիքի մասն եք կազմում, և Նրա բոլոր հոգևոր զավակները երկիր են գալիս մոր և հոր միջոցով։ Աստված ցանկանում է, որ Իր դուստրերն ու որդիները միասին առաջ ընթանան դեպի հավերժական կատարելություն։ Տղամարդիկ և կանայք հավասարապես նպաստում են սիրող, միասնական ամուսնությանը։ Ընտանեկան կյանքը երկրի վրա՝ նույնիսկ իր բոլոր թերություններով հանդերձ, կարող է մեծ ուրախություն բերել։ Այն նախատեսված է ձեզ օգնել Աստծո հետ հավիտենական կյանքին նախապատրաստելու համար։

Պահպանեք հավերժական հեռանկար Երբ դուք բախվում եք գայթակղությունների, փորձությունների, հիասթափությունների կամ դժվար ընտրությունների, հիշեցրեք ինքներդ ձեզ Աստծո ծրագրի մասին։ Տեսեք, թե ինչպես Նրա ծրագրի մասին ձեր իմացած հավերժական ճշմարտությունները կարող են օգնել ձեզ այլ կերպ նայել ձեր մարտահրավերներին։

Փնտրեք Աստծո ձեռքը ձեր կյանքում։ Ուշադրություն դարձրեք, թե ինչպես է Աստված օրհնում ձեզ։ Դա կարող է լինել ինչ-որ մեկի բարի արարք, խաղաղության մի պահ կամ աղոթքի պատասխան։

Ընտրեք հետևել Աստծո ծրագրին։ Իմացեք, թե ինչ է ձեր Երկնային Հայրը ցանկանում, որ անեք։ Փնտրեք Նրա առաջնորդությունը, երբ ուսումնասիրում եք սուրբ գրությունները, ապրող մարգարեների խոսքերը, ընտանիքի հռչակագիրը և ձեր հայրապետական օրհնությունը: Սա կօգնի ձեզ պատրաստվել ծառայելու Տիրոջը՝ որպես միսիոներ և ձեր ողջ կյանքի ընթացքում։ Տիրոջը ծառայելը, հավերժական ամուսնությունը և երեխաների դաստիարակությունը դարձրեք բարձր առաջնահերթություն։ Կատարեք ձեր ներդրումը երջանիկ ընտանիք ունենալու գործում հիմա՝ հետևելով Հիսուս Քրիստոսի ուսմունքներին։

Դուք կարող եք դիմակայել կյանքի փորձություններին քաջությամբ և ունենալով հույս Քրիստոսում։ Քանի որ դուք գիտեք Աստծո հավերժական ծրագրի մասին, դուք ունեք արժեքավոր գործիք, որը կարող է օգնել ձեզ դժվար ժամանակներում։ Դուք գիտեք, որ կյանքում շատ ավելին կա, քան այն, ինչ տեղի է ունենում ծննդյան և մահվան միջև։ Դուք գիտեք, թե իրականում ով եք, որն է ձեր նպատակը և ով կարող եք դառնալ Փրկչի օգնությամբ։ Հիսուս Քրիստոսը ձեր ուժն է:

Դուք կարող եք ստանալ հավերժական կյանք՝ հետևելով Հիսուս Քրիստոսին։ Նա ձեզ զորություն կտա ավելի նմանվելու Իրեն, վերադառնալու ձեր երկնային ծնողների մոտ և հավիտյան ապրելու ուրախության մեջ ձեր սիրելիների հետ։ Վստահեք Հիսուս Քրիստոսին։