Քայլեք Աստծո լույսով

Դուք կարող եք Սուրբ Հոգին ունենալ որպես մշտական ուղեկից։ Երբ դուք հաստատվեցիք որպես Եկեղեցու անդամ, ձեզ հրավիրեցին «ստանալ Սուրբ Հոգին»։ Հոգին որպես ձեր մշտական ուղեկից ունենալու հնարավորությունը Աստծուց ձեզ տրված մեծագույն պարգևներից մեկն է։

Լավ ընտրություն կատարելը բարելավում է Հոգին զգալու ձեր կարողությունը: Այս աշխարհում շատ լավ և օգտակար բաներ կան: Ճիշտ այնպես, ինչպես ձեր մարմնի վրա ազդում է այն, ինչ դուք ուտում և խմում եք, ձեր միտքն ու հոգին կրում են այն ամենի խոր ազդեցությունը, ինչ դուք կարդում եք, դիտում և լսում եք:

Ամեն օր ժամանակ հատկացրեք Տիրոջը: Սովորեք Նրանից։ Միշտ հիշեք Նրան։ Աղոթեք ձեր Երկնային Հորը: Ուսումնասիրեք սուրբ գրությունները և կենդանի մարգարեների խոսքերը: Ապա ձգտեք ապրել ձեր սովորածով:

Փնտրեք այն, ինչը քաջալերում է, ոգեշնչում և հրավիրում է Հոգուն: Երբ դուք ընտրություն եք կատարում այն մասին, թե ինչ դիտել, կարդալ, լսել կամ ինչին մասնակցել, մտածեք, թե ինչ եք զգում դրանից հետո: Արդյո՞ք դա լավ մտքեր է առաջացնում: Հեռու մնացեք ամեն ինչից, որը ծաղրում է սրբազան բաները կամ անբարոյական է։ Մի մասնակցեք որևէ բանի, որը թուլացնում է ձեր դատողությունը կամ զգայունությունը Հոգու նկատմամբ, օրինակ՝ բռնությունը, ալկոհոլը և վնասակար դեղորայքն ու թմրանյութերը: Քաջություն ունեցեք անջատելու տեսանյութը կամ խաղը, դուրս գալու ֆիլմից կամ պարահանդեսից, փոխելու երաժշտությունը կամ հրաժարվելու այն ամենից, ինչը չի համապատասխանում Հոգուն։

Օգտագործեք սոցիալական լրատվամիջոցները՝ ոգեշնչելու համար: Սոցիալական լրատվամիջոցները կարող են հաղորդակցման հզոր գործիք լինել: Եթե դուք օգտագործում եք այն, կենտրոնացեք լույսի, հավատքի և ճշմարտության վրա: Մի համեմատեք ձեր կյանքը այն ամենի հետ, ինչով ապրում են ուրիշները: Հիշեք, որ ձեր արժեքը գալիս է երկնային ծնողների զավակ լինելուց, ոչ թե սոցիալական ցանցերից:

Ձգտեք առողջ փորձառությունների և իրական, երկարատև հարաբերությունների։ Զգույշ եղեք, որ տեխնոլոգիաների և լրատվամիջոցների օգտագործումը չփոխարինի ընտանիքի և ընկերների հետ անցկացրած ժամանակին: Սոցիալական լրատվամիջոցները և այլ տեխնոլոգիաները կարող են խլել ձեր ժամանակի մեծ մասը՝ առանց դրա դիմաց մեծ արժեք տալու։ Դադար առեք վիրտուալ աշխարհից և կապվեք իրական կյանքի մարդկանց հետ:

Դուք կարող եք Հոգին միշտ ձեզ հետ ունենալ: Այս խոստումը այն ուխտի մասն է, որը դուք կապում եք ամեն անգամ, երբ ճաշակում եք հաղորդությունը։ Հոգին կվկայի ձեզ Երկնային Հոր և Հիսուս Քրիստոսի մասին։ Նա կմխիթարի, կառաջնորդի, կզգուշացնի և կսրբացնի ձեզ: Նա կօգնի ձեզ ճանաչել ճշմարտությունը և տեսնել լավը աշխարհում: