Ọlọ́run nfẹ́ láti báa yín sọ̀rọ̀.

Ẹ̀mí ndarí yín sí Baba Ọ̀run àti Jésù Krístì. Èyí ni ojúṣe pàtàkì ti Ẹ̀mí Mímọ́. Òun bákannáà yíò mísí yín láti ronúpìwàdà àti láti tẹ̀lé Jésù Krístì kí ẹ lè gba àwọn ìbùkún ti Ètùtù Rẹ̀. Bí ẹ ṣe nronúpìwàdà, Ẹ̀mí nwẹ̀ yín mọ́ ó sì nràn yín lọ́wọ́ láti yí padà.

Ẹ̀mí Mímọ́ nsọ̀rọ̀ sí inú àti ọkàn yín. Àwọn ọ̀rọ̀ láti ọ̀dọ̀ Ẹ̀mí lè wá sí inú yín ní àwọn ọ̀pọ̀lọpọ̀ ọ̀nà—nípa àwọn èrò ìmísí, ìkìlọ̀, òye kedere, àti àwọn ìrántí ti ẹ̀mí. Ẹ̀mí Mímọ́ lè sọ̀rọ̀ sí ọkàn yín nípa gbígbé àwọ̀n ìmọ̀lára yín ga bíiti ìtùnú, ìgbẹ́kẹ̀lé, àlàáfíà, ìfẹ́, ayọ̀, ìrẹ̀lẹ̀, ìmoore, àti sùúrù.

“Gba Ẹ̀mí Mímọ́.” Àwọn ọ̀rọ̀ wọ̀nyí ni a sọ nígbàtí a bá fi ẹsẹ̀ yín múlẹ̀ bí ọmọ Ìjọ Krístì. Báwo ni ẹ ṣe gba Ẹ̀mí Mímọ́? Nípa gbígbọ́ran sí àwọn Ìkọ́ni ti Jésù Krístì. Òun ni okun yín. Títẹ́lé E npe Ẹ̀mí Mímọ́ wá sínú ayé yín.

Ẹ wá Baba Ọ̀run nínú àdúrà yín. Ẹ tú ọkàn yín jáde sí I. Ẹ dúpẹ́ lọ́wọ́ Rẹ̀ fún ọ̀pọ̀lọpọ̀ àwọn ìbùkún ìyanu tí Ó ti fi fún yín. Ẹ pín ayọ̀, ìdàmú, àti ìbèèrè yín pẹ̀lú Rẹ̀. Ẹ dúró jẹ́ kí ẹ sì fetísílẹ̀ fún àwọn ìdáhùn Rẹ̀, èyí tí ó lè wá bí ìmọ̀lára àlàáfíà, èrò nínú yín, tàbí ìwọ̀lọ́kàn láti ṣe ohunkan.

Ẹ gbọ́ ohùn Ọlọ́run nínú àwọn ìwé mímọ́. Àwọn ìwé mímọ́ jẹ́ ọ̀rọ̀ Ọlọ́run sí yín! Ẹ kọ́ ẹ̀kọ́ látinú wọn lójojúmọ́ láti rí ohùn Rẹ̀ kí ẹ sì ní ìmọ̀lára ìfẹ́ Rẹ̀. Bí ẹ ti nkàá, ẹ ronújinlẹ̀ ohun tí Ó lè máa kọ́ yín, kí ẹ sì kọ àwọn ìwọ̀lọ́kàn tí ó wá sílẹ̀. Ẹ mu ṣe ìhùwà ojojúmọ́ láti ṣe àṣàrò àwọn ìwé mímọ́—nípàtàkì Ìwé ti Mọ́mọ́nì—ní gbogbo ayé yín.

Ẹ ṣe ìṣe lórí ìwọ̀lọ́kàn ti ẹ̀mí tí ẹ gbà. Bí ẹ bá ní èrò tàbí ìwọ̀lọ́kàn láti ṣe ohun rere kan tí yíò bùkún ẹnìkan, ṣe é! Gbogbo ohun rere nwá làti ọ̀dọ̀ Ọlọ́run. Ẹ fi hàn Baba yín Ọ̀run pé Òun lè gbẹ́kẹ̀lé yín láti tẹ̀lé àwọn ìwọ̀lọ́kàn láti ọ̀dọ̀ Rẹ̀.

Ẹ̀mí Mímọ́ yíò tù nínú yíò sì tọ́ yín sọ́nà. Òun ni a mọ̀ bí Olùtùnú. Òun yíò tì yín lẹ́hìn ní àwọn àkokò àdánwò! Òun yíò ràn yín lọ́wọ́ láti mọ ohun tí ẹ ó sọ tàbí ṣe. Pẹ̀lú ipá Rẹ̀, ẹ lè sọ ìyàtọ̀ ní àárín ohun tí ó jẹ́ òtítọ́ àti ohun tí ó jẹ́ irọ́. Ó lè ràn yín lọ́wọ́ láti rí rerenínú àwọn ẹlòmírán àti nínú arayín. Bákannáà Ẹ̀mí lè kìlọ̀ fún yín nípa ewu. Òun yíò ṣe atọ́nà yín síwájú Jésù Krístì àti kúrò nínú ẹ̀ṣẹ̀.

Ẹ lè gba àwọn ẹ̀bùn ti ẹ̀mí. Àwọn ọ̀pọ̀ ẹ̀bùn wà tí Ọlọ́run nfi fún àwọn ọmọ Rẹ̀ nípasẹ̀ ẹ̀mí Rẹ̀. Àwọn kan mẹ́nubàá nínú àwọn ìwé mímọ́ pẹ̀lú ìfihàn, gbígbàgbọ́ nínú Jésù Krístì, kíkọ́ni, níní òye, àti ọgbọ́n. Ẹ gbàdúrà láti bèèrè lọ́wọ́ Baba Ọ̀run nípa àwọn ẹ̀bùn ti ẹ̀mí tí Òun ti fi fún yín, bí ẹ ṣe lè gbèrú wọn, àti bí Òun ṣe fẹ́ kí ẹ lò wọ́n láti bùkún àwọn ẹlòmíràn.