I Maaku ni Marooro ma Au Bitiobi—E na Teraa Ana Iango?

N te moan tai, ao I bon aki tabe. I noori tuan te Ekaretia bwa a tianaki. I teimatoa n nako n taromauri, ma I bon i nanou ao I namakinna bwa I aki tau ao ni katoka kanakin te toa inanon iraua te namwakaina.

Ngke e a roko te COVID‑19, e katokii au waaki ni kabane. N te tai naba anne, I reiakina te bwai ae kakubanako: I tobwaaki. A bon aki tutuangai au karo, ao I a rinanon te aki rau n iango bwa antai raoi ngai.

I namakina te raroanako man bwaai ake I kakoauai ngkoa. I ataia bwa I riai n kakaea bwa antai raoi ngai ni koaua. Ngke I a okira mweengau, I marooro ma au karo iaon bwaai ni kabane—n raonaki ma rinerine ake I a tia ni karaoi. Ma aki bwauranai, a kaekaai ma te tangira. A kauringai bwa antai raoi ngai: natiia te mwane ao natin te Atua ae tangiraki.

I tangiria ni bitaki. A kaungaai au karo bwa N na marooro ma au bitiobi, moana waakin te rairannano, ao n onimakina mwaakan te Tia Kamaiu ni kaboan maiu.

Ma I maaku! I bon raraoma bwa tera tuaau ke motikan taekau ibukin au rinerine. I bon aki tabeakin aia iango aomata ibukiu, ma au bitiobi bon te aomata ae tamaroa, ao I aki tangiria ae e na aki kukurei irou ngkana I tuangnga bwaai ake I a tia ni karaoi.

Ma n aron are e reireiniira Unimwaane Sccott D. Whiting man te Itingaun: “Tai karabako mairouia ake a tangiriko man boutokaiko, ma, birii nakoia. A kona ni buokiko bitiobi, beretitenti n te mwaanga, ao taan kairiiri aika a tamaroa n karekea mwaakan te kamaiuaki n Ana Mwakuri ni Kamaiu Iesu Kristo.”

A tauii kingin te nakoanibonga bitiobi n tei ibukin te Uea ni buokiia membwa n te Ekaretia n rairi nanoia” Ngke I marooro ma ngaia ao I aki aitara ma motiki taeka aika rawawata, ma ae I namakinna n ana aobiti au bitiobi bon ti te rau n nano. I ataia bwa e onimakinna te Uea bwa e na buokai, ao I namakinna bwa I kona naba n onimakinna.

E kaungaai au bitiobi bwa N na reiakina taekan te Tia Kamaiu ao Ana Mwakuri ni Kamaiu man karikirakean anua n tamnei. I kaitiboo ma au bitiobi n taainako, ao e weteai ni katoa wiiki n ongongora. I namakina te tangiraki ni katoaa tai are I marooro iai ma ngaia.

N tokin te tai, ma ana ibuobuoki au bitiobi, I a teiraroa man bwaai aika aki tamaroa inanon maiu. Ma, I bon maaku naba n manga anaa te toa. I bon tau—ma mwakuri ni kabane ake I a tia ni karaoi?

Ma e kamatoaa nakoiu au bitiobi. E kauringai bwa I aki kainanoia bwa N na kororaoi—n na ti kukurei ni karaoia. I a tia ni karaoa au kabanea ni tamaroa, ao e ataia te Tia Kamaiu ao e na reitinako n kabwarai au bure ao N na onimakina Ana bwaintangira ae te rairannano.

Titita Tamara W. Runia, Moan Kauntira n Beretitentii n te Booki n Ataeinnaine ni Kabuta, e tibwa tia n reireia, “Ko kangai ngkana ko nakon Kristo,‘Ko kona ni buokai?’ ma te onimaki, kaotakin te kakoaua bwa e tangaina Baina nakoim n taainako.”

Imwiin te taneiai aei, I moana kabooua au berita aika tabu rinanon kanakin te toa ma te onimaki. I namakinna bwa kanga ai ngai te aomata ae boou, ma te namakin ae boou bwa antai raoi ngai ao tera ae I kona ni karaoi ma ana ibuobuoki te Uea. I beku naba bwa te mitinare bukina bwa I a tia ni kakoaua korakoran kabooan maiu are ana bwaintangira te Tia Kamaiu ni bita maiu, I tangira naba n buokiia tabeman n karekea te kaantaninga are E anganai ni katoa bong.

A aki tianaki taian tua—a kateaki bukina bwa te Atua e tangiriira n tokanikai, n rikirake, ao n birinako man ana kamwamwane te bure. Boton ana euangkerio Iesu Kristo bon te tangira are iai Irouna ma Tamara are i Karawa ibukira. Bukina bwa I a tia n namakina te tangira ae kororaoi anne, I kekeiaki n riki n ai Aroia.

Aia bwaintangira n rairannano e kaona maiu ma te kimwareirei.