Te Rairannano Tiaki Ti Te Tokanikai iaon te Bure

Imwain au mition, e aki nakoraoi maiu, ma e tamaroa. I nang tangira te reirei n te kuura ae rietata ao I a tibwa karekea raoraou ae e tamaroa. I rangi ni kukurei.

I ataia bwa te beku n te mition e na matoatoa. Ma e ngae n anne, iai au kaantaninga bwa te beku n te mition n 18 te namakaina e na riki bwa te kabanea n tamaroa n tai inanon maiu—a na uarereke kangaanga.

Ma inanon onoua te namakaina, ana mare raoraou e riki bwa te bwai ae boou n rin ibuakon matoan bwaai aika I aki kantaningai. Te mwaing nakon te aba ae boou ao reiakinan te taetae ae boou e anganai te maroa ao te aki rau. E kakua au iango te aki butimwaeaki are bon mwakoron te maiu n mitinare. Ni koauana, I a kan okira mweengau.

I a bon kua ao I un, ao akea namakinan ae te Atua e anganai te kaantaninga ao te kukurei are I rangi ni kainnanoia. Man imwiin are e bane raoi au anga ao I a tibwa rairaki nakon te berita man au kakabwaia n tamanuea: are N na namakina ana tangira Tamau are i Karawa rinanon koroboki aika tabu.

Ngke I ukori koroboki aika tabu, I kunea bwa e a nano reitakiu nakon karakinan Ewa. E teweaki nako man te bwaretaiti nakon te rereua ae roo man karawawata, ae kanga aron raoi au namakin. N aekan raoi au taneiai, bitakin Ewa e reke man ana rinerine. I tabe n iangoia bwa e uringaaba n ana rinerine, kanga n aron ae I tabe n uringaaba n au rinerine ni kan beku.

Ma iai te wanawana riki n ana tarataraEwa nakoiu. E ngae ngke a bua bwaai ni kabane mairouna, ngke e reiakinna bwa iai ana Tia Kamaiu, e “kukurei, n taku: Ngke arona bwa ti aki riaon te tua ti na … aki kona n ataa ae raoiroi ao ae buakaka, ao te kimwareirei ni kaboakira” (Mote 5:11).

E aki nanokawaki n ana rinerine. E karabwarabwa iai! E ngae ngke a teweakinako man te bwaretaiti ngaia ma Atam, te kimwareirei ni kaboakiia e karewe riki nakon marakin te bwai ae bua mairouna. Ni koauana, e taraa n ae te kaboaki e uota nakoina te kimwareirei ae korakora riki nakon are ngke e aki kainnanoa te kabooaki.

E kanga n riki aei?

Ti kona n iangoia bwa te rairannano bon ti ibukin kamaunaan buure ao anua aika bubuaka man maiura. Te waaki ni kamauna aei e kona ni kangaanga ao ni kamaraki n tabetai, ao ni kabebetea kanimwan te iango ae aki tamaroa nakon te taeka anne.

Ma te rairannano tiaki ti ibukin kauarerekean te bure. Bon ibukin te riki n ai aron Kristo.

Te rairaki Nakoina—bitakin anuara ao katitebooan ara taratara ma Ngaia—bon aron naba te rairannano.

I nooria bwa inanon uniu ma maroaau, au taratara e tabe n wariki. I kabanea au tai iaon bwaai aika I aki ooi ao n aki nooria bwa tera ae I a tia n karekea: te reitaki ae kaan ma au Tia Kamaiu.

I nooria bwa I kainanoia n rairananou man anuau aika aki tamaroa. E anaa te tai ae maan, ma ngke I tang n bubuti ana ibuobuoki au Tia Kabooa Maiu, e kamatoaki nakoiu bwa “n te maiu aei N na karekea te kimwareirei” (Mote 5:10).

I teimatoa n nanokawaki ngkai I aki ooa ana mare raoraou, ma inanon taina, te Uea e kaekai au tataro. I kukurei ibukin raoraou, ao I kunea te kimwareirei ae bati n au kakoaua ae Tamara are i Karawa e bon noriia man tangiriia Natina n tatabemaniia. E bati ae I karekea riki nakon ake a bua mairou.

E reirei Titita Kristin M. Yee, Kauoman n Kauntira n te Beretitentii n te Bootaki n Aine ni Kabuta, “Te rairannano e karekea nakoira namakinan ana tangira te Atua ao n ataia ao n Tangiria n aanga ae ti aki kona n ataia.”

Man te rairannano,I ataia ngkai bwa ngkana I kaaniai nakon Kristo, “ao e na karika [au] rereua n aiaron Eten, ao [au] rereua naba n aiaron ana onaroka te Uea; e na kuneaki te kimwareirei ma te kukurei iai.” (Itaia 51:3).

Ngke I a okira mweengau man au mition, I aki oki nakon te bwaretaiti. Te maiu imwin te mitoin bon te rereua ae boou irou ae N na ribanaia. E aki bebete, ao tabetai I ururinga maiu imwain au mition.

Ma I ataia bwa mairoun Kristo, kimwareireiu e na nano riki inanon te atatai iaon kaboakiu.