“Ngkana te Bure e Karika te Mangaongao, Kristo e Uota te Rau,” Riaona, Tianuare. 2026.
Man YA Katoa Wiiki
Ngkana E Karika te Mangaongao te Bure, E Uota te Rau Kristo
E ngae ibuakon kamangaongaon te maiu, E kona n uota te oota, babaronga, ao te rau nakon tamneim Kristo.
Kamataata n te tamnei iroun Kate Birch
E roroko namakinan ae e mangaongao … maium?
Namakinan te mangaongao bon te bwai ae ti rinanona n taai tabetai. A kona kangaanga n te aonaaba aei ni kamwaninganakoira ae ngaira bon tamnei aika ti rinanon te maiu n rabwata—te bwai ae ti tuai kakaraoia mai imwaina.
Uoua bwaintangira aika kamimi are e anganiira te Atua bon rabwatara ae mamate ao inaomatara n rinerine. Bwaintangira aikai ti kona iai n namakin, tangiri bwaai, ao ni mwakuri i bon ibukira. N aron bwaai, a kona ni mangaongao bwaai man aki matoa taekaia ibukin rinerine ake e kona ni karaoia te aine ke te mwane.
Ti bane ni kakaraoi kaairua. Ma ngkana ti rootaki n te bure ma anua aika tiaki kona n tokanikai iaoia, e ngae ngkana, e korakora tangiran te kan bitaki, e baiti namakinnan te bwarannano. Ma ana katikitiki ana itera tamneira nako karawa ao ana itera te maiu ae mamate ni katikitikiira nakon te aonaaba, e kona n namakinaki bwa kanga e a boboo naba te katiki-roo i nanora.
E ngae ngkana ti rootaki n bwaai n aron te wiinnati, un, motikitaeka aika aki kororaoi, kabongaanaan bwaai n reitaki, tamnei n tangako, ke tera riki, e baiti te kakaitara n kaurai ain te mamaa, bwarannano, ao n tokina raoi, te mangaongao n tamneira.
Te kakukurei ibukira bwa, Tamara are i Karawa ao Iesu Kristo ataa aron taobaraan te mangao anne.
Ukeran Otana Bon te Moan Mwaneka
Inanon te Karikibwai—moan waakin bwaai aika ti atai—e kabwarabwaraaki bwa e mangaongao te aonaaba, n aki barongaaki: “Ao e tuai n riki ni bwai te aonaba, ao akea kanoana, ao e mena te ro i aoni marawa” (Karikan Bai 1:2). Te mangaongao ma te rootongitong ae kabwaranano aei ni kauringiira aron te kakaitara n kona n namakinna ngkana ti bure ke ni karaoi rinerine ake a kaitarai reireiara. E tatangira namakinana iroura bwa ti a mwane ao n angiin te tai n kaungaira bwa ti na karabaira.
Ma n aron ae reireiniira Titita Tamara W. Runia, te Moan Kauntira n te Beretitentii n te Botaki n Ataeinnaine ni Kabuta: “Iesu Kristo e anganiia te ota naake a mena inanon te rootongitong. Ngaia are, ni boong akana ko namakina iai te bwanaa bwa e tuangko bwa ko na karabako, bwa ko riai ni karabako n te ruu ae roo n tii ngkoe, I kaoko bwa ko na ninikoria ao ni kakoaua Kristo! Kaaki te roo n rairaki nakon te Ota—Otan ara Kantaninga ae Kororaoi.”
Iaan ana kairiiri te Atua, inanon te Karikibwai te moan bwai ae karaoia Iesu Kristo bon kakeaan kamangaongaon te rootongitong n uotarake te oota (taraa Karikan Bwai 1:3; Mote 2:2-5). Mai ikanne, E wakinako n barongaai bwaai ake a kamangaongao, mai karawa are bubura nakon te koraa ae uarereke.
Ngkana E kona n barongaa te aonaaba, iangoia ngkane bwa tera e kona n reke ngkana ko nakon Natina te Mwane ibukin te kamaiuaki n mwaakana ni kamaiu ni katoa bong. Ngkana ko namakinna bwa ko rawawata n am kangaanga ao n rootongitongin te aonaaba, kanakoan baim nakon ootan Kristo bon te moan mwaneka nakon reken te rau ao te barongaaki mai karawa.
Imwiina, Uringnga bwa Antai Ngkoe
Imwiin barongakin ma katamaroakin karawa ma te aba, Tamara are i Karawa e katauraoa te kawai ibukiia Natina n tamnei bwa ana ruo nakon te aba ao ni karekei rabwataia. Ma inanon ara tai iaon te aba, te kakaitara e mwakuri korakora n kamwaningaira bwa antai ngaira.
Ti kona n nori ana mwakuri n kationakoira man rikira mai karawa inanon te tai are te Atua e taetae ma te burabeti Mote ao tibwauaa te atatai ma ngaia. N Mote 1, e taetae te Atua nakon Mote n weteia n arana ao n kaokiokia n weteaia bwa Natina.
Ma n te tai are e nako iai te Atua, e kaoti Tatan ao n wetea Mote ae “natin te aomata” (Mote 1:12), ni kaririia ni kamwaninga bwa antai raoi ngaia.
E tangiria Tatan bwa ti na mwaninga bwa antai raoi ngaira. E karina iroura te nanououa ni konabwaira n bitaki. E tangiriira bwa ti na kakoaua bwa ngaira aomata, mwaane ma aine aika aki kona n bitaki ao n titiku n aroia anne.
Ma Unimwaane Patrick Kearon man te Kooram n te Tengaun ma Uoman e kauringiira: “Ko kona n nakon Kristo ma te koaua n Ana atataiaomata ao ni karekei ni kabane Ana waintituaraoi n te kimwareirei, te rau, te kaantaninga, te oota, te koaua, te kaotioti, te atatai, ao te wanawana. … Ngkami bon natin te Atua aine aika kam tangiraki, ngkami natin te Atua mwaane aika a kakawaki, ao n tia n bwaintangiraiko ma Natina ae tabu ni kamaiuko, karaoiroiko, ao ni katabuko.
Kaboan maiura bon te bwai ae akea iroun Tatan. Ao ngkana ti okira kinaakira mai karawa, ti kona ni kangai, n aron ae karaoia Mote:
“Antai ngkoe? Bwa nooria, ngai natin te Atua te mwaane [ke aine], ae ti te arona ma ana Rikitemanna. …
“Kararoako, Tatan; tai mwamwanaai; bwa e taku te Atua nakoiu: Bon ti te arona ngkoe ma au Rikitemanna” (Mote 1:13, 16).
Ngkana e mangaongao maium, kamotirawa moa. Uringa kinaakim mai karawa. Kariaia te koaua anne, ae ngkami natin te Atua aika tangiraki, bwa e na katikiko rake nako karawa. Rairaki nako Iesu Kristo bwa E aonga ni kona n buokiko ni kaoka te rau nakon tamneim.
Te kabanea, Kariaia Kristo bwa E na Bita te Mangaongao nakon te Rau
Ngke a kiitana te Nne n Aroka are i Eten Atam ao Ewa, te bebete are a ataia ngkoa e a oneaki mwiina n te aonaaba ae kamaroa man karawawata. Ma e berita Tamara are i Karawa bwa a kona n karekea bukina bwa E katauraoa te Tia Kamaiu ni kaaboia man aia bure ao rawawataia (taraa Mote 5: 7–10).
Ngkana ko namakinna te rawawata n te maiu aei, uringa te koaua aei: Tamam are i Karawa e ataia ae ti na aitara ma kariiri, ti na karaoi kairua, ao ni bure i nanon kawaira n Okiria—anne bon mwakoron te kainibaire.
Rinanon Iesu Kristo, Tamara are i Karawa e kona n buokiira n tainako n kaitarai mwaakan te rootongitong inanon maiura ao n onei mwiia n te oota. N aki tabe ma iraua te tai ae ti kairua iai, mairoun ara Tia Kamaiu, ti kona n onea mwiin te mangaongao ma te rau i nanora ngkana ti rairi nanora.
E kakoaua Beretitenti Russell M. Nelson:
“E na kakorakorako [Iesu Kristo]. E na kakabwaiako ma te rau, inanon tain te mangaongao. …
E katokaa ami bure, ma marakimi, ma rawawatami, ao ai mamaramii i aona Iesu Kristo. Ko aki uota te rawawata n ti ngkoe! E na kabwarai am bure ngkana ko raira nanom. E na kakabwaiako ni baike ko kainanoi. E na kamaiua tamneim ae ikoaki.
Tera nako ae ko rawawata iai, ngkana ko tan nakon Tamam are i Karawa ao Iesu Kristo ibukin buokam, A na kaokia n arona ae uruaki, kainaomatako man kamangaongaon te bure ma te kariiri, ao ni katamaroa maium.
A tia ni kakaraoia n taainako.