“Am Rao Nakomai, Iriirai,” Riaona,, Tianuare 2026.
Am Rao Nakomai, Iriirai
Bwaai n ibuobuoki n te ririki aei a uoti korobanna aika boou ao nonori aika kauki iango ibukin am kamatebwai n te O Tetemanti.
I Will Surely Deliver Thee, iroun Eva Timothy, e tabu kaeweana
E aki tamaroa ngkana, ko wareki koroboki aika tabu, iai raoraom ae tetekateka irarikim, ni kakaungako? Tao temanna ae tatangiri koroboki aika tabu ao e rang kukurei ngkai ko wareki, e aaki kona n taotaona angina. N tabetai e na manga kangai raoraom anne, “Tiaki ae e kakaongora te mwakoro anne?” “Tera am iango ni kiibu akanne?” “O, ngaia anne, kanga bon aekan raoi maiura, ngkoe iroum?” Ngkana ko bae ke n minotaki n te mwakoro ae kangaanga, raoraom anne e kona ni kangai, “Eng, aei naba aron taraakina teuana. E ibuobuoki anne?”—ma e karaurau n aki biririmoa ni kaota kanoana. Bon te rao raoi, ni koaua.
Nakomai, Iriirai bon te aeka n rao anne. Ana kaantaninga bwa e na buokiko ni katamaroa am taneiai inanon warekan koroboki aika tabu. E kona ni kotei mwakoro aika a kona n buoka karikirakean am onimaki iroun Tamam are i Karawa ao Iesu Kristo—ao ngkane e kona n buokiko n tomai mwakoro aikane nakon bwaai aika riki inanon maium. E kona ni buokiko ngkana iai am titiraki, ma angiin te tai, Nakomai, Iriirai e na titirakiniko titiraki nakon are ko na kaekai—bukina bwa bon te rao ae tamaroa ae e na aki iraea kakukurein karekean koaua n tamnei aikai i bon iroum.
Nakomai, Iriirai e kona ni karaoi mwakuri n iraorao n taai ake ko wareki koroboki aika tabu. Eng, e ngae ngkana ko wareka te O Tetemanti n te ririki aei.
N raonaki ma titiraki aika kauki iango ao iango ibukin waaki ni kakukurei, ko kona naba ni karekei bwaai riki aika kona n ibuobuoki n Nakomai, Iriirai. Aikai tabeua:
Kabwarabwaraan te O Tetemanti
N uakaan ma moanakin te 2026 n Nakomai, Iriirai, ko na kona ni karekea tamnein kabwarabwaraan te O Tetemanti. Kanga ai aron te tai are e kaairaki ma araia burabeti, ueea, ao aomata aika kakawaki. E ibuobuoki aio bukina bwa booki n te O Tetemanti aki barongaaki raoi ni kaineti ma te bong ao te tai. Te kabwarabwara aei e kona ni kaotia nakoim, te katooto, bwa e bwaka iaa aia koroboki burabeti n aron Itaia ma Ieremia n rongorongon Iuta. Ko kona n nooria bwa a bwaka iaa karakinan Taniera ma Etita n aron tein tamnein te O Tetemanti. Ngkana ko namakina ae ko bua n te O Tetemanti, rairia nakon “Kabwarabwaraan te O Tetemanti” n karekea ootam.
Korobanna aika Boou
Tebwii ma uoua korobanna aika boou aika a katauaki ibukin Nakomai, Iriirai n te ririki aei. Tabeua aika kakawaki:
-
Enoch Sees the Meridian of Time, iroun Jennifer Paget, te banna ni katooto ibukin ana mii ni burabeti Enoka ibukin ana anga karea te Tia Kamaiu (taraa Mote 7).
-
Stand as a Witness, iroun Kwani Povi Winder, ae katerea “te tia mwakuri te aine ae uarereke” are ana kakoaua ae bebete e kairia nakon te kakai ae korakora (taraa 2 Uea 5).
-
I Have a Great Work to Do, iroun Tyson Snow, ae katamneia nanomatoan Neemia ni manga katei oon Ierutarem, e ngae ngke iai te kakaitara mairouia ana kairiribai (taraa Neemia 4).
-
I Will Surely Deliver Thee, iroun Eva Timothy, katamneian Ieremia ngke e kainaomataaki man te kinono ae bokaboka iroun Ebeta‑Meraka, are te I-Itiobia (taraa Ieremia 38–39).
“Iango aika ana Ururingaki ao ni Iangoaki”
N angiin te tai, tein te kairi ibukin te kamatebwai n te wiiki n Nakomai, Iriirai e bae ibukin “Iango aika ana Ururingaki ao ni Iangoaki” Aika bon koroboki aika uarereke ibukin atuun reirei n aron berita aika tabu, anga karea, ikoikotakiia Iteraera, ao kario n te O Tetemanti. “Iango aika ana Ururingaki ao ni Iangoaki” e anga te kabwarabwara inanon taai rimoa, taratara n boong aika kaitira, ao nonori aika bebete aika kona n kabebetea karekean taneiai aika karikirakea te onimaki ngkana e kamatebwaiaki te O Tetemanti.
N aron ririki aika nako, Nakomai, Iriirai bon tiaki boton am kamatebwai. Bon ti te rao ae ibuobuoki nakon kamatebwaian ana taeka te Atua inanon koroboki aika tabu. Anne aan te rao.