“Eaera Nna Ngurengure?,” Riaona, Tianuare. 2026.
Bannan te Onimaki
Eaera Nna Ngurengure?
Mwamwaingira inanon aua te tai bwa te utu ae birinako mai abana e riki bwa kataakira ae rawawata. Ma ti taua ni kamatoaa te kai te biti ma te koaua bwa te Uea e uotiira nakon boong imwaira aika tamaroa riki.
N tain bwakan baan aroka n 2019, I roko i Spain ma natiu, Aaron ae 8 ana ririki ao Jorge ae 17 and ririki, ae iai arorakina ae te autism. Ma ti kanoan miiu ae I uotia ni mwananga, I nimta te Atua ao n Onimakinna n ae bwanin.
Te I-Tamaria ae tamaroa e butimwaira nakon mweengana, ike ti tiku iai inanon uoua te wiiki. Ma e bon aki bebete mwaingin Jorge man ana otabwanin are e taneiai iai. Ibukin aorakina, e iriiri kainibaire aika matoa. Tabeua tairiki ni moan rokora, e oroorea oon te auti, ao I waekoa n teiraki n tukia bwa e na aki kautiia te koraki. I katorobubua irarikina ao n tataro, n ururinga Itaia 41:10: “Tai maku ba I memena i rarikim: tai barannano; Ngai ae Atuam: N na kakorakorako; eng, N na buokiko Ngai; eng, ba N na taua ataim n au raoiroi.”
Inanon ara kauoua n wiikente i Spain, ti roko n te taromauri ngke e nang bwara raoi te bootaki n toa. I kawara te ataeinnaine are e mena ibuakoia ataein te Moanrinan ao n kabwarabwara bwa ngai te membwa n te Ekaretia ma akea ae I kinaa. E kabwarabwaraira nakoia membwa ake tabeman.
Te bong are imwina ao te kauntira n te kaawa ae Zaragoza e butimwaira bwa aomata aika kitana abaia ao ni kairiira nakon te auti ae akea te ran ma te iti iai. Te bitiobiriki, te Bootaki n Aine, ao te kooram n unimwaane man te uoote are ti kaea ngkoa a roko ni buokiira ma taian rabuna, te amwarake ae e aki kainanoa kabueana, onea n kamariri, ao tabeua riki bwaai ake ti kainnanoi.
A moana reireia natiu, ao I moana reireiu ni kataneiai. E a rangi n kangaanga tain te amwarake iroun Jorge, are e bon tataneiai n amwamwarake n te tawanou. E kaongoai ana tia reirei bwa tao antai are e anga reirei n te tai anne, ngkana e boo tawanou, e a kaotinakoa naba kanana ao n waaki n amwarake.
“N na Aki Mamatam Naba”
Mwamwaingira ake aua a riki bwa kataakira ae rawawata. I tataro bwa N na kakorakoraaki ma angiin te tai I tang i bon irou. Inanon wiiki aika bati, I matuu inanon tii uoua ke teniua te aoa n te tairiki. Imwiin iraua te bong ni kaakaea au mwakuri, I kakabwaiaaki ngke ea reke au mwakuri ae tararuaan te aine ae kairake are e kaentia n te kaburoro. Imwiin au tei n au mwakuri, I anaiia natiu, buokiia n aia kamatebwai, ao manga karaoa au bwai n reirei.
I tabeakina te aine ae tamaroa aei inanon teuana te ririki, n uaa e motirawa ngke 48 ana ririki ao n katikuia uoman natina aika uarereke. Aroaron neiei are rinanona e kairoroai bwa N na bon titirakinai, “Eaera nna ngurengure?” A reke bwaai ake ti kainnanoi man tararuaakina ao n kaona tamneiu ma te kakaitau ibukin Tamau are i Karawa.
Ni katoa bong ti wareki koroboki aika tabu, ao ni katei kainibaire aika a na angan Jorge namakinan te mano. N moan 2024, ti moana ara kakatauraoi bwa ti na nakon te Madrid Spain Tembora. Ni kaniiara nakon Tamara are i Karawa, I namakinna bwa ti riai n aki mamatam n ara utu. E kariaia Aaron, ao n te ingabong are imwina ao e tuangai Jorge, “Mom, n te bong aei ao N na aki mamatam naba.” Bon te tai ae akea kabotauan kakukureina.
“Ni kaniira nakon Tamara are i Karawa inanon ara kakatauraoi nakon te Madrid Spain Tembora, I namakinna bwa ti riai n aki mamatam n ara utu,” e taku Yesmin. “E tuangai Jorge,‘Mom, n te bong aei ao N na aki mamatam naba.’ Bon te tai ae akea kabotauan kakukureina.”
Imwiin kawaran te tembora, e rikirake n tamaroa aron Jorge. E a kona riki n butimwaei bitaki nakon aron ana waaki. Ni katoa Kaonobong ao e katauraoi oneana bwa e aonga n tauraoi ni kabuta te toa n te Tabati. E keerake naba tamaroan ana kekeiaki n te reirei.
Ni bong aikai ao ti a bon katan iaan baira, n boutokaaki iroun Tamara are i Karawa ae tatangira. E a tia ni kateirakeira Iesu Kristo mai buakon te mannang (taraa Itaia 61:3). Man kakabwakaan ara kabwianibwai, ti karekei kakabwaia aika mwaiti. Ti taua ni kamatoa te kai te biti (taraa 1 Nibwaai 8:24, 30; 11:25; 15:23) ma te koaua bwa ti a waakirake nakon boong imwaira aika tamaroa riki.