I Namakina te Rau

Kamataata n te korotamnei iroun Allen Garns

Ngke I butimwaei uoua wewete n te Ekaretia i nanon teuana te wiiki bwa te tia katanga te biano, I tabe n raraoma ibukin au tai bwa nnang kanga ni katiai tabeu ni mwengau, n au mwakuri, ao n au reirei. I nanou, ao I bon rang kan beku ibukin te Uea ao ni uota Tamneina nakoia aomata ao ni karikirakei au tarena. I namakinna, bwa, e aki tau arou ni karaoa tibwangau nakon are I tangiria.

N te wiiki are imwiina, e rikirake ni mwaiti ara mwakuri n te kambwana are I mwakuri iai. Ibukina bwa angiin au mwakuri bon te taibi, ngaia are a moanna ni maraki angan baiu ma baiu. I raraoma bwa N na kona ni katanga te biano ke I aki ngkana e aki toki marakiu.

N te Tabati, ngke I katanga te piano imwain waakin te taromauri, a manga moanna naba ni maraki mwatiretin baiu. I waekoa n tataro i nanou, ao ni bubuti te korakora bwa N na kona n reitinako ni katangtang.

N tain te toa, I a tibwa karaua n iangoia ae I bon maan n aki kakatanga te kuna are imwiina. “Ai aron ae tao e aki tau marakiu, ” I taku, “ngkai N na manga katanga te anene ae kangaanga.” Ao n te tai arei ao I wareki taeka aikai, are bon kaineta raoi au namakin:

I namakina te rau, ngke I warekia. I ataia bwa e ataa kainanou te Tia Kamaiu. N tokin te tai, e a tia n rinanon te kainnano ni maraki ma te karawawataaki (taraa Aramwa 7:11-12). N na aki rinanon te tai aio n ti ngai. I aki kaantaningaia, ma I namakina Tamnein te Uea.

Ngke I a waaki ni katangtang, ao bon akea te maraki ae I namakinna, ao e marannako baiu i aon te biano. I a ataia raoi bwa au mwakuri n ibuobuoki e bon katanea te kawai ibukin kamaoau ao kaniiau ma Tamara are i Karawa.

Ngkana I karaua n iangoa au taneiai n te biano, ao I ataia bwa I aki maroa ni katangtang. I rotaki ni mwaakan ao raoiroin Iesu Kristo—te taneiai n tamnei are I karekea man au mwakuri n ibuobuoki Nakoina. I ataia bwa E memena ikekei n tainako ni boutokaira ao ni kakorakoraira ngkana iai nanora ni kan beku Ibukina.