“Taan Buokanibwai n te Aro n Atua,” Riaona, Tianuare. 2026.
Taan Buokanibwai n te Aro n Atua
(2 Betero 1:4)
Ara atatai iaon te babaire ni kamaiu e bon kanakoraoa ara taratara, kabatia kimwareireira, ao ni kakorakoraira bwa ti na tokanikai iaon kangaanga ma kakawaenako.
Christ Calls Two Disciplesi,, iroun Gary E. Smith
E kauringiira te Abotoro Betero bwa ibukiia ana reirei Iesu Kristo, “E a tia mwakan Karawa n anganiira bwaai ni kabane ake a kaineti ma te maiu ao te aro n Atua, rinanon te atatai mai irouna are e a tia ni weteira nakon te mimitong ao te tamaroa:
“Ake E anganira iai berita aika moa ni kakanato ao ni kakawaki: n te aro bwa kam aonga ni buokanibwai n te aro n atua” (2 Betero 1:3–4; kairaki ma kabwarabwaraana).
Ana Babaire Tamara are i Karawa e bon kaoti koaua ma berita aika kakawaki ake bon taekan rikiara ma aroarora.
N aron are e kabwarabwaraaki n “Te Utu: Te Katanoata nakon te Aonaaba”:
“Ni kabane aomata—mwaane ao aine—a karikaki ni katotongan te Atua. Ngaiia n tatabemaniianako bon naati mwaane ao aine aika tamnei aika a tangiraki irouia aia karo ake i karawa, ao, n aron anne, ngaiia n tatabemania iai aroia ae moan te kakawaki ao n kakannato n aron bairean aroia n te aro n atua. …
Imwain te maiu n rabwata, naati mwaane ao aine aika tamnei a kina ao a taromauria te Atua bwa Tamaia ae Akea Tokina ao a butimwaai Ana babaire are Natina a kona ni karekei rabwata ao n rinanon waakin aonaaba n rikirake nakon te kororaoi ao n atai aroia mai karawa bwa taan ababa n te maiu ae akea tokina.”
E berita te Atua nakoia Natina bwa ngkana a ira reirein Ana babaire ao ana katooto Natina ae Tangiraki, ni kawakin tuua, ao ni kekeiaki n onimaki ni uaa te toki, a na “karekea te maiu are akea tokina, are te bwai n tituaraoi ae moan te korakora mai i buakon ana bwai n tituaraoi nako te Atua.” (Reirei ao Berita aika Tabu 14:7).
E boboto ana mwakuri te Atua i aon rikirakeia ma karietataakia Natina. E karaoi ana babaire bwa e na kakabwaiaia Natina mwaane ao aine ibukina bwa “e korakora kakawakia aomata [imatan] te Atua” (Reirei ao Berita Aika Tabu 18:10).
Ana Babaire Te Tama
N te kauntira i karawa, E kaoti Ana babaire Tamara are i Karawa nakoia natina ibukin rikirakeia ma kimwareireia ae akea tokina.
“Ti na karaoa te aonaaba are a na kona ni maeka i aona naakai;
“Ao ti na kataiia ma ngkai, n nooria ngkana a na karaoi bwaai ni kabane are e na tuangiia te Uea ae Atuaia;
“Ao naake a kawakini moan maekaia a na karakaaki aroia; ao naake aki kawakini moan maekaia a na aki karekea te mimitong n te abanuea naba anne ma naake a kawakina moan maekaia; ao naake a kawakina kauouan maekaia a na mwaiti riki mimitong i aon atuuia n aki totoki.
“Ao te Uea e taku: Antai ae N na kanakoa? Ao temanna e kaeka n ai aron Natin te Aomata: Aio Ngai, kanakoai. Ao temanna riki e kaeka ao e taku: Aio Ngai, kanakoai. Ao te Uea e taku: N na kanakoa te moan.
“Ao te kauoman e bon un, ao e aki kawakina moan maekana; ao, n te bong arei, a mwaiti aika iria” (Aberaam 3:24–28).
Bon ti teuana te babaire are kaotaki n tain te kauntira i karawa—ana babaire Te Tama. E bon aki katea te titiraki Tamara are i Karawa, “Tera ae ti na karaoia?” E aki ukoukora are mai i nanoia, aia kariaia, ke n tuatua aia iango. Ma, E bon ti kaota ana babaire ao n titiraki rimwi, “Antai ae N na kanakoa?” E kabotoa ana titiraki aio nakoia bwa antai ae na kanakoa ao n karaoa raoi nanon Ana babaire.
Te rekenikai ibukin ana kaitara teuare buakaka e bon kabwarabwaraki inanon koroboki aika tabu.
“Mangaia are, ibukina bwa Tatan e kaitaraai, ao e ukeukera kamaunan inanomatan te aomata n rinerine, are Ngai … te Uea ae te Atua I a tia n anganna, ao, bwa N na anganna naba oin mwaakau … , I kariaia bwa e na teweaki nako;
Ao e a riki Tatan, … are te riaboro, taman taian kewe ni kabane, bwa e na mwamwanaia ao ni kamatakia aomata, ao ni kairia nakon te tautaekanaki a ana kantaninga, ni kabane ake aki kan ongo ni bwanau” (Mote 4:3–4; kairaki ma kabwarabwarana).
E bon aki kaota ana babaire Tatan are e aki iranaki irouia kain te kauntira i karawa. E bon aki tokanikai. E kaaitara! Kainikatongana, kamoamoana, ao n tinanikubekana e bon kairia bwa e na kaitara ana babaire Te Tama.
Ana Babaire Te Tama ao Ana Euangkerio Te Tia Kamaiu
Te babaire aei e bon kaota ana mwakuri te Tama ao te Nati ni kakabwaiai maiua aomata bwa na karekea te maiu are akea tokina.
Ana euangkerio Iesu Kristo e bon kaota te kawai nakon karekean kakabwaia ake a beritanaki n ana babaire te Atua, ana tua, reirei, otenanti, ao berita aika a riai ni kakoaua ao n iria mwaane ao aine. “Bon akea te ara riki teuana are e a tia n taekinaki i aan karawa ma ti Iesu Kristo … are a na kona ni kamaiuaki iai aomata” (2 Nibwaai 25:20). Ni koauana, Iesu Kristo bon “te kawai, te koaua, ao te maiu: akea ane nako n te Tama, bati i [Rou]” (Ioane 14:6; kairaki ma kabwarabwarana).
E kabwarabwara Beretitenti Russell M. Nelson:
“Kanoan te babaire anne bon te Karikibwai, ao ni kairaki naba ma te Bwaka ao te Mwakuri ni Kamaiu. Aikai teniua kanoan te babaire. Bon ana iango te Atua karaoan te buraneti ae tamaroa. E a tibwa roko te mate imwin Bwakan Atam [taraa 2 Nibwaai 2:25; Mote 6:48]. E reke te maiu ae aki mamate ao te maiu ae akea tokina man Ana Mwakuri ni Kamaiu Iesu Kristo [taraa 2 Nibwaai 2:21–28]. …
“… Ti mena i aon te aba n te tai ae uarereke, n tokanikai man kataakira, ao ni katauraoira bwa ti na waaki nakon mwengara ae mimitong [taraa Taian Areru 116:15; Aramwa 42:8]. Ara iango ma ara mwakuri [n te maiu ae mamate] a na bon rangi ni manena riki ngkana ti atai ana babaire te Atua ao ni kakaitau nako iai man ongeaba nakon Ana tua” [taraa Reirei ao Berita aika Tabu 59:20-21].”
Aran taian Babaire n ana Boki Moomon
Ti reiakina taekan te koaua man kinaakin ao kamatebwaian ana babaire Tamara are i Karawa n ana Boki Moomon: Kakoauan Taekan Iesu Kristo. Te katooto, iangoi, atuun rongorongo n taian katooto aika tia n rineaki aikai:
“Ana babaire n nanoanga te Tia Karikibwai ae kakannato” (2 Nibwaai 9:6).
“Ana babaire Atuara” (2 Nibwaai 9:13).
“Te babaire ni kamaiu” (Iarom 1:2; Aramwa 24:14).
“Te babaire ni kabomwi” (Aramwa 12:25, 26, 30, 32, 33; 42:11, 13).
“Te babaire ibukin kaokan bwaai” (Aramwa 41:2).
“Te babaire ibukin te kukurei” (Aramwa 42:16).
“Te babaire n nanoanga” (Aramwa 42:31).
A buokira atuun rongorongo aikai n kamatatai riki ana berita aika kakawaki Tamara are i Karawa ao nikaraababai ara taratara ibukin te aroaro i aon te aba.
Te atuu n rongorongo, are rangi ni kakabonganaki n ana babaire te Atua n ana Boki Moomon e bon boboto i aon taekan te kamaiuaki are reke man ana Mwakuri ni Kamaiu Iesu Kristo.
E taku Aramwa, “Ngaia are, ngke arona bwa akea te babaire ibukin te kaboaki, are e kaweneaki man moan katean te aonaba, e na bon akea mangautiia maate; ma iai te babaire ni kabomwi are e kaweneaki, are e na kakoroa bukin mangautiia maate” (Aramwa 12:25).
E taekinna naba, “Moanna ni kakoaua Natin te Atua, bwa e na roko ni kabooia ana botanaomata, ao bwa e na maraki ma ni mate bwa e na karaoa te mwakuri ni kamaiu ibukin aia bure; ao bwa e na mangauti riki man te mate, ae e na kakoroa bukin te mangauti, bwa aomata ni kabane a na tei i matana, bwa a na motikaki taekaia n te kabanea ni bong ni motikitaeka, ni kaineti ma aia mwakuri.” (Aramwa 33:22).
E Tauraoi te Kawai
E na rikirake te kakaitau i nanora ngkana ti kina ni koaua ana babaire ni kamaiu te Atua, te kamaiuaki, kaokan bwaai, te nanoanga, ao te kukurei. Ara atatai iaon Ana babaire e bon kanakoraoa ara taratara, kabatia kimwareireira, ao ni kakorakoraira bwa ti na tokanikai iaon kangaanga ma kakawaenako.
E tangiria Tamara are i Karawa bwa ti na okiria. E anoira ao ni kakabwaiaira, E aki taumatoaira, imanonoira, ke ni kataia n anaa inaomata n rinerine are E a tia n anganiira. Ti riai ni mwakuriia ao n rineia bwa ti na okiria man irirakin ana banna ni katooto Natina ae Tangiraki.
E Tauraoi Baina n Tainako, iroun Elizabeth Thayer
“E katauraoa te kawai ao, ngkana ti taraia ao ti maiu n aki toki” (Aramwa 37:46; kaairaki katuruturuana).
I kakoaua ma te kimwareirei bwa Tamara are i Karawa bon ngaia ae korea taekan te babaire ae moan te kakanato ibukiia Natina. Iesu Kristo bon ara Tia Kamaiu ao te Tia Kabooira. Ngkai ngai temanna ana Abotoro te Uea ni boong aika kaitira, I kakoaua bwa bon Ngaia “te kawai, te koaua, ao te maiu” (Ioane 14:6; kairaki ma kabwarabwarana).