Ukoukoran Kristo ao Berita aika Tabu: Ana Kawai Nibwaai ni Warekan Te O Tetemanti
E tibwai iango NIbwaai tabeua ake a kona n ibuobuoki nakoim n am kamatebwai.
Tamnein Kristo, iroun Heinrich Hofmann, ana bwai n tangira C. Harrison Conroy Co., Inc.
I tatangiria ni Wareka te O Tetemanti. N ririki aika a bati, I a tia ni kunei kawai aika uoua n taratarai n te O Tetemanti ake a na uota te kakukurei ao ni karakaa te atatai: Kristo ao ana berita aika a tabu.
Aikai kawai tabeua ake ko kona ni kunea iai Kristo ao berita aika a tabu inanon ara kamatebwai n te O Tetemanti n te ririki aei.
Ukoukoran Kristo
Nibwaai, are e wareki koroboki aika a tabu man te bwaatua aika buraati, ao e taku, “Taraia, e kukurei tamneiu ni kakoaua nakoia au botanaomata koauan rokon Kristo; bwa bon ibukin aio are e anga iai ana tua Mote; ao bwaai ni kabane ake a tia n anganaki aomata iroun te Atua man ni moan karikan aonaba, bon taian kanikina ibukina” (2 Nibwaai 11:4).
Ti kona ni kunea Iesu Kristo inanon te O Tetemanti n aro aika a mwati.
Moses and the Brass Serpent[Mote ao te Naeta ae te Buraati], iroun Judith A. Mehr; Christ on the Cross[Kristo iaon te Kaibangaki], iroun Carl Heinrich Bloch
Atuan te O Tetemanti
Ibukina bwa ti ataia rinanon kaotioti n taai aikai bwa Iesu Kristo bon te Atua n te O Tetemanti (taraa Reirei ao Berita aika Tabu 110:3–4), ti kona n noora Mwaakana inanon te Karikibwai ao ngke e Anga tua iaon te Maunga are Tinai n reieina Iteraera aroia n riki n ai aron te Atua. Ti noora Ana nanoanga ni kaboakiia man te tauronaki i Aikubita, Ana tangira n ana tarara nakoia Ana aomata inanon te rereua ao kainaomatakiia nakon te aba ni berita ao reitinakon ana tabeaianga man kanakoan ana burabeti ao anganakiia kain Iteraera kabwaraan aia bure ngkai a rariri nanoia man aia bure.
Aekakin nako Iesu Kristo
A rangi ni mwaiti aekakin nako (ke bwaai ake a tei ibukin) Iesu Kristo inanon karakin te O Tetemanti, angiina ake a kaman taekina Rokona n aron are e koreaki n te Nu Tetemanti ao Ana Boki Moomon. Karakinan Aberaam ao Itaaka e a kaman kaota aron te Atua te Tama n anga Natina te mwaane, Iesu Kristo. E kamaiuia tarina Iotebwa man te baki n rabwata, n ai aron Iesu Kristo ae e kamaiuira man te baki n tamnei. E kainaomataia ana aomata Mote man te tautoronaki ngkai Iesu e kainaomataira man ara bure. E reireiniia natin Iteraera te Uea mwaakan onimakinana ao Ana Mwakuri ni Kamaiu ni karakinan te naeta ae te buraati n te rereua. A tei Eria ao Eritai ibukin te Tia Kamaiu ngkai a kamarurungiia aoraki ao a kateirakeia mate.
Abraham and Isaac[Aberaam ao Itaaka], iroun Harold Copping, © Look and Learn/Bridgeman Images
Kamatebwaian te Tia Kamaiu n aron are e taekinaki n te Nu Tetemanti
Karaki inanon te O Tetemanti ao Ana tua Mote a kaoti kanikina ibukin Iesu Kristo. Karakinan te Toa Are Te Riao ao te anga karea n ana tua Mote a kaineti nakon Kristo. Kaman taekinan ana mition Iesu, te burabeti n te O Tetemanti e kamarurungiia aoraki ao e kautiia mate. Rinanon te burabeti are Ieremia, e berita nakoira te Uea te “berita ae boou” (Ieremia 31:31; taraa naba kibu 32).
N te Nutetemanti, roko Iesu bwa kakoroan bukin te tua ao burabeti n te O Tetemanti. E anga te berita ae boou n te Kabwarabwara iaon te Maunga ao e katei kanikina n te berita n taina te Toa Are Te Riao n te Kabanea ni Katairiki. E reireiniira Iesu bwa ti na tatangira ao ni beku ibukiia tabeman ngkai E kamarurungiia aoraki ao e kautiia mate. E kabooira man te bure ao te mate rinanona Ana Mwakuri ni Kamaiu, ao E katea Ana Ekaretia iaon te aba. Ngkana ti kina Iesu bwa te Atua n te O Tetemanti, e na karikirakea riki ara atatai Ibukina n te Nu Tetemanti.
Ukoukoran Berita aika Tabu
E reireiniira naba NIbwaai bwa ti na taratarai berita inanon koroboki aika a tabu: “Ao e kukurei naba tamneiu n taian berita aika a tabu ake e a tia ni karaoi te Uea nakoia ara bakatibu;.” (2 Nibwaai 11:5).
E a tia naba ni katuruturua kakaawain te berita ae tabu Beretitenti Russell M. Nelson. E taku: “Kinaakim ae tamaroa bwa te tia kawakina te berita ae tabu bon teuana te nakoa ae ko kona ni karekea n te maiu aei. Kaniwanga n riki bwa te tia kawakin berita e na kinaaki ikai ao n are imwiina.”
Ai tamaroara te berita aio! Riki imwiin te bwabetito ao karaoan berita n te tembora, ti kona n aki atai kakaawakin berita aikai ni kona ni karekea te bitaki inanon maiura ni katoabong nakon ae tamaroa riki. Ma e kauringiira te O Tetemanti nanona ni koaua n riki bwa“aomatan te berita” ao ti na kanga ni matata riki ni kakabwaia ao tibwanga ake airi ma ngaia.
Te berita ae boboto iaon n te O Tetemanti bon ana berita Aberaam. Ti kona ni kunei koauan ana euangkerio Iesu Kristo inanon te berita aei, are e kairiiria nakon Iesu Kristo, are ngaia ae ti karekea te kamaiuaki mairouna.
Aikai tabeua kawai are e buokiira iai te O Tetemanti ni matata riki ao ni kawakin ara berita aika a tabu.
N atai Tibwangara n ana berita Aberaam
Ana berita Aberaam bon rinanin berita ao kakabwaia ake e anganaki Aberaam ake a reitinako ni karokoa boong aikai n “te berita naba ngkai ao ae akea tokina” kaokaki iroun te Burabeti Iotebwa Timiti (taraa Reirei ao Berita aika Tabu 132:30–31). E reirei Beretitenti Nelson:
E kaoti te Uea ni boong aika kaitira ni kabooua te berita nakon Aberaam. Nakon te Burabeti, Iotebwa Timiti, te Uea e kabwarabwaraa aio:
“‘E karekei berita Aberaam ni kaineti ma ana kariki, ao ni kaineti ma kanoana—are man kanoana ko riki mai iai, ngkoe, … au tia mwakuri ae Iotebwa. …
“‘Te berita aei bon ami bwai naba, ibukina bwa kam riki mai iroun Aberaam’ [Reirei ao Berita aika Tabu 132:30–31].”
Rinanon te berita ae tabu aei,e karaoi utu aika a tamaroa te Uea ike e kona iai n reirei Ana eungkerio ao n uotiia Natina nakon Iesu Kristo. E reireiniira te Abotoro Bauro bwa ngkana ti nakon Kristo, ti a riki bwa mwakoron ana utu Aberaam: Ao ngkana ana bwai Kristo ngkami, ao ana kariki naba Aberaam ngkami, ao tan ababa n ai aron te taeka n akoi” (I-Karaatia 3:29; taraa naba kibu 27). Rinanon ana berita Aberaam, a riki kain ana Ekaretia Iesu Kristo ibukiia Aika Itiaki ni Boong aika Kaitira bwa kain te bata are Iteraera ao a bwaibwai ni kakabwaia n ana berita Aberaam.
Ti kona n atai tibwangara n te berita man kamatebwaian maiuia naake n te O Tetemanti, man kamatebwaian berita ake e karaoi te Uea nakoia Natina n te tua, ao man ongorarairouia burabeti ake ngkoa ake a bubuti nakoia natin Iteraera bwa a na rairi nanoia ao n ongeaba nakon aia berita.
Kakakean Berita ake a taekinaki n te Berita Rinanon Ara Berita aika a Tabu
Ngkai ti wareka te O Tetemanti, ti kona n taratarai ana kanikina te Uea ake e taui te Uea ake a karaoaki n ana berita Aberaam. Kakabwaia aika teniua aika a rangi ni kakaawaki bon te aba, are e tei ibukin te bwaibwai n abanuean Tamara are i Karawa, te tabomoa, are te berita ni karakaan karikirakean arom ae akea tokina ao kakabwaia n te euangkerio ao te nakoanibonga, “ake bon taian kakabwaia ni kamaiu, are te maiu ae akea tokina” (Aberaam 2:11).
E anganaki te berita Aberaam bwa rinanon ana kariki “ana bane utun aomata ni kabwaia iroum” (Karikanbai 12:3). Aio nanona bwa Iesu Kristo e na roko nakon te aonaaba rinanon ana kariki Aberaam ao e na kakabwaia ni kabane botanaomata rinanon Ana Mwakuri ni Kamaiu ao Mangautina (taraa I-Karatia 3:16).
Kabwarabwara man Gethsemane[Ketetemwane], iroun J. Kirk Richards, e na aki katotongaki
Tera kakabwaia aika ko noori inanon maium ni boong aikai ibukin ana Berita Aberaam?
Te Tibwanga n Ikotakiia Iteraera
Ni kairaki ma kakabwaia, n riki bwa mwakoron ana berita Aberaam a kairaki ma aekakin nako katabeaki. Rinanon kamatebwaian te O Tetemanti, ti reiakina arora ni maeka nakon ara berita. Ngkai ana utu Aberaam, kain te Ekaretia a weteaki bwa a na ikotiia Iteraera. Ngke ti ira kaoan aia mwakuri mitinare, mwakuri n ibuobuoki, mwakuri n te tembora, nakoa n te Ekaretia, ao reireinakiia ao kaikawakiia ara utu, ti a ikoikotiia Iteraera man uotakiia tabeman ni kaniiaki nakon Kristo.
E reirei Beretitenti Nelson: “N te tai are ko karaoa iai te bwai teuana are buoka temanna—n iteran te rabuna ake uoua—ni karaoi berita aika tabu ma te Atua ao ni karekei aia otenanti ni bwabetito ao n te tembora aika kakawaki, ko buokia ni ikota te bata are Iteraera.”
Reiakinna n Tangira te O Tetemanti
N te ririki aei ngkai ko wareka te O Tetemanti ibukin ara Nakomai, Iriirai kamatebwai, ko kona n reiakinna n tangiri reirei ake inanona man iriirakin ana banna ni katotoo Nibwaai n taratarai botoniango aika uoua: Kristo ao berita aika tabu. Karaoan aei, e na karikirakea riki am atatai ibukin Iesu Kristo, Ana Mwakuri ni Kamaiu, ao Ana euangkerio. Ko kona naba n reiakina riki taekan te “berita nabangkai ao ae akea tokinat” ao tibwangam inanona n riki bwa ana reirei Kristo ao n riki bwakain te bata are Iteraera.
Rongorongon ao ana reirei te O Tetemanti e kona ni buokiira ni kakorakora riki ara reitaki ma te Tia Kamaiu ao ataakin ao kabaeakira nakon oin ara berita.