E Na Kairiirai te Uea

Iroun Axa Dennise Zárate, Tacna, Peru

Rinanon te onimaki, te ongeaba, te taotaonnano, ao te tataro, I reiakinna bwa N na aki maaku ibukin taai aika imwaaiu.

I ikawairake ibuakon te aneenene ao ni katobibiaki n te katangitang. Kanoan miiu ngke I uarereke bon te riki n tia anene. I moanna naba n tabeua taian kaboo n te anene. Ma n te tai teuana inanon maiu, I namakina te akea ngkana I iangoa ana kaantaninga te Atua ibukiu itinanikun kinaakiu ao kamoamoakiu irouia aomata.

Rikiraken ana euangkerio Iesu Kristo inanon maiu e buokai n karekea te onimaki inanon taai n nanououa. E a tia naba ni buokai n kaotaai bwa Tamau are i Karawa e tangirai bwa N na kabongana au taarena ae E a tia n anganai ni kaaniai Nakoina ao n Neboia.

E ngae ngke I kabwaraa nanou man miiu, I namakinna bwa I riai n reitinako n aneenene ao n kamatebwaia te katangitang.

Ngke 25 au ririki, e bane au reirei iaon te kateitei ao I tia naba ni kamatebwai rinanon te BYU-Pathway Worldwide ao te Brigham Young University-Idaho, are a buokai n katamaroa au konabwai n te Ingiriti.

Imwiina e a riki te bwai ae kamiimi.

I karekea te kakao bwa N na riki bwa te mitinare ibukin te katangitang n te Tabernacke Choir’s Global Participant Program. I aki ataia, ma bwaai ni kabane ake I a tia ni karaoi inanon tabeua te ririki e a tia ni buokai katauraoakiu ibukin raoi te tai aio. Te kakao aei bon te kaeka nakon au tataro ao nanou. Tamau are i Karawa e ataa tokina man te moan ao e anganai te kariaia bwa N na anene ma te Tabaenako Kuaea n Tembora Tikuea n te Okitobwa 2024 maungatabu ni kabuta.

Man te taneiai aei, I kona n kakoaua mwaakan kairiirara iroun te Tamnei ae Raoiroi, rinanon te taotaonakinnano, ao onimakinan te Atua bon iai bukina, e ngae ngkana ti aki oota ni bukina. Te kawai ae tawe e kona n aki oota n taainako, ma ti kona n iriira te Tia Kamaiu ma te onimaki bwa e aonga n roko n tokina mwanangara ae tamaroa ao n tokanikai ibukina E kairiira ni kamanoira nakon te tabo are ti riai ni mena iai.”

Ibukiia ake a ukera kawaia ake imwaia, a ataia bwa te Uea e a tia ni katauraoa te bwai ibukim ae riaon are ko kantaningaia. Ngkana ti Iriiria, ti na karekei ake E a tia ni katauraoi ibukira. Te kawai e na kona n aki oota n taainako, ao e nakobuaka te maiu, ma te Uea e teimatoa n mwakurii taian kakai ibukiia Natina.

I a tia n reiakinna bwa rinanon te onimaki, ongeaba, taotaonannano, ao te tataro, e na kairiirai te Uea.