Te Kakaonimaki ao Burabeti—Ngkoa ao Ngkai

Ni koauana, e kataia Tatan n urua te nanomwaaka are mena irouia burabeti ma abotoro. E ngae n anne, ao e teimatoa n tiku rongorongoia bwa taan kakoaua aika a onoti ibukin aran Iesu Kristo ni kabuta te aba (taraa Reirei ao Berita aika Tabu 107:23).

Ni boong aikai, e kataaki ni buakanaki te bwai are aranna Beretitenti Russell M. Nelson bwa “te bwai ae te moan kakawaki i aon te aba n te bong aei,” ikoikotaia Iteraera, e riai bwa e na karaoaki imwain Kauaokin Iesu Kristo. A taui kiingin te ikoikotaki aei burabeti ma abotoro. Ma, a teimatoa ni kaitibo ma te kakaitara.

Tao n taai akekei ke ngkai, e teimatoa Tatan ni kunei aanga ni mwamwanaia natin te Atua n te berita nakon kaitaraakiia ana Abotoro te Tibutetei, ngkoa ao ngkai (taraa 1 Nibwaai 11:34-36).

Aikai nimaua reirei aika kona ni buokira man ana kabwakabwaka Tatan.

Onimaki iroun te Uea Iesu Kristo

Te moan bon titebo raoi ma ana moan reirei te euangkerio: te onimaki iroun te Uea ae Iesu Kristo ao Ana Mwakuri ni Kamaiu.

Te Onimaki e kaoti kawai. E reireiniira Beretitenti Jeffrey R. Holland, Bonomwi ni Beretitenti man te Kooram n Abotoro n te Tengaun ma Uoman bwa ara onimaki e bon katauraoa kawaira nakon are imwiina.

Ngkai e tabe n rikirake ara onimaki ma ara koaua iroun te Atua, ti na “taratara ma te mata n onimaki ao te kantaninga” Aia berita a koro nanoia (taraa Aramwa 5:15; taraa naba Motiaea 18:21; Aramwa 32:40). N tain bukamaruan ana 40 n ririki te “Be One” are bon te kaotioti i aon te Nakoanibonga are reke n 1978, Beretitenti Dallin H. Oaks, te Moan Kauntira n te Moan Beretitentii, e kaoia aomata ni kabane bwa “ti na kamatoaira n ara onimaki ao ara koaua n ana berita te Uea [taraa 2 Nibwaai 26:33].”

Te tuatua aio e bon kaineti ma kakoroan nanon ana berita Beretitenti Nelson are inanon naba te tai aio ae “te rau ae kororaoi ao te mweraoi” ao e na roko te bong, n aron are reireia, Beretitenti Henry B. Eyring, Kauoman ni Kauntira n te Moan Beretitentii, “E oki ara Uea ae Iehova ao ni maeka ma ana aomata ake a ikoikotaki, bwa ti teuana nanoia, ma Nanona ao nanon Tamara are i Karawa.”

E mataata, bwa Tatan e ukora kamatoatoan nanoia natin te Atua bwa a aonga n mataki, n tiku n aroia ni kawai, aia koaua, ke aia reirei—ao riki naake a nanokokoraki irouia burabeti ma abotoro. Bwa “e teweaki rio te tia bukina tarira … ni ngaina ao ni bong” (Te Kaotioti 12:10), e kabuakakaia ana burabeti ma ana abotoro te Atua ma aia reirei. E urua aron te onimaki ma taan kakoaua, Iesu Kristo—bon ana taakete.

Te ikoikotaki, te rau, mai irouia burabeti n taai aikai a katerea raoi bwa ngkai e kawanawana Tatan ni kakaitara ao n uruana te ikoikotaki, aio te tai ibukiia ni kabane natin te Atua (taraa 1 Nibwaai 11:34-36) n ikotiia ni kamatoai ao n mwakurii koaua ae e kaoti te Atua rinanoia Ana burabeti ma abotoro. Man karaoan aei, ti kona n bootaki, ni kukurei, ni korakora, ni karaoi berita, n onimaki ao n aki taraa te reeti teuana ma teuana, rikin temanna, abana, ke baika a na karekea te nakobuaka.

Aia reirei burabeti ma abotoro e bon karekea te nano teuana ao te onimaki iroun Iesu Kristo, ae na teimatoa ni buokiira ni waaki nako.

N noorakin ara bong aikai, E reirei Moronaai arora bwa ti na aki kaitaraia burabeti ma abotoro; te reirei i aon te aki kabuakaka ke ni motikitaeka.

“Tai kabuakakai ibukin au aki kororaoi,” e taku Moronaai, “ao tamau naba, ibukin ana aki kororaoi, ao teuare e koroboki naba ma i mwaaina; ma karabwarabwa nakon te Atua bwa e a tia ni kaota ara aki kororaoi nakoimi, bwa kam aonga n reireinaki riki bwa kam na wanawana nakoira” (Moomon 9:31; kairaki ma kabwarabwarana).

N rairana teuana, ti kabotoa reireiara man aia reirei burabeti ao abotoro ao ni kakaoaua Kristo ma Ana euangkerio ao n toki man taraakin taian kabwaka. Inanon te rongorongo, E kaoti kabwakara aikai te Atua nakoira bon ibukin rakara ao ni buokira n ata ae riai ao ni wanawana. I karabwarabwa ngkai e karaoa aei.

Ma, e riai te taratara raoi. N te maungatabu ni kabuta Eberi 2019, e marooro Beretitenti Eyring iaon ana reirei Beretitenti George Q. Cannon (1827–1901), Moan Kauntira n te Moan Beretitentii: “E rineia ana toro te Atua. E anaia bwa inaomatana ni kabuakakaia ngkana a riai ni kabuakakaaki. E aki anganiira te inaomata n tatabemaniira n tiribureiia ke ni kabuakakaiia. Akea te mwaane, n aki tabe bwa korakorara ana onimaki, n aki tabe bwa tera nakoana ma kariaiakana are e karekea n te nakoanibonga, e konaa ni kabuakaka are e a tia ni kabiria te Uea ao n tiriburea ana kariaia te Atua iaon te aba ao n aki karika Aki kukureina. E na nako te Tamnei ae Raoiroi mairoun te mwaane anne, ao e na rinnako i nanon te rootongitong. Ngkana e riki aio, ko aki noora kakawakina bwa ti na riai n taratara raoi?”

Ngkoe ma ngai iai iroura ana kakabwaia te Uea ao te mwioko ibukin taian taetae ao mwakuri ni burabeti, ni ikotaki ma ake ti kunei bwa ti kangaanga ni kabwaranakoa ke ni butimwaei:

“E tuatua bwa ti na ongo nakon ana taeka ni kabane ao ana tua ni kabane are e na anganiko ngkana a reke irouna, n nakonako n taabo aika tabu i matau;

“Bwa ana taeka kam na karekei, n aron ae bon man oin wiiu, ma te taotaonakin nano ao te onimaki ni kabanea” (Reirei ao Berita aika Tabu 21:4-5; kairaki ma kabwarabwarana).

Eng, ti riai n aki kabuakaka ke ni motiki taeka (taraa Mataio 7:1-2). I namakinna bwa e raka te kakabwaia, ngkai I tabe ni waaki nako ma te onimaki iroun Iesu Kristo ao ni kakaitau ibukin kakabwaia ake a reke mai irouia burabeti ao abotoro (taraa Reirei ao Berita aika Tabu 21:6).

Te reirei riki nakoira teuana bwa ti na aki riaon te kariaiakaki are iroura ao ni karaoi mwakuri aika tiaki tabera. A na kona ni kairiira iango aikai nakon kamoamoakin oin ara iango, ao e riki aei ngkana ti aki mwannanoi aia reirei burabeti ma abotoro. Ngkana ti kabuakakaia burabeti ma abotoro, ake ngkoa ao ngkai, ao e oota bwa ti riaon te kariaiakaki are iroura, ngkai te Uea e taua te konabwai aio bon Ibukina. I kamatoa n taekinna bwa ara Tia Kamaiu ae ataibwai, ae tatangira, ao n nanoanga e a tia n tarai ao n tauraoi n kabwarai ara kairua ma buakakara ake ngkoa, ao ni kantaningaia bwa e na karaoia naba n te tai aei.

Teuana riki te katooto ibukin riaoakin te kariaiakaki are iroura bon kairaia burabeti ma abotoro iaon baika e na karaoi te Ekaretia ke aron te tautaeka iaona. Anne bon taben te Uea, ma ti aki ngaira (taraa Reirei ao Berita aika Tabu 28: 2–7). E ngae ngkana a raraoi ara kantaninga, ma kabuakakakiia ao kairakiia burabeti ma abotoro a reke man te kainikatonga ao ni kairiira nakon te mwamwanaaki ao te rawa n ongo n aia tuatua burabeti.

Man 1820 ni karokoa ngkai, e teimatoa te Uea n reireiniia Ana burabeti, taan mamata, ao taan kaotioti n angana ae riai n aron kairan Ana Ekaretia.

E reirei Beretitenti Nelson:

“Ngkana ti booti tabera n ana Kauntira te Moan Beretitentii ao te Kooram n te Tengaun ma Uoman, ara ruu ni bootaki a riki bwa ruu ni kaotioti. Te Tamnei ae Raoiroi e kai kanamakinaki. … E ngae ngke ti kaokoro n ara taratara n te moan waaki, ara tangira i bon imarenara e teimatoa. E buokiira katiteuanakira ni kinaa ana kantaninga te Uea ibukin Ana Ekaretia.

“Inanon ara boowi, e aki kona n tautaeka te kabanea ni korakora ni mwaiti! Ti tataro mwaaka ni kakauongo ao n taetae i marenara ni karokoa ti katiteuanaki.”

Unimwaane D. Todd Christofferson man te Kooram n Abotoro ake Tengaun ma Uoman: “Te boto ni iango tiaki man te boraraoi i buakoia membwa n te kauntira ma te kaotioti mairoun te Atua. Bon te waaki ae a kaai n irekereke iai te konabwai n iango/babaire ao te onimaki ibukin karekean ana iango ao nanon te Uea.”

Te reirei ibukin te kamanomano ae e a tia ni kaokaki ao ni karokoraoaki aio, e anganiira te nanoraoi n aia konabwai ara taan kairiiri ni waakina te Ekaretia nakon nanon te Uea.

Ao eng, Iesu Kristo E tei bwa atuun te Ekaeretia aei, ao E kairiia Ana burabeti. Tera baika ti tatarai bwa kabwakaia n aia taetae ke n aia mwakuri, ni koauana, a kaota kabwakara i bon iroura n ara taratara ao n ara wanawana n aomata ae memeere. Uringnga bwa e rietaata riki ana kawai te Uea nakoira ao a bon ririeta ana iango nakoira (taraa Itaia 55:8-9) e anganiira te kona n aki motika taekaia burabeti ake ngkai, ao ake n rimoa. E na bon buokiira te nanorinano bwa tina tou mwiin aia taeka ara burabeti aika maiu “ma te tataonakin nano ao te onimaki ni kabanea”(Reirei ao Berita aika Tabu 21:5; taraa naba 1:28).

E buokiira naba ni karekea oin ara kaotioti, kaantaninga, ao te onimaki iroun Kristo n te aonaba ae raka mangaongaona. E reirei Iakoba, “Ti ukoukori kanoan aia taeka burabeti, ao a mwaiti kaotioti ma tamnein taeka ni burabeti; ao n nooran kakoaua aikai ao e reke iroura te kaantaninga, ao a aki kai kamwaeaki ara onimaki” (Iakoba 4:6). Ngkana ti karinanoira, ti na kona n kaakea mai iroura te nano ni kan ukeukera te kairua nakoia burabeti ma abotoro, ni ikotaki ma ake n rimoa (taraa Reirei ao Berita aika Tabu 88:124; 136:23). E buokiira te nanorinano n “ukoriia burabeti” ao koaua ake ana karikirakea kukureira ao te rau ao n aki tarai kabwaka.

Ao mai ikanne, I kaota au koaua ma te tangira bwa burabeti ni moa mai iroun Iotebwa Timiti ni karokoa ngkai bon ana burabeti te Atua i nanon te rain ae reitinako ni uouota te kariaiakaki nakon ao n raonaki ma Beretitenti Russell M. Nelson. Bon te kakabwaia irou “ukoukoraia burabeti” ao ni kaniaki ma te Atua rinanon ana reirei n tatabemaniia nako.

I kaota au koaua bwa naake a weteaki nakon te nakoa n abotoro ae tabu iaan aia kairiiri burabeti aikai bon taan kakoaua aika kakaawaki ibukin aran Iesu Kristo ni kabuta te aonaba. Ai tamaroara te waaki nako ma Iesu Kristo rinanon aia reirei taan kakoaua aikai.