I Tataro i Nanou

Kamataata n te korotamnei iroun Allen Garns

Ngke I reirei n te moan rinan, e aki toki tinau n anganganai au katawanou, e aroka ramwau, ao n taku, “Kabanea am kona n te bong aei, ao uringnga n tataro i nanom.” E aki toki n tataekina aio nakoiu ni katoa moaningabong, ni karokoa I a rin n te kauarinan.

Ana kabanea n tai n taekina, “tataro i nanom” ngke N nang toka i aon te wanikiba ao ni kitanna inanon uoua te ririki ibukin karaoan au mition i Florida. E a manrea i taningau n ana taeka anne ma I bon aki nang mwannanoia raoi n au tai n ikawairake. Tao ngai irou bon te bwai ae rang tataekinaki n ana roro n aron te taeka ae, “E na tekeraoi am bong.”

N au tai ni mwakuri ni mitinare i Miami, Florida, USA, I reiakina tabeua te taetae n Spanish. I kunea bwa a mwaiti raoraora aika boou, mai Cuba ao Puerto Rico, ae bon ti te arona ma tinau. A aki toki ni kakatekeraoira utu ake ti kakawaria ngkana ti kiitaniia: “Vaya con Dios” (E raoniko te Atua).

Ngke I a mataata raoi n te bwai are e aki toki n tataekinna tinau nakoiu, ao I a moanna n kakaei aanga aika N na kona iai ni bon tataro i nanou ma te koaua. E onrake nanou n te kakaitau nakon Tamau are i Karawa ao Natina, Iesu Kristo, ngkai I a karaoia. I namakina te raka ni korakora i nanon au tai ni kataaki ao n rawawata. I namakina aia tangira au karo ao ni karabwarabwa n aia tai are a tia n anganai.

N te bong teuana ao I wareka rongorongon te Tia Kamaiu ngke e kawaria Nibwaite i mwiin Mangautina. N ana kauabong n roko, “e tua nakoia ana reirei bwa a riai n tataro.” E tataro te Tia Kamaiu, irarikiia, ao n taekin taeka aika “korakora man tamaroa”. Ngke e tia, Ao e tuangiia aomata aika uanao “bwa a na aki toki n tataro inanoia” (3 Nibwaai 19:17, 34; 20:1).

Arora ni karaoa aio bon katamneian te tataro bwa kanga ai aron te kai n tamnei are kabonganaki ibukin kawakinan ao katekean te tamnei, ae otabwaninii ara waaki ni katoa bong. Te kain tataro anne, ni kairaki ma te tangira ao te kakaitau, e buokiira ni kabotoa ara taratara i aon te Tia Kamaiu ao ni kawakin ara berita.

I kakaitaua ibukin ana reirei tinau ni katoabong “bwa N na aki toki n tataro” i nanou. E a tia ni karekea te bitaki ae korakora ni maiu.