Aki Bua iroun te Tia Kamaiu

Te kamataata n te tamnei iroun Allen Garns, ma te kariaiakaki n kaota ana korobanna Del Parson The Lost Lamb

A baireia temanna kain au utu ma kainabana bwa ana kitana te Ekaretia, n raonaki ma natiia ake a uarereke. Te rongorongo ae kauruaki nano ibukin ara utu. I nanon wiiki ake i mwiina, ti kataia n kunea te taneiai ae boou.

A onrake boong ake imwiin aia katanoata n te rawawata, te tang, ao te tataro mwaaka nakon Tamara are i Karawa. Teuana kaekaan au tataro ae tawe n roko bon ae I kainnanoia n nebonebo n te tembora ni katoa wiiki. Ngkai ataei te reirei ao te buu ma te tina ae mwakuri ngai, I kunea bwa e rawawata te kaeka aei, ma I iangoia bwa N na ongotaeka nakon te wirikiriki aei.

Te tairiki teuana imwiin au tei ae rangi n rawawata, e korakora namakinana irou bwa N na nakon te tembora n te tairiki anne. I butiia natiu te mwaane bwa e na raonai ni karaoi mwakuri n te tembora.

Ngke ti roko n te tembora, a maenako kawaira. Ngke I karaoi mwakuri n onomwi ibukiia tabeman titita ao n ongora nakon aia kakabwaia ake a beritanaki, I rootaki n te namakin. I aki kona n kanakoa taekaia au utu ake a tionako man au iango.

Ngke I tia, I oneai, ao n kaea te ruu n tataninga, ao n tekateka. E aki maan, ma, I namakinna bwa N na riai n bita au tabo n tekateka bwa I aonga n nora natiu te mwaane ngkana e otinako man aia ruu n onoono mwaane.

I mwaing ma I aki rauaki n taabo ake I tekateka iai—ni kakoroa I a tekateka i aon te kaintekateka ae kaitaraa te oo irarikin mataroan te tembora n otinako. I a tibwa tabeki koroboki aika tabu, ni kataia n karaua nanou ae aki rau, ngke I a tararake n taraa te oo are kaitarai.

Ikanne, I noora tamnein te Tia Kamaiu ae bubura n taua te tiibu te teei i Baina. E waekoa te Tamnei ni kauringai bwa e ngae ngkai I namakinna ae a bua kain au utu aika tangiraki irou, aki bua iroun ara Tia Kamaiu.

“Antai i buakomi ae tebubua ana tiibu, ngkana e bua temanna mai buakoia, ao e na aki kitania ake ruangaun ma ruaman n te rereua n ukoukora are bua, ni karokoa rekena?

“Ao ngkana e reke , ao e a aonangaia, ni kimareirei.” (Ruka 15:4–5).

Ti reitinako n tangiriia man tataro ibukiia ake a tionako. Ma ngkana e taonai te nanokawaki, I uringa au taneiai aei, ni kaantaningaia bwa n te bong teuana, naake a bua ana kunea kawaia n oki man ana ibuobuoki te Tia Kamaiu ae tatangira.