“Kamanoaki n Ana Euangkerio Iesu Kristo ae Kaokaki,” Riaona, Tianuare. 2026.
Aine n te Berita ae Tabu
Kamanoaki n Ana Euangkerio Iesu Kristo ae Kaokaki
Te kawai n okira te Atua e kaotaki ngkana iai ara onimaki ao onimakinan ara Tia Kamaiu.
Man anuara ao aroaroa ni kabwaka n te maiu ae mamate, ti bane ni kona n raroa nako mairoun te Atua are ti kinaa man tangiria inanon maiura imwain te maiu n rabwata. Bon te anua n rabwata. Ao n anne, E a tia n anganiira kawai aika ana kateimatoaa atinroora Irouna, n kabaei nanora Nakoina ,ao n buokiira n kamanoira inanon mwamwanangara inanon marae ni bwaura n te maiu ae mamate aei.
Inanon taian buaka aika korakora, taanga n buaka a karabai bwaura, ke bwaai aika kona n rebwetau iaan te tano. Iai marae aika bubura ake a karabaaki iai bwaura, ao a kona n aki ataia taanga ni buaka ao a rinanon marae ni bwaura aikai ao n rebwetaua.
Imwiin taian buaka, ngaa mwaitin bwaura ake a tuai rebwe ake a tiku, ao a mwaiti aomata, n raonaki ma ataei, ake a bua maiuia ke bwain rabwataia ngkana aki ataibwai ao a rinnakoi marae n bwaura. A tia rabwata n ibuobuoki ake a tabe ma katarataraan ma mwakenan nnen bwaura aikai n taian maraeni kamaiuia aika mwaiti.
Te maiu ae mamate kanga ai aron te marae n bwaura. E rangi n rabakau te tia kakaitara n bitii taraakin bwaai aika kakamaaku bwa ana tara n aki kakamaaku ao n katikinano, n ai aron te marae ae tamaroa. Irangaa ana ririki n taneiai ni kakaraoa aei. Bon te tia rabakau ni karaoi kawai aika anainano are a na kairiira nakon mwiia aika kakamaaku ke ni kauruakinano.
Kairaki ni Kamanoaki nakon te Mweenga
E ataa aron kamanoara Tamara are i Karawa ao n tia ni mwakena te kawai are ena kairiira inanon te kamanoaki n okira mwengara. Eng, e bon bati kakamaaku ma kangaanga aika mwakoron ara taneiai ni maiura ae mamate. Ma ti kona n kararoai rinerine aika ana uota te rawawata ma te uruakinnano ae akea nanoia.
Ngaia anne bukina ngkai e a tia Tamara n anganiira tuua, ana bwaintituaraoi te Tamnei ae Raoiroi, burabeti bwa ana kairiira, ao reitaki aika korakora inanon te berita ae tabu ma Ngaia ao ara Tia Kamaiu rinanon otenati n te tembora ao berita aika tabu. Bon ti n ana Ekaretia Iesu Kristo ae e a tia ni kaokaki ae ti kona ni karekei mwaake aika korakora ao bwaai ni kamanomano ake ana kairiira inanon te kamanoaki n okira mwengara.
E mwaiti kakabwaia aika korakora n reke ngkai iai burabeti ni boong aikai. Beretitenti Hugh B. Brown (1883–d1975), te kauntira ngkoa n te Moan Beretitentii, e karakina ana marooro ma temanna te membwa n te British House of Commons ae te tia moti ngkoa. E taku te mwaane aio bwa e tuai man taetae te Atua nakoia aomata iaon te aba moa man te moan tienture, ao Beretitenti Brown e kaeka ni kabwarabwaraa nakoina taekan Iotebwa Timiti ao Kaokan Bwaai.
“E tekateka ni kakauongo raoi te tia moti aei” e taekinna Beretitenti Brown. “E kanakoi tabeua ana titiraki ni kakaae, ao n tokin te intawiu e taku, ‘Mr. Brown, I tabe n iangoia ngkana ami koraki a ataa kakawakin am rongorongo. Ngkoe ko ataia?… Ngkana te koaua te bwai ae ko a tia n tuangai, ao bon te rongorongo ae korakora ae e a tia n kaoti i aon te aba imwiin te tai are anera a katanoata bungiakin Kristo.’”
E weteia burabeti te Atua bukina bwa E tangiriia Natina. Rinanoia Ana toro, burabeti, E a tia ni kaota Ana babaire ni kamaiu, Ana babaire ni kakukurei ibukin kairaia Natina. E kaotia te Uea nakoia burabeti, taan mamata, ao taan karekei kaotioti bwaai aika akea aika kona n noraki irouia tabeman. Bon taan tantani iaon te taua (taraa Etekiera 33:1–7) ake a kona n noora ae raroa nako ao ni katang buu ni kauring nakoia ake a na ongora, n tainako iraua te ririki imwain rikina. Iai rakan aia taratara ae akea iroura bukina bwa a reitaki ma te Atua bwa Ana toro ae iai te kariaiakaki irouia. E kakawaki bwa ti na karekei oin ara kakoaua aika a nano irouia ara burabeti, taan mamata, ao taan karekei kaotioti.
Te koaua iroun Iesu Kristo
E a rikirake ni kangaanga ataakin ae koaua n ara aonaaba n boong aikai. A mwaiti bwanaa aika a roko man taabo nako—Instagram, TikTok, Facebook, X, podcasts, cable news, ao a mwaiti riki. Ao ngkai ma rabakau aika karioaki, ke AI, aika a kona nooraki ngkai, e a bon kangaanga riki ataakina bwa enga ae koaua ao ae e aki—ke ae bon koaua! Witeo aika a kewe man kamwamwane a kona ni kaota te bwai ae taekinna te aomata ke ni karaoia ma a bon aki karaoia. E na rikirake riki ni kangaanga ataakin te koaua man te kewe i nanon ririki aika ana roko.
Inanon ana moan maungatabu bwa te Beretitenti n te Ekaretia n Eberi 2018, E reireiniira Beretitenti Russell M. Nelson:
“I kantaningai bwaai aika raraoi n taai aika a na roko. … Ma I aki atai boong aika i mwaira. Ti maeka n te aonaaba ae kaangaanga ao n rikirake te kakauntaeka iai. Teimatoan tauraoin bwaai n reitaki ma 24 te aoa okiokin rongorongo ake a taonira nako ma rongorongo ake aki toki rorokoia. Ngkana ti na karekea te kantaninga ni ukoukora te bwai ae kakawaki ma iango aika mwaiti ao aia ataibwai aomata ake a buakan koaua, ti riai n reirei aron karekean te kaototi.
“Ara Tia Kamaiu ao te Tia Kabooi maiura, Iesu Kristo, e na karaoi tabeua Ana mwakuri aika mimitong imarenan ngkai ao n te kauaoki. Ti na noori kaotan kakai ae te Atua te Tama ao Ana Rikitemanna, Iesu Kristo, e tararua te Ekaretia aei inanon te kakannato ao te mimitong. Ma i nanon boong aika imwaira, e na bon aki kona ni kamaiuaki n te tamnei n akean ana kairi, ana kaetieti, ao ana kairoro ni karaunano te Tamnei ae Raoiroi. …
“… I bubuti ngkami bwa kam na kakorakorai ami konabwai n tamnei ni karekea te kaotioti. … Rineia ni karaoa te mwakuri ae kainnanoaki ni karekea ana bwaintituaraoi te Tamnei ae Raoiroi ao n ongo nakon bwanaan te Tamnei n tainako ao n ae e itiaki riki.”
N te O Tetemanti n ana boki Amota 3:7 ti wareka ae kangai, ““E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti.” Ngkai a rikirake tangin bwanaan te aonaaba ao n anainano, ti riai n tatabemaniira ni kona n ongo bwanaan te Tamnei ae amarau n taainako ao ni mataata bwa ti aonga n ongo man ira ana kairi te Uea rinanoia burabeti aika maiu.
E Tangiriia Natina Ni Kabane te Atua
N te Nu Tetemanti ma Ana Boki Moomon, ti warekia bwa te Atua titebo ngaia ngkoananoa, n te bong aio, ao n aki toki (taraa Ebera 13:18; Moomon 9:9). E tangiriia natina te Atua n boong aikai n aron raoi tangiraia Natina n boong ake n rimoa, ao bukina bwa E tangiriia Natina, E karaoa ngkai are E karaoia naba ngkoa. E mwakenii marae n bwaura n te maiu aei ma tuua aika ana kateimatoaira iaon kawai aika mano; burabeti a kanakoi bwanaaia n kauring ngkai a nori kangaanga imwaira; ao berita n te nakoanibonga ake a reitiira riki nakon te Atua.
Ngkai ti katuka ara onimaki iroun te Tia Kamaiu ao n Onimakinna, E na kairiira inanon te mano n okira mwengara rinanon ana wirikiriki te Tamnei ae Raoiroi; rinanon koroboki aika tabu n rimoa ao n boong aikai; rinanon bwanaaia burabeti, taan mamata, ao taan karekei kaotioti n boong aikai; ao rinanon reitaki aika nano ma Ngaia ao Tamara are i Karawa ae a reke rinanon otenanti ma berita aika tabu n te tembora.
Akea riki te tabo ae iai te kairiri ma te kairi iai ae takaburinako, ae mano man kamanoaki, te kabebeteaki, te raunnano, ao te kaantaninga iroun Kristo nakon ikai n ana euangkerio Iesu Kristo are e kaokaki ao Ana Ekaretia are e a tia naba ni kaokaki.