Mi Bin Fraet Tumas blong Toktok long Bisop blong Mi—?Bae Hem I Tingting long Mi Olsem Wanem?

Fastaem, mi no kea nomo. Mi luk ol rul blong Jos olsem se oli strik. Mi stap gohed blong go long jos be dip insaed long mi, mi filim se mi no klin inaf mo mi stop blong tekem sakramen blong sam manis.

Afta KOVID-19 i kam, i stopem evri samting we mi wantem stap mekem long laef blong mi. Long semmak taem ia mi lanem wan samting we i mekem mi sek bigwan: Oli adoptem mi. Papa mo mama blong mi tufala i neva talem long mi, mo mi go tru long wan taem we tingting i trabol smol long saed blong aedentiti blong mi.

Mi filim se mi stap longwe long evri samting we mi bin bilivim long wan taem. Mi save se mi nidim blong faenemaot huia stret nao mi bakegen. Long en, taem mi gobak kasem hom mi toktok stret long papa mo mama blong mi abaot evri samting—we i tekem tu, ol joes we mi bin stap mekem. Oli ansa long mi wetem lav be oli no singaot strong long mi. Tufala i rimaenem mi long huia mi tru: pikinini boe blong tufala mo pikinini blong God we Hem i lavem mi tumas.

Mi wantem blong jenis. Papa mo mama blong mi tufala i leftemap tingting blong mi blog toktok long bisop blong mi, statem proses blong fasin blong sakem sin mo dipen long paoa blong Sevya blong pemaot man.

!Be mi fraet tumas! Mi wari se bae oli panisim mi o jajem mi from ol joes blong mi. Oltaem mi no wari long wanem we ol pipol oli tingting long mi, be bisop blong mi i wan gudfala man tumas, mo mi no wantem mekem hem i harem nogud taem bae mi talem wanem we mi bin mekem.

Be olsem we Elda Scott D. Whiting blong Olgeta Seventi i bin tijim se: “Yu no haed long olgeta we bae oli lavem mo sapotem yu; be yu ron i go long olgeta. Ol gudfala bisop, ol branj presiden, mo ol lida oli save helpem yu kasem hiling paoa blong Atonmen blong Jisas Kraes.”

Ol Bisop “oli holem ol prishud ki blong ripresentem Lod blong stap helpem ol memba blong Jos blong sakem sin.” Evri filing we mi filim insaed long ofis blong bisop blong mi i bin kamfot be i no ol strong toktok blong jajmen taem mi bin toktok wetem hem. Mi luksave se Lod i trastem hem blong helpem mi, mo mi filim se mi save trastem hem tu.

Bisop blong mi i leftemap tingting blong mi blong lanem abaot Sevya mo Atonmen blong Hem taem bae mi stap bildimap ol evri dei fasin blong mi long saed blong spirit. Oltaem mi mit wetem bisop blong mi mo singaotem mi evri wik blong jekem mi. Mi filim plante lav taem mi toktok wetem hem.

Long en, wetem help blong bisop blong mi, mi stopem ol rong samting we mi stap mekem long laef blong mi. Be mi fraet yet blong tekem sakramen bakegen. ?I tru se mi mi klin inaf—iven afta evri wok we mi bin mekem?

Be bisop blong mi i givim hop long mi. Hem i rimaenem mi se mi no nid blong kam stret gud evriwan—be blong wantem mekem. Mi bin stap mekem bes blong mi, Sevya i save hemia mo bae i gohed blong fogivim mi taem mi dipen long presen blong Hem blong fasin blong sakem sin.

Sista Tamara W. Runia, Fas Kaonsela long Yang Woman Jeneral Presidensi i bin tijim i no longtaem i pas se, “Blong kam long Kraes, i blong talem ‘Bae yu save helpem mi?’ wetem hop, i soem tru se ol han blong Hem i oltaem open long yu.”

Afta long eksperiens ia, mi stat blong riniu ol kavenan blong mi tru long sakramen wetem tras. Mi filim olsem wan niufala man, wetem wan niufala filing abaot huia mi stret mo wanem we mi save mekem wetem help blong Lod. Mi iven givim seves long wan misin from hamas mi witnesem presen blong fasin blong pemaot man blong Sevya we i bin jenisim laef blong mi, mi wantem blong helpem ol narawan blong faenem hop we Hem i givim long mi evri dei.

Ol komanmen oli no strik rul—oli stap from se God i wantem yumi blong gat sakses, blong kam antap mo blong ronwe long trap blong sin. Long medel blong gospel blong Jisas Kraes hem i lav we Hem mo Papa long Heven Tufala i gat long yumi. From se mi gat eksperiens long stret lav ia, mi stap traehad blong kam moa olsem Tufala.

Presen blong Tufala blong fasin blong sakem sin i fulumap laef blong mi wetem glad.