Liahona
Talem Se Mi Redi blong Go, Masta
Jenuware 2026 Liahona

“Talem se Mi Redi blong Go Masta,” Liahona, Jenuware 2026.

Ol Sent long Evri Graon

Talem Se Mi Redi blong Go, Masta

I Kam long Scott Hales

Jos Histri Dipatmen

Hem i lego hom blong hem krosem bigfala solwota blong go prijim gospel we i bin kambak mo hem i ded taem hem i gat 26 yia, hem i stap tru long ol kavenan blong hem.

foto blong Emma Purcell mo ol narafala misinari

Emma Purcell (long laen long fored) mo ol narafala misinari long Samoa Misin, Oktoba 1902

Long Mei 5, 1901, Emma Purcell we i gat 17 yia, i bin akseptem misin kol blong go long Samoa. “Mi talem tru se, ol hadwok blong mi bae oli blong mekem wok blong Lod i go fored,” hem i bin raetem long wan leta i go long Presiden Lorenzo Snow. Hem i mekem moa promes se, “Oltaem bae mi glad blong stap faet from ol prinsipol blong Gospel, long taem mo long weaples we i gat wan janis.”

Taem hem i rere blong givim seves, i bin had long hem blong i tingting se bae i olsem wanem. Hem i spesel aot long ol nara fren misinari blong hem. Jos i jes stat blong singaotem ol singgel woman olsem ol fultaem misinari long tri yia we i pas. Mo kasem taem ia, hem nao i wan yang misinari we oli bin singaotem hem long wan misin.

Mo tu, hem bae i fas woman long Samoa blong go long wan fultaem misin. Nomata se hem i stap laef long Sol Lek Siti, hem i bin bon long Malaela, wan vilij long is, en blong Samoa aelan long Upolu. Taem hem i gat 12 yia, hem i lego hom mo famli blong hem blong go skul long Yuta, 5,000 mael (8,047 km) longwe.

Tingting ia blong gobak long Samoa afta faef yia, i mas wan hapi taem mo wan taem we Emma i wari. Blong rere long hemwan long saed blong spirit, hem i kasem endaomen blong hem insaed long Sol Lek Tempol. Olsem ol misinari tedei, hem i mekem ol tabu kavenan wetem God mo oli bin promesem ol blesing bae i kam long hem sapos hem i stap fetful.

Mo, stori blong hem i soem se hem i mekem bes blong hem blong kipim ol kavenan taem hem i givim seves long Lod.

Long Upolu i go long Yuta—mo Kambak

Emma i bin bon long 26 Jun, 1883, mo hem i namba seven pikinini blong Viliamu mo Matafua Purcell. Famli blong hem i sam long ol Yuronesian (oli haf waetman mo haf polinesian) ol famli long mo raon long Malaela. Mama blong hem i blong aelan blong Savai‘i, we i not mo wes blong Upolu nomo. Papa blong hem i wan pikinini boe blong wan Inglisman we i bin kam long Samoa raon long 1834, i maredem wan woman Samoa mo stap long Malaela.

Maet Emma i bin lanem blong fastaem abaot gospel we i bin kambak taem hem i stap wetem Jon mo Nanave Rosenquist, wan Lata-dei Sent kapol we tufala i tritim hem olsem wan gel we tufala i adoptem . Hem i kasem baptaes taem hem i gat 12 yia long 3 Novemba, 1895. Wan misinari we i atendem seves i testifae abaot paoa blong spirit we oli bin filim long taem blong baptaes.

Sam manis i pas, John W. Beck, presiden blong Samoa Misin i kasem apruvol we i kam long Fas Presidensi blong sendem Emma mo ol narafala pikinini long Samoa blong go skul long Yuta. Hem i travel aot long Apia, long mein wof blong Upolu wetem Presiden Beck mo ol narafala misinari long 23 Epril, 1896. Nomata se stret papa mo mama blong hem tufala i agri blong hem i go, wota blong ae blong tufala i folfoldaon taem tufala i talem tata long hem.

I tekem kolosap tri wik blong Emma i travel long stimsip mo relrod i go long Sol Lek Siti. Siti i bigwan tumas bitim vilij blong hem long Upolu mo hem i mas filim se i tumas long hem from ol rod i bisi oltaem mo i gat ol noes we hem i neva harem bifo. Long tetaem ia, Yuta i gat sam pipol blong Polinesia we oli stap long hem. Plante dei, bae hem i luk se i no gat wan i luk semmak olsem hem.

Long Yuta, Emma i stap long Sol Lek Siti, Tetin Wod, i kasem gudfala edukesen long ol skul blong Jos mo hem i gohed blong stap kondaktem ol misinari we oli kambak long misin blong olgeta long Samoa Misin. Long stat, bisop blong hem i luksave hem olsem wan we i save go long wan misin mo i givim kaonsel long hem blong rere blong go givim seves long hom ples blong hem.

Emma i kipim ol toktok blong hem insaed long hat blong hem, mo taem we koling ia i kam eli long 1901, hem i bin rere.

Stap Givim Seves long Malaela

Emma i gobak long Upolu long 25 Julae, 1901, hem i glad blong faenem papa blong hem we i stap wet long hem long wof. Long taem we hem i no bin stap long Samoa, Emma i nomo save toktok gud lanwis blong Samoa. Be taem we oli invaetem hem blong givim las prea long wan miting, Spirit i givim insperesen long hem, mo hem i talem prea long lanwis blong hem blong Samoa.

Emma i kasem misin kol blong hem blong givim seves long Malaela, hom taon blong hem long ples we Jos i bin gat wan skul stat long 1896. Hem i tekem responsabiliti blong tijim ol woman studen. Mo tu, hem i lidim Malaela Branj Yang Woman Miutuol Impruvmen Asosiesen. Long ol Sandei mo truaot long wik, bae hem i prij mo tij wetem ol misinari.

Long stat, sam long ol famli blong Emma long aelan oli go agensem wok blong hem mo askem strong long hem blong aot long Jos. Folem wanem we presiden William G. Sears i talem, se nomata wanem i hapen long Emma, “hem i faet from wok we hem i stap mekem” mo hem i traehad blong kipim ol kavenan blong hem, nomata long fasin blong go agensem hem.

Mo tu hem i gat olgeta jalenj we i blong hemwan wetem ol narafala misinari. Wan taem, tu elda tufala i riplesem wota blong kokonas blong hem wetem nomol wota long taem blong drink ti long moning, tufala mekem olsem wan fani samting nomo. Fani samting we tufala mekem ia i mekem Emma i “harem nogud” be hem i givim givimbak long tufala elda ia wanem we tufala i mekem long hem, taem hem i givim kokonas we oli kavremap long sol be i no suka .

Putum fani samting ia long i stap saed, ol misinari oli gat bigfala respek long “Sista Purcell.” Wan misinari i bin luksave mo talem se hem i “fulap wetem spirit long responsabiliti mo koling blong hem.” Wan narafala elda i bin raet wetem fasin blong talem tangkyu long hem mo abaot fasin blong hem blong stap kaen. Wan taem, Emma i putum sam banana long saed blong rod we hem mo kompanion blong hem tufala i folem mekem se bae tufala i gat samting blong kakae taem tufala i stap wokbaot.

Ol rekod oli soem se hem i prij abaot prishud atoriti, Buk blong Momon mo ol narafala gospel topik. Afta we wan misinari i harem Emma i prij abaot laef mo misin blong Josef Smit, hem i bin raetem se, “Mi laekem tumas blong harem ol rimak blong hem mo mi sori tumas taem hem i stop blong stap toktok.”

Sori tumas, Emma i kasem wan sik we i pas tru long moskito we oli faenemaot kolosap long en blong misin blong hem mo oli mekem wan eli rilis blong hem. Taem ol woman mo ol gel long skul oli harem se hem i stap gobak long Yuta, oli krae. Malaela branj i oganaesem wan miting blong talem tata long hem, we i mekem se miting ia i givim hem wan las janis blong prij. Hem i “toktok strong mo laod,” ol minit blong miting i soem, “mo askem strong long evriwan blong stap tru o fetful long gospel.”

Wan Histri Stori blong Wan Fetful Woman

Emma hemwan i gohed blong stap fetful long gospel—mo ol kavenan blong hem—blong ful laef blong hem. Long Yuta, hem i gohed wetem edukesen blong hem, hem i tekpat long stet Polinesian komuniti mo askem tingting blong hem long saed blong fas Lata-dei Sent hymbuk we bae i stap long lanwis blong Samoa. Long wan taem, hem mitim wan Sent blong Hawaii we nem blong hem Henry Kahalemanu. Tufala i mared insaed long Sol Lek Tempol long 31 Jenuware, 1907.

Tri yia i pas, Emma i ded taem hem i gat 26 yia mo oli berem hem long Iosepa, wan ples we ol Sent blong Polinesian oli bin kam stap fastaem long hem 60 mael (97 km) long wes blong Sol Lek Siti. Nomata laef blong hem i bin sot, fasin blong hem blong stap fetful long gospel blong Jisas Kraes we i bin kambak, i gohed blong stap wan eksampol we i givim paoa long Ol Sent raon long wol, speseli ol yang woman we oli akseptem blong givim seves tedei long wan misin.

Ol Not

  1. Leta blong Emma Purcell we i go long Lorenzo Snow, 5 Mei, 1901, Fas Presidensi misinari koling mo ol rekomendesen, 1877–1918, Church History Library, Salt Lake City.

  2. Luk long Matthew McBride, “‘Female Brethren’: Gender Dynamics in a Newly Integrated Missionary Force, 1898–1915,” Journal of Mormon History, vol. 44, no. 4 (Oct. 2018), 40-67.

  3. Luk long ol lis blong ol woman misinari we oli save gud olsem, Susa Young Gates, kolosap long 1870–1933, 6–9, Church History Library.

  4. Luk long Emma Purcell misinari famli laen, Missionary Department missionary papers, 1888–1928, Church History Library; William G. Sears journal, July 6 and 25, 1901, Church History Library; “In Far Samoa,” Juvenile Instructor, Dec. 15, 1902, 759–60.

  5. Luk long Salt Lake Temple, Endowments of the Living, 1893–1956 (microfilm), 0,184,068, p. 41, FamilySearch Library, Salt Lake City; William G. Sears journal, July 25, 1901.

  6. Luk long James E. Talmage, The House of the Lord: A Study of Holy Sanctuaries Ancient and Modern (1912), 100.

  7. Luk long “Register of British Subjects Residing in the Samoa Islands,” 209–11, in Samoa, baptisms, 1863–1940, FamilySearch.org. Ol waet mo polinesian famli long Malaela we i gat tu ol famli blong Viliamu mo Matafua Purcell, Thomas Purcell, mo John mo Nanave Rosenquist.

  8. Luk long notis blong ded blong Edward Ned Purcell long Samoa Times and South Sea Gazette, June 28, 1879, 2.

  9. Luk long Joseph Quinney journal, Sept. 17 mo Nov. 3, 1895, Church History Library.

  10. Luk long Emma Purcell misinari famli laen; Joseph Quinney journal, Nov. 3, 1895.

  11. Luk long John W. Beck letter to the First Presidency, Feb. 25, 1896, Church History Library; “Samoan Mission Historical Record,” buk 3, 1892–1896, Apr. 18, 1896, long Samoa Mission jeneral minit, 1888–1970, Church History Library.

  12. Luk long “Samoan Mission Historical Record,” buk 3, 1892–1896, Apr. 23, 1896; Joseph Quinney journal, Apr. 23, 1896.

  13. Emma i kasem Salt Lake City long 12 Mei, 1896 (luk long Joseph H. Dean journal, May 12–13, 1896, Church History Library).

  14. Luk long Missionary Department , ol misinari we oli rejista stat long, 1860–1959, Jun 14, 1901, buk. C, page 143, line 204, Church History Library; “In Far Samoa,” 759; “Ward Entertainments,” Salt Lake Tribune, June 5, 1901.

  15. Luk long leta blong Emma Purcell we i go long Lorenzo Snow, 5 Mei, 1901.

  16. Luk long Charles Warnick journal, July 25, 1901, Church History Library; William G. Sears journal, July 25, 1901.

  17. Luk long William T. Ogden journal, July 8, 1901, Church History Library.

  18. Luk long William G. Sears journal, Aug. 9, 1901; “Some Samoan Sunday Schools,” Juvenile Instructor, Sept. 1, 1901, 524.

  19. Luk long Wilford W. Emery journal, Mar. 19, 1902, Church History Library.

  20. Luk long Malaela Branj jeneral minit, 1897–1969, Jan. 28–June 3, 1903, Church History Library.

  21. Ol refrens we i go wetem ol tijing blong Emma Purcell yu save faenem long Malaela Branj jenerel miting, 1897–1969, mo Wilford W. Emery journal.

  22. Luk long William G. Sears journal, July 30–Aug. 3 and Aug. 8, 1901.

  23. Luk long Wilford W. Emery journal, Apr. 1, 1902.

  24. William T. Ogden journal, July 5, 1901.

  25. Luk long Wilford W. Emery journal, Aug. 31, 1902.

  26. Luk long Malaela Branj jeneral minit, 1897–1969, Feb. 5, 15, 19, mo 26, 1903; Mar. 8 mo 15, 1903; Apr. 16 mo 26, 1903; May 10, 1903.

  27. Wilford W. Emery journal, Feb. 26, 1903.

  28. Luk long Wilford W. Emery journal, Feb. 25, 1903; Martin F. Sanders letter to Joseph F. Smith, Mar. 29, 1903, Church History Library; Malaela Branch general minutes, 1897–1969, Feb. 25, 1903.

  29. Luk long Malaela Branj jeneral minit, 1897–1969, June 17 mo 19, 1903.

  30. Malaela Branj jeneral minit, 1897–1969, June 18, 1903.

  31. Luk long “The Sophomores,” The Gold and Blue, Oct. 23, 1905, 12; “Maoris Cook in Native Fashion,” Salt Lake Tribune, Aug. 29, 1906, 12; “Ward Entertainments,” Deseret News, Mar. 30, 1905, 5; F. Eugene Morris letter to the First Presidency, Oct. 16, 1903, in Letters (Martin F. Sanders), 1903 August–December, Church History Library; “Kaysville Kinks,” Davis County Clipper, Aug. 14, 1903, 1.

  32. Luk long mared laesens blong Henry Kahalemanu mo Emma Esther Purcell, Jan. 31, 1907, long ol rekod blong Salt Lake, Utah, United States, FamilySearch.org. Tekem not se FamilySearch i gat lis blong 31, 1907, olsem “sil i go long patna” deit blong Emma mo Henry.

  33. Luk long“Emma Esther Purcell,” Church History Biographical Database, history.churchofjesuschrist.org/chd.