Lod Bae I Lidim Mi

Pikja i kam long Allen Garns

Mi groap wetem tingting blong laekem singsing mo miusik i raonem mi. Drim blong mi olsem wan pikinini i blong kam wan profesonol singga. Mi iven winim sam long ol kompetisen blong singsing. Be long sam pat blong laef blong mi, mi filim emti taem mi tingting abaot stamba tingting we God i bin gat long mi bitim wanem we man i lukluk mo wanem man i talem i gud abaot ol narawan.

Blong gat gospel blong Jisas Kraes we i kam antap bigwan long laef blong mi naoia i bin helpem mi blong gat fet long ol taem we mi stap gat tu tingting. Hemia i helpem mi tu blong andastanem se Papa long Heven i wantem mi blong yusum talen we Hem i bin givim long mi blong kam moa kolosap long Hem mo blong givim glori long Hem.

Nomata se mi lego ol drim blong mi, mi filim se mi mas gohed blong singsing mo stap stadi long miusik.

Taem mi kasem 25 yia, mi finisim stadi long akitek mo tu mi stadi tru long BYU–Pathway Worldwide mo Brigham Young University–Idaho, we i helpem mi blong kam moa gud blong toktok long Inglis.

Afta, wan merikel samting i hapen.

Mi kasem wan invitesen blong kam wan miusik misinari olsem pat blong wan We Bae I Tekpat long Wol Kwaea Program. Mi no bin save hemia, be evri samting we mi bin stap mekem blong sam yia i bin helpem mi blong rere long mi from taem ia. Invitesen ia i bin wan ansa long ol prea mo ol tingting blong hat blong mi. Papa long Heven i save en long stat long stat mo i letem mi blong singsing wetem Tabenakol Kwaea long Tempol Skwea long taem blong Oktoba 2024 jeneral konfrens.

Tru long eksperiens ia mi save testifae abaot paoa ia we i kam taem Tabu Spirit i lidim mi, blong gat fasin blong save wet longtaem mo blong stap trastem God se Hem i gat wan stamba tingting, nomata se yumi no save andastanem stamba tingting ia. Olsem we oli promesem long yumi se, “Stret rod bae i no klia oltaem be yumi save folem Sevya wetem fet se rod blong yumi bae i finis gud mo wetem glad from bae Hem i lidim yumi sef i go long ples we yumi nid blong stap long hem.”

Blong olgeta we oli stap lukaotem rod blong olgeta i go fored, yu save se Lod i gat wan samting we Hem i rere long hem i stap blong yu bitim wanem we yu stap tingting long hem. Sapos yumi folem Hem, bae yumi kasem wanem we Hem i rere long hem i stap blong yumi. Maet rod bae i no klia mo maet laef bae i had tumas, be Lod i stap gohed yet blong mekem ol merikel long ol pikinini blong Hem.

Mi bin lanem se tru long fet, fasin blong stap obei, fasin blong stap wet longtaem mo prea, Lod bae i lidim mi.