“Olgeta We Oli Tekpat long Gudfala Fasin,” Liahona, Jenuware 2026.
Olgeta We Oli Tekpat long Gudfala Fasin
(2 Pita 1:4)
Save ia abaot plan ia blong fasin blong sevem man i givim ol naesfala niu tingting, mekem glad blong yumi i kam moa bigwan, mo i mekem yumi i kam moa strong blong winim ol jalenj mo ol hadtaem blong yumi.
Kraes I Stap Singaotem Tu Disaepol, i kam long Gary E. Smith
Aposol Pita i rimaenem yumi se blong ol disaepol blong Jisas Kraes “tabu paoa blong Hem, Hem i givim long yumi evri samting we hem i abaot laef mo fasin ia blong kam olsem god, tru long save abaot hem we i singaotem yumi i go long glori mo klin fasin:
“Long fasin ya, God i givim ol nambawan presen long yumi we oli gud tumas, olsem we hem i promes blong givim: Nao taem yufala i kasem ol presen ya yufala i gat rod blong ronwe long fasin blong wol, we i stap spolem ol man we oli wantem tumas ol samting ya, nao yufala i save kam joen long laef blong God” (2 Pita 1:3–4; oli ademap italik).
Plan ia blong Papa long Heven i tokbaot speseli, bigfala mo ol naesfala trutok mo ol promes we oli talemaot mining blong aedentiti we i no save finis mo stamba tingting blong yumi.
Olsem we oli eksplenem insaed long “Famle: Wan Ofisol Toktok I Go long Wol”:
“Evri famli blong man—man mo woman—oli mekem olgeta folem pikja blong God. Wanwan long olgeta i wan spirit pikinini boe o spirit pikinini gel blong papa wetem mama long heven we oli lavem olgeta tumas, mo from we oli olsem wan spirit, wanwan long olgeta i gat gudfala fasin mo oli gat bigfala janis blong save kam olsem God. …
“Long laef bifo laef long wol ia, ol spirit pikinini boe mo ol spirit pikinini gel oli bin save God mo oli bin stap wosipim Hem olsem Papa blong olgeta We I no Save Finis mo oli agri wetem plan ia blong Hem, we i talem se ol pikinini blong Hem oli mas gat wan bodi blong mit mo bun, mo kasem eksperiens long wol ia blong save kam stret evriwan, mo long en, bae oli gat raet blong kasem laef ia we i no save finis.”
Papa long heven i promesem ol pikinini blong Hem se sapos oli folem ol wei blong plan ia blong Hem mo eksampol blong Pikinini blong Hem we Hem i Lavem Tumas, kipim ol komanmen, mo stap strong long fet kasem en, bae oli “gat laef we i no save finis, we presen ia, we presen ia i moa bigwan long evri narafala presen blong God.”(Doktrin mo Ol Kavenan 14:7).
Wok blong God i lukluk nomo long hamas ol pikinini blong Hem oli stap progres mo fasin blong olgeta blong kam olsem god. Evri pat blong plan ia blong Hem, oli disaenem blong blesem ol pikinini boe mo gel blong Hem “praes blong wan sol i bigwan long ae blong [Hem]” (Doktrin mo Ol Kavenan 18:10).
Plan Ia blong Papa
Long kaonsel blong laef bifo laef long wol ia, Papa long Heven i soemaot plan ia blong Hem long ol spirit pikinini blong Hem, abaot progres mo hapines blong olgeta blong taem we i no save finis.
“Bae yumi mekem wan wol we olgeta ia bae oli save stap long hem,
“Mo bae yumi testem olgeta long wei ia, blong luk sapos bae oli mekem evri samting we Lod, God blong olgeta bae i givim oda long olgeta;
“Mo olgeta we oli stap fetful long taem blong fasfala laef blong olgeta, bae mi givim moa long olgeta; mo olgeta we oli no stap fetful long taem blong fasfala laef blong olgeta, bae oli no gat glori long semfala kingdom ia wetem olgeta we oli bin stap fetful long taem blong fasfala laef blong olgeta. Mo olgeta we oli stap fetful long taem blong seken laef blong olgeta, bae mi givim moa glori antap long hed blong olgeta blong oltaem mo oltaem.”
“Mo Lod i bin talem: “?Bambae mi sendem huia?” Mo wan, we i semmak long Pikinini blong Man i bin ansa se: “Mi hemia. Yu sendem mi.” Mo wan narawan bakegen i bin ansa mo i bin talem: “Mi hemia. Yu sendem mi.” Mo Lod i bin talem: “Bambae mi sendem faswan i go.”
Mo sekenwan i bin kros, mo hem i no bin stap fetful long taem blong fasfala laef blong hem; mo long dei ia, plante oli bin folem hem” (Ebraham 3:24–28).
Tekem not se i gat wan plan nomo we oli soemaot long kaonsel long taem bifo laef long wol ia—plan ia blong Papa. Papa blong yumi long Heven i no askem kwestin ia se, “?Wanem nao bae yumi mekem?” Hem i no askem tingting blong wan narawan, o wantem blong wan i givim sam tingting long wanem blong mekem. Be, Hem i soemaot ol stamba pat blong plan ia blong Hem mo askem, “?Bambae mi mi sanem hu?” Stamba tingting blong kwestin blong Hem i lukluk nomo long huia bae oli sendem blong i mekem ol aedia mo ol kondisen blong plan ia blong Hem i hapen.
Ol risal blong enemi blong fasin blong go agens, oli tokbaot tu insaed long ol skripja.
Taswe, from se Setan i bin kam agensem mi, mo i bin wantem blong prapa spolem gud fridom blong man blong mekem joes, we mi … bin givim long hem, mo tu, from se hem i se bae mi givim paoa blong mi … , mi bin mekem se oli sakemaot hem;
“Mo hem i kam Setan, … devel, papa blong evri giaman, blong trikim mo mekem evri man oli blaen, mo blong lidim olgeta oli kam prisena folem tingting blong hem, yes, evriwan we bae oli no wantem folem voes blong mi” (luk long” (Moses 4:3–4:; oli ademap italik).
Lusifa i no soemaot wan plan we plante we oli tekpat oli no vot long taem blong kaonsel long laef bifo laef blong wol ia. Hem i no gat fasin ia blong soem se man bae i gat sore long hem from hem i lus long wan ileksen. !Hem i go agens! Fasin blong gat hae tingting, tingdaon long narawan, selfis oli pusum hem blong go agensem plan ia blong Papa.
Plan Ia blong Papa mo Gospel Ia blong Sevya
Plan ia i soemaot ol wok blong Papa mo Pikinini we bae i givim long evri man ol blesing blong laef we i no save finis.
Gospel blong Jisas Kraes i soem rod ia we yumi save kasem ol blesing we oli promesem insaed long plan ia blong God, iven ol doktrin, ol prinsipol, ol odinens mo ol kavenan we ol man mo ol woman oli mas bilivim mo folem. “I no gat eni narafala nem we oli givim andanit long heven, be Jisas Kraes ia nomo, … we tru long hem ol man oli save laef” (2 Nifae 25:20). I tru, Lod Jisas Kraes i “rod ya, mo [Hem i] stamba blong trutok, mo [Hem i] stamba blong laef. I no gat man i save kam long Papa blong mi, sapos mi mi no tekem hem i kam” (Jon 14:6; oli ademap italik).
Presiden Russell M. Nelson i eksplenem se:
“Plan ia i nidim Kriesen, mo insaed long Kriesen i nidim tugeta, Foldaon blong Adam mo Iv mo Atonmen. Hemia i ol trifala stamba pat blong plan ia. Kriesen blong paradaes planet i bin kam tru long God. Laef long wol mo ded i bin kam insaed long wol tru long Foldaon blong Adam [luk long 2 Nifae 2:25; Moses 6:48]. Atonmen blong Jisas Kraes i mekem i posibol blong bodi i nomo ded mo gat laef we i no save finis [luk long 2 Nifae 2:21–28]. …
“… Yumi kam long wol blong wan sot taem, stanap strong blong go tru long ol tes mo ol hadtaem, mo rere blong muv i go fored mo i go antap long taem we Hem bae i kambak we i fulap long glori [luk long Ol Sam 116:15; Alma 42:8]. Ol tingting mo ol aksen blong yumi long taem we [yumi stap laef long wol ia], i tru, bae i kam moa klia mo gat moa mining, sapos yumi andastanem plan ia blong God mo talem tangkyu from mo stap obei long ol komanmen blong Hem” [luk long Doktrin mo Ol Kavenan 59:20–21].”
Ol Taetol blong Plan Ia insaed long Buk blong Momon
Yumi lanem ol impoten trutok taem yumi faenemaot mo stadi long plante defren taetol blong plan ia blong Papa insaed long Buk blong Momon: Wan Narafala Testeman Jisas Kraes. Eksampol, tingting long ol taetol ia we oli bin selektem:
“Plan we i fulap wetem sore blong bigfala Krieta” (2 Nifae 9:6).
“Plan blong God blong yumi” (2 Nifae 9:13).
“Plan blong fasin blong sevem man” (Jerom 1:2; Alma 24:14).
“Plan blong fasin ia blong pemaot man” (Alma 12:25, 26, 30, 32, 33; 42:11, 13).
“Plan blong putumbak ol samting long stret ples we oli bin stap long hem bifo,” (Alma 41:2).
“Plan blong stap glad” (Alma 42:16).
“Bigfala plan blong sore.” (Alma 42:31).
Wanwan long ol taetol ia oli helpem yumi blong andastanem ol naesfala promes blong plan ia blong Papa mo mekem lukluk blong yumi long saed blong ol stamba tingting mo mining blong laef blong yumi long wol ia i kam moa klia.
Hemia we i impoten, taetol we oli yusum oltaem insaed long plan ia blong God long Buk blong Momon, we i lukluk nomo long fasin blong pemaot man we oli bin mekem i posibol tru long Atonmen blong Jisas Kraes.
Alma i talemaot se, “sapos i no bin from plan blong fasin blong pemaot man, we oli bin mekem i rere stat long taem we wol i stat, bae ol dedman oli no save laef bakegen long ded; be i gat wan plan blong fasin blong pemaot man we God i putum, we bae i mekem ol dedman oli laef bakegen long ded” (Alma 12:25).
Mo tu, hem i givim woning se, “Stat blong biliv long Pikinini blong God, se bae hem i kam blong pemaot ol pipol blong hem, mo se bae hem i safa mo kasem ded blong pem praes blong ol sin blong olgeta; mo se bae hem i girap bakegen long ded, se bae i mekem fasin blong laef bakegen long ded i hapen, blong mekem se evri man bae i stanap long fored blong hem, blong kasem jajmen long las mo jajmen dei, folem ol wok blong olgeta” (Alma 33:22).
Wei Ia Oli Mekem I Rere Finis I Stap
Ol sol blong yumi oli mas solap wetem fasin blong talem tangkyu taem yumi tingting long bigfala plan blong God blong sevem man, fasin blong pemaot man, restoresen, gladhat mo bigfala glad. Save ia abaot plan blong Hem i givim ol naesfala niu tingting, mekem glad blong yumi i kam moa bigwan, mo i mekem yumi i kam moa strong blong winim ol jalenj mo ol hadtaem blong yumi.
Papa long Heven i wantem tumas blong yumi gobak hom long Hem. Hem i invaetem mo promesem ol blesing, be Hem bae i neva fos, o fosem yumi blong eksasaesem fasin blong yumi blong mekem joes we Hem i bin givim long yumi. Yumi mas tekem aksen mo jusum blong gobak long Hem taem yumi stap folem eksampol blong Pikinini blong Hem we Hem I Lavem Tumas.
Hem I Stretem Han blong Hem I Stap Yet, i kam long Elizabeth Thayer
“Rod ia i rere finis, mo sapos yumi lukluk bae yumi save laef oltaem” (Alma 37:46; oli ademap italik).
Mi glad blong witnesem se Papa long Heven nao Hem man we i raetem tabu plan ia blong ol pikinini blong Hem. Jisas Kraes Hem i Ridima mo Sevya blong yumi. Mo olsem wan long Ol lata-dei Aposol blong Lod, mi witnes se i tru, Hem “i rod ya, stamba blong trutok mo stamba blong laef” (Jon 14:6; oli ademap italik).