Fasin blong Sakem Sin hem I No Abaot Blong Winim Sin Nomo

Bifo long misin blong mi, laef blong mi i no stret evriwan, be i bin gud. Mi laekem tumas kolej mo mi jes statem wan bes frensip we mi neva bin gat bifo. Mi bin glad tumas.

Mi save se blong go long wan misin bae i gat jalenj. Be yet, mi bin gat tingting ia se blong givim seves long wan misin bae i wan gudfala 18 manis blong laef blong mi—wetem smol hadtaem.

Be blong sikis manis we mi stap long fil, mared blong fren blong mi i kam wan niufala samting long lis blong mi blong ol had samting we mi no tingting long olgeta. Blong muv i go long wan kantri ovasi mo lanem wan niu lanwis i mekem mi filim se mi stap miwan mo mi stap wari. Ol eksperiens ia blong oli no akseptem yu olsem pat blong misinari laef i mekem mifala i taet bigwan. Blong talem tru, mi wantem blong go hom nomo.

Mi bin taet mo kros from mi no kasem wanem mi stap traehad from, mo mi no filim se God i givim hop mo hapines long taem we mi nidim tumas. Afta we mi bin yusum evri nara wei, mi tanem mi i go long promes we i stap long petriakel blesing blong mi: se bae mi save filim lav blong Papa long Heven tru long ol skripja.

Taem mi stap stadi ol skripja, mi luk se wanem we mi stap fesem i go stret wetem stori blong Iv. God i bin sakemaot hem long paradaes i go long wan rabis ples we i no gat man long hem, we hem i semmak long wanem we mi bin filim. Olsem eksperiens blong mi, fasin blong jenis blong Iv i bin hapen from wan stret joes. Mi stap tingting long miwan se, hem i eva rigret long joes blong hem olsem mi we mi stap stat blong rigretem joes blong mi blong go long misin.

Be Iv i gat wan lukluk we i moa waes bitim hemia blong mi. Nomata se hem i lusum evri impoten samting, taem we hem i lanem se hem i gat wan Sevya, hem “i bin glad, i stap talem se: “Sapos yumitu no bin brekem loa, bae yumitu neva … save gud mo nogud, mo save glad long fasin blong pemaot man” (Moses 5:11).

Hem i no bin rigret long joes blong hem. !Hem i glad tumas long joes blong hem! Nomata se God i sakemaot hem mo Adam aot long paradaes, glad ia from fasin blong pemaot man i bin swit tumas bitim soa blong wanem we tufala i bin lusum. I tru, i luk olsem se fasin blong pemaot man i bin karem i kam long hem bigfala glad bitim we sapos hem i no nidim fasin blong pemaot man.

?Olsem wanem nao hemia i save hapen olsem?

Maet bae yumi ting se fasin blong sakem sin hem i blong karemaot ol sin nomo mo ol rabis fasin long laef blong yumi. Proses ia blong karemaot sin i wan had samting blong mekem mo wanwan taem, i mekem man i harem nogud, i stap mekem i isi blong putum tugeta wan toktok ia olsem karemaot we i save mekem man i fraet.

Be fasin blong sakem sin i no nomo blong mekem se sin i kam smol. Hem blong stap kam moa olsem Kraes tu.

Blong stap tanem yumi i go long Kraes—blong jenisim ol fasin blong yumi mo blong mekem ol lukluk blong yumi i go folem blong Hem—hem i wan wei blong soem fasin blong sakem sin tu.

Mi kam blong luksave se long taem we mi stap kros mo filim se mi stap miwan ia, lukluk blong mi i bin kam moa smol. Mi bin stap lukluk nomo long wanem we mi mestem we i mekem se mi bin mestem blong luk wanem we mi bin kasem: wan rilesensip blong kam moa kolosap long Sevya blong mi.

Mi luksave se mi nid blong sakem sin from pua fasin blong mi ia. Mi bin tekem plante taem, be taem mi singaotem help blong Ridima blong mi, mi kasem hop ia se “long laef ia bae mi gat glad” (Moses 5:10).

Mi harem nogud yet se mi mestem mared blong fren blong mi, be wetem taem, Lod i bin ansarem ol prea blong mi. Mi bin glad tumas long fren blong mi, mo mi faenem plante glad tru long testemoni blong mi se i tru, Papa long Heven i stap luk mo lavem evri pikinini blong Hem. Mi kasem plante moa bitim ol samting we mi no gat janis blong go long hem o gat.

Sista Kristin M. Yee, Seken Kaonsela long Jeneral Rilif Sosaeti Presidensi i bin tijim se “Fasin blong sakem sin i letem yumi blong filim lav blong God mo blong save mo lavem Hem long ol wei we bae yumi neva bin save.”

From se tru long fasin blong sakem sin, naoia mi save se taem mi kam moa kolosap long Kraes, “bae hem i mekem waelples blong [mi] i kam olsem Iden, mo draeples blong [mi] i kam olsem garen blong Lod; glad mo bigfala glad blong mi bae i stap long ples ia” (Aesea 51:3).

Taem mi gobak hom afta long misin blong mi, mi no gobak long paradaes. Laef blong mi bifo long misin i wan niu wael ples blong mi blong wok long hem blong mekem i kam gud. Hem i no isi, mo samtaem mi stap misim yet laef blong mi bifo misin.

Be mi save se tru long Kraes, bae Hem i mekem glad blong mi i kam moa bigwan tru long save ia se Hem i pemaot mi.