“Long Ples We Sin I Mekem Tingting I Fasfas, Kraes I Tekem Pis I Kam,” Liahona, Jenuware 2026.
I kam long YA Evri Wik
Long Ples We Sin I Mekem Tingting I Fasfas, Kraes I Tekem Pis I Kam
Iven long medel blong ol trabol blong laef ia, Kraes i save tekem laet, oda mo pis i kam long sol blong yu.
pikja droing i kam long Kate Birch
?Samtaem yu eva filim se… laef i fasfas?
Blong stap gat filing blong tingting i fasfas i wan samting we yumi evri wan i stap eksperiensem wanwan taem. Ol had samting o ol problem blong wol i mekem i isi blong fogetem se yumi gat laef tu long saed blong spirit mo yumi stap eksperiensem laef blong wol—wan samting we yumi neva bin mekem bifo.
Tu merikel presen we God i bin givim long yumi i ol bodi mo fridom blong yumi blong mekem ol joes. Ol presen ia oli letem yumi blong filim, gat filing blong wantem mekem samting, mo tekem aksen blong yumiwan. Hem i nomol nomo blong filim se evri samting i olbaot mo no sua from ol joes we wan man o woman i wantem blong mekem we i folem fasin blong wol ia.
Yumi evriwan i mekem mistek. Be taem yumi traehad wetem ol sin mo ol evri dei fasin we yumi luk se i had blong winim olgeta, nomata hamas yumi traehad blong jenis, i isi blong filim se ol trabol blong wol i tumas. Wetem pat we yumi gat long laef blong yumi long saed blong spirit we i stap pulum yumi i go long heven, mo pat blong laef blong yumi blong laef blong wol ia we i stap pulum yumi i go long wol, bae yumi filim se i olsem wan evri dei samting we i stap pulum yumi insaed olsem gem ia blong grup i stap pulum rop blong wan i win.
Nomata sapos yumi stap traehad blong lego fasin blong stap tokbaot nogud man o woman, fasin blong kros, jajmen we i no stret, gat bigfala intres long sosol media, yusum ponografi o eni nara samting, enemi i kwik blong sakem filing blong sem long yu, filing blong no gat hop mo long en, i mekem tingting blong yu i fasfas long saed blong spirit.
Laki nomo se, long yumi, Papa long Heven mo Jisas Kraes Tufala i save olsem wanem blong handelem tingting o ol samting we i fasfas.
Stap Lukaotem Laet blong Hem I Fas Step
Long taem blong Kriesen—stat blong evri samting we yumi save—oli tokbaot se yunives i stap long wan level we evri samting i stap olbaot mo oli no stap long oda: “Be long taem ya, wol ya i narafala olgeta. Hem i stap nating nomo, we i no gat wan samting nating i stap long hem. Tudak nomo i stap kavremap” (Jenesis 1:2). Tingting we i fasfas mo blong tudak i soem yumi olsem wanem enemi i save mekem yumi filim taem yumi mekem sin o mekem ol joes we i go agensem ol valiu blong yumi. Hem i laekem tumas blong stap mekem yumi filim se yumi fasfas o nomo save jenis mo oltaem i wantem mekem yumi stap haed.
Be olsem we Sista Tamara W. Runia, Fas Kaonsela long Yang Woman Jeneral Presidensi i bin tijim se: “Jisas Kraes i givim laet long olgeta we oli sidaon long tudak. So long ol dei ia, taem yu filim se voes ia i talem long yu blong haed, se bae yu mas haed long wan dak rum yu wan nomo, mi invaetem yu blong stap smat mo bilivim Kraes! Wokbaot i go long Sevya—Wan Stret mo Klin Hop blong yumi.”
Anda long daereksen blong God, long taem blong Kriesen, fas samting we Jisas Kraes i bin mekem i blong karemaot tudak long ol samting we i fasfas o ol samting we oli no stap long oda mo tekem laet i kam (luk long Jenesis 1:3; Moses 2:2–5). Long ples ia, Hem i gohed blong oganaesem evri pat blong ol samting we i oli no stap long oda, stat long bigbigfala samting long ol heven i go kasem ol smosmol sid we oli stap gro.
Sapos Hem i save mekem oda long ol samting blong yunives, pikjarem long maen, wanem i save hapen taem yu tanem yu i go long Pikinini blong Hem blong kasem hiling mo fasin blong pemaot yu long sin, evri dei. Taem yu filim se yu ol hevi samting i tumas long yu, mo we yu stap traehad wetem mo tudak blong wol, blong stap lukaotem laet blong Kraes hem i fas step blong kasem pis mo tabu fasin blong putum evri samting long oda.
Nekis Samting, Tingbaot Huia Yu
Afta we Jisas Kraes i oganaesem ol heven mo wol mo Hem i mekem i kam naes, Papa long Heven i mekem rere wan wei blong ol spirit pikinini blong Hem blong kam long wol mo kasem wan bodi. Be long taem blong yumi long wol, enemi i wok had blong mekem yumi fogetem huia yumi.
Yumi save luk ol hadwok blong hem blong muvumaot yumi sloslo aot long tabu aedentiti blong yumi long taem ia we God i toktok long profet Moses mo serem save wetem hem. Long Moses 1, God i singaotem Moses long nem blong hem mo singaotem hem pikinini boe blong Hem plante taem.
Be semmak taem we God i aot, Setan i kamkamaot mo singaotem Moses wan “pikinini blong man” (Moses 1:12), mo stap temtem hem blong foget huia nao hem stret.
Setan i wantem yumi blong fogetem huia stret yumi. Sloslo hem i putum ol tu tingting long maen blong yumi mo mekem yumi tingting se yumi no gat paoa blong jenis. Hem i wantem yumi blong tingting se yumi ol man o woman blong folem fasin blong wol, mo se bae yumi ol man mo ol woman we bae yumi no save jenis mo bae oltaem i olsem.
Be Elda Patrick Kearon blong Kworom blong Olgeta Twelef Aposol i rimaenem yumi se: “Yu save kam long Kraes wetem tras long lav mo kaen fasin blong Hem mo kasem evri presen blong glad, pis, hop, laef, trutok, revelesen, save, mo waes. … Yu yu wan gel blong God we Hem i lavem tumas, yu yu wan boe blong God we Hem i lavem tumas, mo Hem i bin givim presen ia we i stret evriwan, we i Tabu Pikinini blong Hem blong i pemaot yu, stanap from yu, mo mekem yu tabu.”
Fasin blong pemaot man long sin i wan samting we Setan bae i neva gat. Mo taem yumi stap long saed blong aedentiti blong yumi long saed blong spirit, yumi save talem olsem Moses i bin talem, se:
“?Yu, yu huia? From luk, mi mi wan pikinini blong God, we mi ripresentem Wan Stret Pikinini Ia Nomo blong Hem
“Setan, !yu kamaot long ples ia! Yu no trikim mi; from we God i bin talem long mi: “Yu yu ripresentem Wan Stret Pikinini Ia Nomo blong mi” (Moses 1:13, 16).
Sapos laef ia i mekem yu filim se laef blong yu i fasfas, stop smoltaem. Tingbaot tabu aedentiti blong yu. Letem trutok ia, se yu yu pikinini blong God we Hem i lavem tumas, i pulum yu i go long heven. Tanem yu i go long Jisas Kraes mekem se Hem i save helpem yu blong putumbak evri samting we i stap olbaot i kam long oda long sol blong yu.
Laswan, Letem Kraes blong I Tanem Tingting we I Fasfas I Kam long Pis
Taem Adam mo Iv tufala i aot long Garen blong Iden, samting we i simpol nomo mo we oltaem tufala save long ples ia, oli bin riplesem wetem wan wol we i stastap hemwan mo we i nogud tumas. Be Papa long Heven i mekem promes long tufala se bae tufala save gat pis from se Hem i mekem rere wan Sevya blong pemaot tufala long ol sin mo ol bigfala harem nogud blong tufala (luk long Moses 5:7–10).
Taem yu stap long wol ia mo yu filim se i gat tumas samting long maen blong yu, tingbaot trutok ia: Papa long Heven i bin save se bae yumi fesem ol temtesen, mekem ol mistek mo mekem sin truaot long wokbaot blong yumi long wol ia i gobak long hom blong Hem—hemia hem i evri samting we i pat blong plan ia.
Tru long Jisas Kraes, oltaem Papa long Heven i save helpem yumi blong faet agensem ol paoa blong tudak long laef ia mo riplesem olgeta wetem laet. Nomata hamas taem yumi mekem samting i no stret, be from Sevya blong yumi, yumi save jenisim ol trabol blong wol wetem pis raon long sol blong yumi taem yumi sakem sin.
Presiden Russell M. Nelson i bin testifae se:
“[Jisas Kraes] bae i mekem yu strong. Bae Hem i blesem yufala wetem pis, iven long medel blong ol trabol taem long wol
Jisas Kraes i tekem long Hemwan ol sin, blong yu, soa, blong yu ol harem nogud, mo ol wiknes blong yu. !Yu no nid blong tekem ol hevi trabol ia yuwan! Bae Hem i fogivim yu taem yu sakem sin. Bae Hem i blesem yu wetem wanem we yu nidim. Bae Hem i hilim sol blong yu we i soa ia.”
Wanem ol samting we yu stap traehad wetem, taem yu tanem yu i go long Papa long Heven mo Jisas Kraes blong kasem help, oltaem Tufala i save putumbak wanem we i no gud i kambak gud bakegen, mekem yu fri long ol trabol tingting blong sin mo ol temtesen mo mekem laef blong yu i kam naes.
Oli bin mekem hemia evri taem.