Wan Prea long Hat blong Mi

Pikja i kam long Allen Garns

Taem mi go long praemeri skul, oltaem mama blong mi i givim lanj blong mi, i kisim fored blong hed blong mi mo talem, “Mekem bes blong yu tedei, mo tingbaot blong kipim wan prea long hat blong yu.” Hem i talem semmak samting evri moning, gogo kasem hae skul.

I tru, “kipim wan prea long hat blong yu” hem i bin las samting we hem i talem long mi taem mi stap go long wan plen blong go long tu yia misin blong mi long Florida. Mi kam blong harem save toktok ia mekem se mi no tingting tumas long hem taem mi stap gro i kam antap. Mi ting se hem i wan samting we jeneresen blong hem oltaem oli stap talem “Gat wan naes dei.”

Olsem wan fultaem misinari, mi bin lanem blong toktok Spanis taem mi stap givim seves long Miami, Florida, USA. Mi kam blong faenemaot se ol niufala fren blong mifala, plante oli blong Kuba mo Pueto Riko, oli olsem mama blong mi nomo. Evri famli we mitufala i visitim, oli talem tata wetem semmak naesfala toktok ia : “Vaya con Dios” (Go wetem God).

Taem long en, mi kam blong andastanem wanem mama blong mi i stap minim, i tru, mi stat blong lukaotem ol wei blong kipim wan prea long hat blong mi. Taem mi mekem olsem, fasin blong mi blong talem tangkyu long Papa long Heven mo Pikinini blong Hem, Jisas Kraes, i bin gro. Mi eksperiensem wan ekstra dip fasin blong stanap strong long ol taem blong tes blong laef mo ol hadtaem. Mi filim wan bigfala lav long papa mo mama blong mi mo glad from ol sakrifaes we tufala i bin mekem blong mi.

Wan dei mi rid abaot visit blong Sevya we i go long Ol Man blong Nifae afta long Laef Bakegen long Ded blong Hem. Long nambatu dei blong visit blong Hem, “hem i givim oda long ol disaepol blong hem se oli mas prea.” Taem oli prea, Sevya tu i prea, mo stap talem“plante bigfala mo gudfala,” toktok. Taem Hem i finis, Hem i givim oda long ol grup blong ol pipol ia “se oli mas prea long ol hat blong olgeta,” (3 Nifae 19:17, 34; 20:1).

Wan wei blong mekem hemia i blong tingting long prea olsem wan frem blong wan pikja we raon long hem i gat ol evri dei aktiviti blong yumi. Frem wok ia blong prea, i joen tugeta wetem lav mo fasin blong talem tangkyu, i helpem yumi blong lukluk nomo long Sevya mo kipim ol kavenan blong yumi.

Mi talem tangkyu long mama blong mi from ol evri dei kaonsel blong hem blong “mas prea” long hat blong mi. Hemia i bin mekem wan bigfala jenis long laef blong mi.