“Mi Filim Pis I Stap,” Liahona, Jenuware 2026.
Ol Voes blong Ol Lata–dei Sent
Mi Filim Pis I Stap
“Olsem se harem nogud blong mi i no inaf yet,” mi tingting se, “naoia mi mas plei long wan hym we i had tumas.”
Pikja i kam long Allen Garns
Taem mi kasem tu Jos koling olsem wan woman we i plei piano long semmak wik, mi stat blong wari abaot olsem wanem bae mi save faenem taem blong mekem ol nara responsabiliti blong mi i hapen long hom, wok mo long skul. Insaed long hat blong mi, bigfala tingting blong hat blong mi i blong givim seves long Lod mo tekem Spirit blong Hem i go long ol pipol taem mi stap traem blong mekem ol talen blong mi i smut. Mi bin filim se mi no mekem i inaf long ol koling blong mi blong stap fetful long ol niu koling blong mi olsem we mi laekem blong mekem.
Long nekis wik, oli nidim mi moa long kampani we mi stap wok long hem. From se plante long ol wok blong mi hem i wok blong stap taep, ol joen blong ol han blong mi oli stat blong soa. Mi wari se bae mi save plei piano sapos han blong i we i so i so nomo i stap.
Long Sandei taem mi stap plei long prilud miusik long piano blong japel, ol masel blong han blong mi oli stat blong soa bakegen. Kwiktaem mi prea long hat blong mi, mi askem blong gat paoa blong stap gohed blong plei.
Long taem blong sakramen, mi kam blong luksave se nekis hym we oli putum i bin wan hym we mi no bin plei long hem longtaem. “Olsem se harem nogud blong mi i no inaf yet,” mi tingting se, “naoia mi mas plei long wan hym we i had tumas.” Long taem ia nao we mi ridim ol toktok ia we oli talem stret wanem we mi stap filim:
Taem mi ridim hemia, mi filim pis. Mi save se Sevya i save ol soa blong bodi blong mi. Afta long evri samting, Hem i bin harem nogud from olgeta (luk long Alma 7:11–12). Mi no nid blong go tru long taem ia miwan. Mi no bin tingting long hem olsem, be mi bin filim Spirit blong Lod.
Taem mi stat blong plei, mi nomo filim soa long bodi blong mi mo ol not ia oli kam isi long ol fingga blong mi. Mi kam blong luksave se seves blong mi i bin mekem rod i kam moa isi blong stap hilim mo tekem mi i kam moa kolosap long Papa long Heven.
Taem mi tingting hevi long eksperiens blong mi long piano, mi save se mi no stap plei miwan. Mi filim paoa mo glad hat blong Jisas Kraes i bin tajem mi—wan eksperiens long saed blong spirit we i kam from se mi stap givim seves long Hem. Mi save se Hem bae i stap oltaem blong givim sapot mo givim paoa long yumi sapos yumi wantem blong givim seves long Hem.