Stap Lukaotem Kraes mo Ol Kavenan: Ol Ki blong Nifae blong Stap Ridim OlTesteman

Moses mo Snek Ia we Oli Wokem long Bras, i kam long Judith A. Mehr; Kraes we I Stap long Kros, i kam long Carl Heinrich Bloch

God ia blong OlTesteman

From se yumi save tru long revelesen blong taem tedei se Jisas Kraes, Hem i God blong OlTesteman (luk long Doktrin mo Ol Kavenan 110:3–4), yumi save luk paoa blong Hem long Kriesen mo olsem Man we I Givim Loa long Maonten Sinae we i stap tijim Isrel long olsem wanem blong kam olsem God. Yumi lanem abaot glad hat blong Hem tru long fasin blong pemaot man mo kam fri aot long kalabus long Ijip, lav blong Hem blong stap kea long ol pipol blong Hem long waelples mo karem olgeta i kam long promes graon, mo wari blong Hem, i taem we Hem i stap sendem ol profet mo stap fogivim Ol Man Isrel taem oli sakem sin blong olgeta.

I gat plante kaen (o ol samting we oli ripresentem) Jisas Kraes insaed long ol stori blong OlTesteman, plante we oli ol woning blong Seken Kaming blong Hem long fiuja olsem we oli raetemdaon insaed long Niu Testeman mo long Buk blong Momon. Stori blong Ebraham mo Aesak oli talemaot God, Papa we i stap sakrifaesem Pikinini blong Hem, Jisas Kraes. Josef i sevem ol brata blong hem from hanggri long saed blong bodi, semmak olsem we Jisas Kraes i sevem yumi aot long hanggri long saed blong spirit. Moses i mekem ol pipol blong hem oli kam fri aot long prisena olsem we Jisas i mekem yumi fri aot long sin. Lod i bin tijim ol pikinini blong Isrel abaot paoa blong fet long Hem mo Atonmen blong Hem insaed long stori blong snek we oli wokem long bras long waelples. Elaeja mo Elisa tufala i hilim ol sikman mo mekem olgeta we oli ded oli laef bakegen.

Ebraham mo Aesak, i kam long Harold Copping, © Look and Learn/Bridgeman Images

Jisas Kraes hem i wan saen insaed long ol stori blong OlTesteman mo insaed long loa blong Moses. Ol stori blong Pasova mo sakrifaes insaed long loa blong Moses oli poen i go long Kraes. Ol stori we oli talemaot misin blong Jisas, ol profet insaed long OlTesteman we oli hilim ol sik man mo mekem olgeta we oli ded oli laef bakegen. Tru long profet Jeremaea, Lod i promesem yumi wan “niu kavenan” (Jeremaea 31:31; luk tu long ves 32).

Insaed long Niu Testeman, Jisas i kam mekem ol loa oli hapen mo ol profet insaed long OlTesteman. Hem i talemaot niu kavenan long Toktok antap long Hil mo Hem i soem ol simpol blong kavenan ia long taem blong kaekae blong Pasova long Las Sapa. Jisas i tijim yumi blong lavem mo givim seves long wanwan long yumi olsem we Hem i bin hilim ol sikman mo mekem olgeta we oli ded oli laef bakegen. Hem i pemaot yumi long sin mo long ded tru long Atonmen blong Hem, mo Hem i stanemap Jos Ia blong Hem long wol ia. Taem yumi luksave Jisas olsem God blong OlTesteman, yumi save andastanem Hem moa gud insaed long Niu Testeman.

Kavenan ia blong Ebraham i ol defren pat blong ol promes mo ol blesing we Ebraham i bin kasem we i gohed kasem dei ia, long “kavenan we i niu mo i no gat en;” we i bin kambak tru long Profet Josef Smit (luk long Doktrin mo Ol Kavenan 132:30–31). Presiden Nelson i tijim se:

“Lod i bin kamkamaot long ol las dei ia blong mekem bakegen kavenan ia blong Ebram. I go long Profet Josef Smit, Masta i talemaot:

“‘Ebraham i bin kasem ol promes long saed blong laen blong hem, mo abaot ol frut blong laen blong hem—mo yu kamaot long laen ia, yu, wokman blong mi, Josef. …

“‘Promes ia, i blong yufala tu, from se yufala i kamaot long laen blong Ebraham’ [Doktrin mo Ol Kavenan 132:30–31].”

Tru long kavenan ia, Lod i krietem wan famli we i stret mo gud we tru long olgeta, Hem i save tijim gospel blong Hem mo karem ol pikinini blong Hem i kam long Jisas Kraes. Aposol Pol i bin tijim yumi se sapos yumi kam long Kraes, yumi kam pat long famli blong Ebraham: “Mo sipos yufala i blong Kraes, ale, yufala i olsem ol laen ya blong Ebraham. Mo bambae yufala i save kasem ol samting ya we God i promes finis” (Galesia 3:29; luk tu long ves 27). Tru long kavenan ia blong Ebraham, ol memba blong Jos Ia blong Jisas Kraes blong Ol Lata-dei Sent, oli kam haos blong Isrel mo laen blong o blesing blong kavenan ia blong Ebraham.

Yumi save lanem abaot rol blong yumi long kavenan ia taem yumi skelem laef blong yumi wetem olgeta insaed long OlTesteman, taem yumi stap stadi long ol promes blong Lod we i go long ol pikinini blong Hem long ol komanmen, mo blong stap lisin long ol profet blong bifo we oli bin askem strong long ol pikinini blong Isrel blong sakem sin mo obei long ol kavenan blong olgeta.

Taem yumi ridim OlTesteman, yumi save lukaotem ol samting we oli soem se Lod i gohed blong kipim ol promes blong Hem we Hem i mekem insaed long kavenan ia blong Ebraham. Ol trifala impoten blesing oli ol graon, we i wan simpol blong wan samting we i blong laen blong kingdom blong Papa long Heven, blong ol fiuja jeneresen, we hem i wan promes blong laef we i no save finis we i stap kam antap, mo ol blesing blong gospel mo prishud, “we oli ol blesing blong fasin blong sevem man, we i laef we i no save finis.” (Ebraham 2:11).

Lod i promesem Ebraham se tru long sid blong hem “bambae mi yusum yu blong blesem ol man blong olgeta narafala kantri long wol” (Jenesis 12:3). Hemia i minim se Jisas Kraes bae i kam long wol ia tru long laen blong Ebraham mo blesem evri kantri long wol tru long Atonmen mo Laef bakegen long ded blong Hem (luk long Galesia 3:16).

Ditel we i kamaot long Getsemane, i kam long J. Kirk Richards, oli no save mekem kopi long hem

?Wanem ol blesing we yu luk long laef blong yu tedei we i kam long yu tru long kavenan ia blong Ebraham?

Folem wetem ol blesing, blong stap pat long kavenan ia blong Ebraham, i gat tu sam tru responsabiliti. Tru long taem we yumi stap stadi long OlTesteman, yumi lanem olsem wanem blong laef folem ol kavenan blong yumi. Olsem famli blong Ebraham, oli singaotem ol memba blong Jos blong karem Isrel i kam tugeta. Taem yumi tekpat long misinari wok, wok blong givhan, tempol wok, ol koling blong Jos, mo taem yumi stap tijim mo lukaot long ol famli blong yumi, yumi stap karem Isrel i kam tugeta taem yu stap tekem ol narawan oli kam moa kolosap long Kraes.

Presiden Nelson i bin tijim, “Eni taem yu mekem eni samting we i helpem eniwan—long tugeta saed blong vel—tekem wan step fored blong stap mekem ol kavenan wetem God mo stap kasem baptaes mo tempol odinens we i nid long bihaf blong olgeta, yu stap help blong karem Isrel i kam tugetal.”