“Sefti insaed long Gospel blong Jisas Kraes We I Bin Kambak,” Liahona, Jenuware 2026.
Ol Woman blong Kavenan
Sefti insaed long Gospel blong Jisas Kraes We I Bin Kambak
Rod blong gobak long God oli makem i klia sapos yumi gat fet mo gat tras long Sevya blong yumi.
From se i gat ol taem we yumi foldaon long sin mo ol situesen blong wol ia, yumi evriwan i fesem filing ia blong go longwe long God we yumi save mo lavem Hem long laef blong yumi bifo laef long wol ia. Hemia i ol fasin blong laef long wol ia. Mekem se, Hem i bin givim long yumi ol wei blong kipim yumi sef mo hang strong long Hem, blong silim hat blong yumi long Hem, mo blong helpem yumi blong muv sef olsem we i posibol, blong go tru long ol denja blong laef long wol ia.
Long taem blong ol bigfala wo, ol ami bae oli save haedem ol maen [kol], o ol bom, andanit long graon. I gat ol bigfala fil blong ol maen [kol] we oli haed i stap mo wan ami bae i no save mo bae i maj i go ova long ol maen ia mo bae i faerap long olgeta.
Afta long ol wo, i gat taosen long ol maen ia we oli no bin faerap we oli stap yet long ples ia, mo plante pipol, we i tekem tu, ol pikinini, oli bin lusum laef blong olgeta o wan han o leg blong olgeta, taem oli no save mo oli go ova long ol fil blong maen ia. Ol oganaesesen oli wok strong blong faenemaot weaples ol maen ia oli stap long hem mo oli bin makem ol fil blong maen ia, mekem se oli bin sevem plante laef.
Laef long Wol Ia i olsem wan fil blong ol maen o ol bom. Enemi i gud tumas blong stap mekem ol samting we i denja i luk olsem wan samting we i no save spolem man mo we i pulum tingting blong man, olsem wan naesfala fil. Hem i stap mekem hemia mo i eksperiensem hemia blong plante taosen yia. Hem i profesonol long saed blong stap mekem ol rod we i naes mo i stap pulum tingting blong man i go long ol risal we i denja mo i mekem hat i soa.
God I Lidim I Go Hom Sef
Papa blong yumi long Heven i save olsem wanem blong kipim yumi sef mo Hem i bin makem rod ia we i lidim yumi i go sef long hom. Yes, i gat plante denja mo ol hadtaem we oli pat blong laef eksperiens blong yumi long wol ia. Be yumi save stap longwe long ol joes we maet i save tekem yumi i kam long ol hevi samting we yumi no nidim mo we oli mekem hat i soa.
Hemia i from wanem Papa blong yumi i bin givim ol komanmen long yumi, presen ia blong Tabu Spirit, ol profet blong lidim yumi mo ol kavenan paoa we i joenem yumi wetem Hem mo Sevya blong yumi tru long ol odinens mo ol kavenan blong tempol. Long ples ia nomo long Jos Ia blong Jisas Kraes we i bin kambak, yumi faenem evri mak mo ol samting ia we i lidim yumi i go sef hom.
I gat ol bigfala blesing blong gat ol profet we oli stap laef tedei. Presiden Hugh B. Brown (1883–1975), wan foma kaonsela long Fas Presidensi, hem i tokbaot wan storian we hem i gat wetem wan memba blong British House of Commons we bifo hem i bin wan jaj. Man ia i talem se hem i ting se God i nomo toktok long ol pipol long wol stat long fas wan handred yia mo Presiden Brown i ansa taem i stap eksplenem long hem abaot Josef Smit mo Restoresen.
“Jaj ia i sidaon mo lisin wetem bigfala intres,” Presiden Brown talem. “Hem i askem sam daerek kwestin mo ol kwestin we i soem se hem i stap lukaotem wan samting mo long en blong intaviu, hem i talem se, ‘Mista. Brown, mi stap tingting plante se, sapos nomo ol pipol blong yu oli glad mo luksave hamas mesej blong yu i impoten tumas. ?Yes? … Sapos yu talem long mi se i tru, hem i nambawan mesej we i kam long wol stat long taem we ol enjel oli bin anaonsem dei we Kraes bae i bon i kam long wol.’”
God i singaotem ol profet from se hem i lavem ol pikinini blong Hem. Tru long ol wokman blong hem, ol profet, Hem i bin talemaot plan ia blong Hem blong sevem man, plan ia blong Hem blong hapines blong givim daereksen long ol pikinini blong Hem. Lod i soem long ol profet, ol sia mo ol reveleta, ol samting we ol narawan oli no save luk. Oli ol wajman long taoa (luk long Esikel 33:1–7) we oli save lukluk i go longwe mo mekem saon blong woning i go long evriwan we bae oli lisin, oltaem oli mekem olsem sam yia bifo samting i hapen. Olgeta oli gat wan ples blong stanap we yumi no gat from komunikesen blong olgeta wetem God olsem ol wokman blong Hem we oli gat atoriti. Hem i wan stamba samting mo i impoten tumas se yumi mas kasem wan strong testemoni blong yumiwan abaot ol profet, ol sia mo ol reveleta we oli stap laef tedei.
Trutok long Jisas Kraes
I stap kam moa had blong luksave wanem i trutok long wol blong yumi tedei. I gat plante voes we oli stap kam long plante daereksen—Instagram, TikTok, Facebook, X, podcasts, ol nius we i givim ol notifikesen mo i gohed olsem. Mo naoia wetem ol masin we oli save mekem samting olsem ol man o woman o AI, long pat ia, i kam moa had blong luksave wanem i tru mo wanem i no tru samting—o iven wanem i ril o no ril! Ol giaman vidio i save mekem man i luk samting olsem se wan man o woman i bin talem o mekem wan samting we oli no bin mekem olsem. Hemia bae i mekem samting i kam moa had blong luksave trutok aot long ol samting we oli no tru long ol yia we i stap kam.
Long taem blong fas konfrens blong hem olsem Presiden blong Jos long Epril 2018, Presiden Russell M. Nelson i bin tijim se:
“Mi mi gat hop long saed blong fiuja Be tu, mi save gud wanem nara samting i stap long ol dei we oli stap kam. Yumi stap laef long wan wol we i gat fulap samting mo raorao i kam antap plante. Sosol media we i stap oltaem, mo ol 24 aoa nius oli stap atakem yumi wetem ol mesej we oli no stop. Sapos yumi mas gat eni hop blong save mekem ol joes aot long plante kaen voes ia mo ol tingting blong ol man we oli stap atakem trutok, yumi mas lanem blong kasem revelesen.
“Sevya mo Ridima blong yumi, Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen. Tru long merikel, bae yumi luk ol saen we God Papa, mo Pikinini blong Hem, Jisas Kraes, Tufala i prisaed ova long Jos ia wetem hae paoa mo glori. Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem
“Mi plis long yufala blong kam antap long paoa blong yufala long saed blong spirit blong kasem revelesen Jusum blong mekem wok long saed blong spirit we bae i mekem yu gat presen we i Tabu Spirit mo harem voes blong Spirit plante taem moa, mo moa klia.”
Insaed long buk blong OlTesteman long Amos 3:7 yumi ridim se, “oltaem, sipos [Lod] i wantem mekem wan samting, hem i stap soemaot ol plan blong hem fastaem long olgeta [profet].” Taem we ol voes blong wol bae oli kam moa strong o laod mo i stap pulum tingting moa, wanwan long yumi i nid blong haremsave smol kwaet voes blong Spirit moa mo moa klia mekem se, yumi harem mo folem daereksen blong Lod tru ol profet we oli stap laef.
God I Lavem Evri Pikinini blong Hem
Insaed long tugeta, Niu Testeman mo Buk blong Momon, yumi ridim se God i semmak yestedei, tedei mo blong oltaem (luk long Hibrus 13:8; Momon 9:9). God i lavem ol pikinini blong Hem long dei blong yumi semmak nomo olsem we Hem i lavem ol pikinini blong Hem long ol taem blong bifo mo from Hem i lavem ol pikinini blong Hem, Hem i mekem ol samting ia naoia olsem we Hem i bin mekem long taem bifo. Hem i makem ol fil blong maen blong laef long wol ia wetem ol komanmen blong kipim yumi stap long sef rod; ol profet blong mekem saon blong woning voes taem oli luk ol denja we i stap long fored; mo ol prishud kavenan we i joenem yumi moa sef i go long God.
Taem yumi putum fet blong yumi long Sevya mo trastem Hem, bae Hem i lidim yumi go sef hom tru long ol smol kwaet toktok blong Tabu Spirit; tru ol skripja blong bifo mo tedei; tru ol voes blong ol profet, ol sia mo ol reveleta blong tedei; mo tru long strong koneksen wetem Hem mo Papa blong yumi long Heven, we oli mekem i kam posibol long yumi tru long ol odinens mo ol kavenan blong tempol.
I no gat wan nara ples we i gat plante daereksen, sefti mo proteksen, filing blong kam oraet bakegen, kamfot, hop long Kraes bitim long ples ia long gospel blong Jisas Kraes mo Jos Ia blong Hem we i bin kambak long wol ia.