Yu No Lus long Sevya

Foto i kam long Allen Garns, wetem raet we Del Parson i givim blong soem peinting blong hem blong Smol Sipsip We I Lus

Wan memba blong famli mo hasban blong hem tufala i disaed blong aot long Jos, folem wetem ol smol pikinini blong tufala. Hemia i wan nius we i mekem famli blong mifala i harem nogud bigwan. Ol wik i pas, mifala i traem blong faenem wanem bae i hapen.

Ol dei afta long anaonsmen blong olgeta mifala i bin fulap wetem bigfala harem nogud, krae, mo ol prea we i kam long hat i go long Papa long Heven. Wan long ol kwik ansa blong ol prea blong mi i we mi nid blong wosip insaed long tempol evri wik. Olsem wan studen mo wan waef we i stap wok mo wan mama, mi luk se ansa ia i had tumas blong mekem, be mi gat strong tingting se mi mas stap obei long smol kwaet voes blong spirit, olsem we i posibol.

Wan naet, afta long wan hadtaem long wok jenis blong mi long taem ia, mi filim strong se mi nid blong go long tempol long naet ia. Mi askem pikinini boe blong mi blong folem mi blong mekem inisietori wok.

Taem mitufala i kasem tempol, mitufala i seraot i go long ol defren wei blong mitufala. Taem mi stap mekem proksi wok blong sam long ol sista, mo stap lisin long ol promes blesing blong olgeta, ol naesfala filing oli fulumap mi. Mi no save karemaot long tingting blong mi abaot ol memba blong famli blong mifala we oli aot long Jos.

Afta we mi finis, mi jenis, mo go stret long rum blong stap wet mo mi sidaon. I no longtaem, mi filim se mi nid blong jenisim ples we mi sidaon wetem wan narawan blong mi save luk boe blong mi taem hem i kamaot long rum blong jenis blong ol man.

Mi muv i go long evri ples be mi filim se tingting blong mi fasfas nomo—kasem mi sidaon long wan am jea we i fesem wol kolosap long doa blong tempol. Mi jes karem skripja nomo mo stap traem blong mekem trabol hat blong mi i kam gud mo taem mi sakem ae blong mi i go antap long wol.

Antap ia, kolosap mi luk wan saes blong peinting blong Sevya olsem we i laef mo i stap holem wan smol sipsip long ol han blong Hem. Kwiktaem Spirit i rimaenem mi se taem ol memba blong famli blong mi we mi lavem tumas we mi filim se oli lus long mi, olgeta oli no lus long Sevya blong yumi.

“?Hu long yufala we i gat handred sipsip blong hem mo wan long olgeta i lus, be hem i no tingbaot? Sapos wan long yufala i lusum sipsip blong hem olsem, bambae hem i mas livim ol naenti naen sipsip blong hem oli stap kakae long open ples, nao hem i mas go lukaot sipsip ya we i lus, gogo i faenem.?

“Mo taem hem i faenem sipsip ya, bambae hem i glad tumas, i mas leftemap sipsip ya blong karem long solda blong hem” (Luk 15:4–5).

Mifala i gohed blong lavem mo prea from olgeta we oli aot long Jos. Be taem we filing blong harem nogud i kam long mi, mi tingbaot eksperiens ia mo stap hop se wan dei, olgeta we oli lus, bae oli faenem rod blong olgeta i kambak wetem help blong Sevya we i gat bigfala lav.