“?From Wanem Bae Mi Komplen?,” Liahona, Jenuware 2026.
Ol Pikja blong Fet
?From Wanem Bae Mi Komplen?
Ol fofala muv blong mifala olsem ol rifuji we i pruvum se hem i wan bigfala tes blong hadtaem. Be mifala i holemtaet aean rel wetem hop se Lod i stap muvum mifala i go fored blong kasem wan fiuja we i moa gud.
Long taem we ples i wom nomo long 2019, mi kasem Spen wetem ol pikinini blong mi, Aaron we hem i gat 8 yia mo Jorge hem i gat 17 yia mo hem i gat wan sik we i mekem hem i no stap toktok gud o sosol wetem ol narafalawan. Wetem ol drim blong mi we mi fulumap insaed long sutkes, mi hang strong long God mo gat tras long Hem fulwan.
Wan gudfala man samari i givim welkam long mifala long haos blong hem, long ples ia mifala i stap blong tu wik. Be blong karemaot Jorge long ples blong hem we hem i save gud i no bin isi. From situesen blong hem, hem i stap folem ol strik kondisen. Long ol fasfala naet blong hem, hem i stap bang bangem wol blong haos, mo kwiktaem bae mi wekap mo stopem hem blong i no mekem ol narawan oli wekap. Mi nildaon kolosap long hem mo prea, stap tingbaot Aesea 41:10: “Yufala i no fraet; Mi mi stap wetem yufala. Mi mi God blong yufala, Yufala i no seksek; mi bambae mi mekem yufala i strong, Mi bambae mi givhan long yufala. Mi bambae mi blokem gud yufala, mi sevem yufala.”
Long nambatu wiken blong mifala long Spen, mifala i kasem jos long semmak taem we sakramen miting i stap finis. Mi kam kolosap long wan yang woman we i stap wetem ol pikinini long Praemeri mo eksplenem se mi wan memba blong Jos be mi no save eniwan. Hem i introdiusum mifala long sam narafala memba.
Long nekis dei, siti kaonsel blong Zaragoza oli akseptem mifala olsem ol rifuji mo tekem mifala i go long wan apatmen we i no gat wota o lektrisiti. Bisoprik, Rilif Sosaeti mo kworom blong ol elda long wod we mifala i stap go long hem oli bin kam blong givim help wetem sam blangket, kaekae we i no nid blong mekem i hot, ol klos blong kolkol mo sam nara samting we bae mifala nidim bigwan.
Ol pikinini blong mi oli stat blong skul mo mi stat blong tekem wan trening lesen. Ol taem blong kakae i wan jalenj long Jorge we hem i mas kakae oltaem long medel dei. Tija blong hem i letem mi save se nomata long huia we i tij be taem we klok i soem se i lanj taem, hem i mas tekemaot kaekae blong hem mo stat blong kakae.
“Mi Tu Mi Stap Go Hariap Tumas”
Ol fofala muv blong mifala i pruvum se hem i wan bigfala hadtaem. Mi prea blong stap strong be oltaem mi luk se mi stap krae miwan. Blong plante wik, mi silip blong tu o tri aoa nomo long wan naet. Afta sam dei we mi stap lukaotem wok, mi kasem blesing ia blong faenem wan wok we i blong stap kea long wan yang woman we i kasem kansa long bren. Afta long evri taem blong wok, mi go tekem ol pikinini blong mi, helpem tufala wetem ol stadi blong tufala mo afta mekem trening homwok blong mi.
Mi kea long naesfala yang woman ia blong wan yia, kasem taem we hem i ded long long 48 yia blong hem mo i lego biaen tu smol pikinini blong hem. Situesen blong hem i mekem mi tingting mo askem miwan se, “?From wanem bae mi komplen?” Blong stap kea long hem, i bin mekem se mi save helpem mifala wetem ol nid blong mifala mo sol blong mi i fulap long ol tangkyu long Papa blong mi long Heven.
Evri dei long hom mifala i ridim ol skripja, prea mo mekemap wan taemtebol blong lukaot long Jorge. Long eli 2024, mifala stat blong stap mekem mifala i rere blong go long Madrid Spen Tempol. Blong kam moa kolosap long Papa long Heven, mi filim se mifala i mas livim kaekae olsem wan famli. Aaron i agri, mo long nekis moning, Jorge i talem long mi, “Mama tedei bae mi livim kaekae tu.” Hem i wan taem we mi no save olsem wanem blong tokbaot glad blong mi.
“Blong kam moa kolosap long Papa long Heven taem mifala i stat blong mekem mifala i rere blong go long Mandrid Spen Tempol, mi filim se mifala i mas livim kaekae olsem wan famli,” Yesmin i talem. Jorge i talem long mi ,‘Mama tedei bae mi livim kaekae tu.’ Hem i wan taem we mi no save olsem wanem blong tokbaot glad blong mi.
Stat long taem blong visit blong mifala i go long tempol, Jorge i kam gud bigwan. Hem i no strik tumas wetem evri samting we hem i mas mekem from sik blong hem ia. Long ol Satedei hem i rere long ol klos blong hem mekem se hem i save rere blong pasem sakramen long Sandei. Hem i progres bigwan long ol skul wok blong hem.
Tedei mifala i save givhan long mifalawan, tru long sapot blong wan Papa long Heven we i gat bigfala lav. Jisas Kraes i bin leftemap mifala aot long graon (luk long Aesea 61:3). Taem mifala i stap pem taeting blong mifala, mifala i bin kasem plante blesing. Mifala i holem strong aean rel (luk long 1 Nifae 8:24, 30; 11:25; 15:23) wetem tingting mo hop se mifala i stap muv i go fored blong kasem wan fiuja we moa gud.