Fasin blong Stap Fetful mo Ol Profet—Bifo mo Naoia

Hem i nomol se oltaem Setan i lukaotem blong daonem fasin blong gat tras long ol profet mo ol aposol. Be no mata long evri samting ia, truaot long histri, olgeta oli bin stap olsem ol bigfala witnes blong talemaot nem blong Jisas Kraes i go raon long wol (luk long Doktrin mo Ol Kavenan 107:23).

Long taem blong yumi, enemi i lukaotem blong mekem i had wanem we Presiden Russell M. Nelson i singaotem “samting we i moa impoten we i stap tekem ples long wol tedei,” hem i kam tugeta blong Isrel, we i mas tekem ples bifo Seken Kaming blong Jisas Kraes. Ol profet mo ol aposol oli holem ol ki blong kam tugeta ia. From hemia, oltaem oli stap fesem fasin blong agens.

Nomata sapos hem i long taem bifo o long ol las dei ia, Setan i faenem ol wei blong giaman long ol kavenan pikinini blong God blong oli faet agensem Ol Aposol blong Smol Sipsip, bifo mo naoia (luk long 1 Nifae 11:34–36).

Hemia faef prinsipol we i save helpem yumi blong no foldaon long trap ia.

Fet long Lod Jisas Kraes

Faswan long olgeta prinsipol ia hem i fas prinsipol tu blong gospel: fet long Lod Jisas Kraes mo Atonmen blong Hem.

Fet hem i wan paoa we i pulum wan strong i go from wan daereksen. Presiden Jeffrey R. Holland, Akting Presiden blong Kworom blong Olgeta Twelef Aposol, i bin tijim se oltaem fet i poen i go long fiuja.

Taem we fet blong yumi long Kraes mo tras blong yumi long God i kam antap, yumi “lukluk i go fored wetem wan ae blong fet, mo luksave” ol promes blong Olgeta i kam tru (luk long Alma 5:15; luk tu long Mosaea 18:21; Alma 32:40). Long taem blong selebresen blong “Be One” we i blong makem 40 aniveseri blong 1978 revelesen blong prishud, Presiden Dallin H. Oaks, Fas Kaonsela long Fas Presidensi, i bin invaetem evriwan blong “oli lukluk fored i go fored long yuniti blong fet blong yumi mo gat tras long promes blong God [luk long 2 Nifae 26:33].”

Lukluk fored nomo ia i muvum yumi i go blong mekem i hapen promes blong Presiden Nelson long semmak taem ia blong “pis we i stret gud evriwan mo kwaet gud.” mo long dei we, Presiden Henry B. Eyring, Seken Kaonsela long Fas Presidensi i bin tijim se “Lod Jehova bae i kam blong stap laef wetem olgeta we oli bin kam ol pipol blong Hem mo bae Hem i faenem olgeta oli gat yuniti, blong wan hat, stap wan wetem Hem mo wetem Papa blong yumi long Heven.”

Wanem we i defren i we, Setan i stap lukaotem blong mekem hat blong ol pikinini blong God i kam strong blong mekem se oli stak wetem lukluk nomo we i go biaen, stap laef long ol samting mo ol situesen we i pas finis, ol stetmen o ol tijing—iven olgeta we ol profet mo ol aposol tedei oli tokbaot i klia gud. Taem we “man ya we i agensem ol brata … we long dei mo naet” (Revelesen 12:10), hem i talemaot ol poen blong hem agensem ol profet mo aposol blong God mo ol tijing blong olgeta. Hemia i mekem klia se fet i kam slak long stamba witnes blong olgeta, Jisas Kraes—man we devel i wantem spolem.

Ol stetmen blong fasin blong gat yuniti, pis mo stap wan long evri samting long taem blong Ol Aposol tedei oli klia se taem Setan i waes blong stap mekem raorao i girap mo fasin blong no gat yuniti, hemia i taem blong evri kavenan pikinini blong God (luk long 1 Nifae 11:34–36) blong oli kam wan blong stap tekem long olgeta mo tekem aksen folem ol trutok we i no save finis, we God i stap talemaot tru long ol profet mo ol aposol blong Hem. Sapos yumi mekem olsem, bae yumi kam ol pipol we yumi save wok wan, stap glad, gat paoa, mekem kavenan, fulap long fet, mo nogat tingting long fasin blong lukluk nogud wan from kala blong skin, long jenda blong wan, lukluk nogud long wan from kalja blong hem, o mekem ol nara samting we i no givim pis.

Ol tijing blong ol profet mo ol aposol oli givim insperesen abaot yuniti mo fet ia long Jisas Kraes we i tru, we oltaem bae i muvum yumi i go long fored.

Moronae i bin luk dei blong yumi mo tijim olsem wanem blong yumi protektem yumi agensem fasin blong talem nogud ol profet mo ol aposol: prinsipol blong no tok agensem o blong stap jajem nara man.

“No tok agensem mi from mi no stret evriwan,” Moronae i talem, “mo papa blong mi tu, from hem i no stret evriwan mo tu olgeta ia we oli bin raet bifo hem; be i moa gud se yufala i talem tangkyu long God we hem i bin soemaot long yufala, ol samting blong mifala we i no stret evriwan, blong mekem se yufala i save lanem blong stap moa waes bitim we mifala i bin stap” (Momon 9:31; oli ademap italik).

Long narafala toktok, yumi lukluk nomo mo lan long ol tijing mo ol witnes blong ol profet mo ol aposol abaot Kraes mo gospel blong Hem mo stop blong lukaotem ol samting we oli mekem we i no stret evriwan. Truaot long histri, God i talemaot sam long ol samting we i no stret evriwan, from i blong gud blong yumi mo blong helpem yumi blong lanem blong stap waes moa. Mi talem tangkyu long Hem blong mekem olsem.

Be yet, yumi mas lukaot gud. Long Epril 2019 jeneral konfrens, Presiden Eyring i kwotem tijing ia blong Presiden George Q. Cannon (1827–1901), Fas Kaonsela long Fas Presidensi: “God i bin jusum ol wokman blong Hem. Hem i klemem se hem i raet blong Hem blong panisim olgeta, sapos i nid blong panisim olgeta. Hem i no givim hemia long yumi wanwan blong tokbaot man mo tok agensem olgeta. I no gat man, nomata se hem i strong long fet, i nomata se hem i hae olsem wanem long Prishud, oli save tokbaot nogud olgeta we Lod i jusum, mo faenem rong long atoriti blong God long wol ia, mo no mekem Hem i no glad. Tabu Spirit, bae i kamaot long kaen man olsem, mo bae hem i go long tudak. From se i olsem, ?yu yu no luksave hamas hem i impoten blong yumi mas lukaotgud?”

Yu mo mi i gat ol blesing blong Lod mo oli givim oda folem ol tijing mo aksen blong profet, we i tekem tu, eni samting we maet yumi luk se i had tumas blong andastanem o akseptem:

“Yufala i mas folem gud evri toktok mo komanmen blong hem we bambae hem i givim long yufala olsem we hem i stap kasem olgeta, mo stap wokbaot long tabu fasin long fored blong hem;

“From toktok blong hem bambae yufala i kasem, semmak olsem se hem i kamaot long maot blong Lod Hemwan, wetem fasin blong save wet longtaem mo wetem fet” (Doktrin mo Ol Kavenan 21:4–5; oli ademap italik).

Bakegen, yumi no mas tok agensem o jajem nara man (luk long Matiu 7:1–2). Olsem we mi bin muv i go fored wetem fet long Jisas Kraes mo talem tangkyu from ol blesing blong ol profet mo ol aposol, mi bin kasem plante blesing (luk long Doktrin mo Ol Kavenan 21:6).

Wan narafala ki prinsipol i blong stap longwe long tingting ia blong no mekem samting i ova long atoriti blong yumi o tingting long ol responsabiliti we yumi no gat. Ol tingting olsem oli giaman long yumi blong ting hae long ol tingting blong yumiwan, we long nomol wei, hemia i stap hapen taem yumi tingdaon long ol tijing blong ol profet mo aposol. Blong stap tok agensem ol profet mo ol aposol, we i tekem tu olgeta blong bifo, i klia gud se hemia i ova long atoriti blong yumi, from we Lod i sevem paoa ia i blong Hemwan. Mi trastem fulwan se Sevya blong yumi we i save gud evri samting, i gat lav mo i gat sore, i bin tokbaot o bae i tokbaot mo wantem tumas blong fogivim eni mistek o ol samting we i no stret evriwan long taem bifo, olsem we yumi hop se Hem bae i mekem blong yumi long taem blong yumi tedei.

Wan narafala eksampol blong soem se yumi stap ova long atoriti blong yumi i blong pikjarem long maen blong daerektem ol profet mo ol aposol long wanem aksen nao Jos i mas folem o olsem wanem blong rulum jos. Hemia i responsabiliti blong Lod, i no blong yumi (luk long Doktrin mo Ol Kavenan 28:2–7). Be, from tingting we yumi wantem blong mekem, blong stap tok agensem o tingting blong wantem daerektem ol profet mo ol aposol, tugeta i kam long fasin blong hae tingting mo i lid i go long fasin blong giaman mo stop blong folem atoriti blong profet.

Stat long 1820 kasem tedei, God i gohed blong givim instraksen long ol profet, ol sia mo ol reveleta blong Hem tru long proses blong revelesen, mo from hemia nao i wei we Hem i lidim Jos Ia blong Hem.

Presiden Nelson i tijim se:

“Taem mifala i stap mit olsem wan Kaonsel blong Fas Presidensi mo Kworom blong Olgeta Twelef Aposol, ol miting rum blong mifala oli olsem ol rum blong revelesen. Spirit, i stap we bae yu save tajem Hem. … Nomata we bae mifala i gat ol defren wei blong lukluk, lav we mifala i filim long wanwan long mifala i stap oltaem. Yuniti blong yumi i helpem yumi blong luksave tingting blong Lod from Jos blong Hem.

“Long miting blong mifala, !bigfala namba i neva win! Mifala i lisin, wetem prea, from wanwan long mifala, mo storian wetem wanwan long mifala kasem taem mifala i kam wan.”

Elda D. Todd Christofferson blong Kworom blong Olgeta Twelef Aposol i eksplenem se: “Aedia blong kasem hemia i no simpol nomo olsem wan AI masin we i stap long medel blong ol memba blong kaonsel, be i kam tru long revelesen we i kam long God. Hem i wan proses we i tekem tugeta, risen mo fet blong save maen mo tingting blong Lod.”

Prinsipol ia we i kambak mo i stret sefti we i mekem fasin blong gat tras i kam antap long paoa blong ol lida blong yumi tedei blong oltaem oli rulum Jos folem tingting blong Lod.

Yes, Jisas Kraes i stanap olsem Hed blong Jos Ia blong Hem, mo Hem i givim daereksen long ol profet blong Hem. Wanem we yumi save kam blong luksave olsem ol samting we oli no stret evriwan long toktok o ol aksen blong olgeta, i tru, i soem ol samting we oli no stret evriwan long lukluk blong yumi o andastaning blong yumi long laef blong yumi long wol ia. Blong stap tingbaot se ol wei blong Lod oli moa hae bitim ol wei blong yumi mo se ol tingting blong Hem oli moa hae bitim ol tingting blong yumi (luk long Aesea 55:8–9) i letem yumi blong stop blong stap jajem ol profet, mo olgeta tu blong bifo. Fasin ia blong putum tingting i stap daon i mekem se yumi save lisin gud long ol toktok blong ol profet we oli stap laef “wetem fasin blong save wet longtaem mo wetem fet” (Doktrin mo Ol Kavenan 21:5; luk tu long 1:28).

Mo tu, i helpem yumi blong kasem moa revelesen, hop mo fet long Kraes, long wan wol we i stap kam had bigwan. Jekob i bin tijim se, “Taswe, mifala i stadi long ol toktok blong ol profet mo mifala i kasem plante revelesen mo spirit blong profesi; mo from mifala i gat ol witnes ia mifala i kasem wan hop; mo fet blong mifala i kam we i nomo seksek” (Jekob 4:6). Sapos yumi putum tingting i stap daon, ol eksperiens ia oli save tekemaot tingting blong hat blong yumi we i wantem blong faenem rong long ol profet mo ol aposol, mo tu, olgeta blong bifo (luk long Doktrin mo Ol Kavenan 88:124; 136:23). Fasin blong putum tingting i stap daon i helpem yumi blong “lukaotem ol profet” from ol trutok we i mekem glad mo pis blong yumi i kam antap mo blong no lukaotem ol samting we oli no stret evriwan long olgeta.

Long Spirit ia, mi serem sam witnes mo lav blong mi se ol profet stat long Josef Smit i kam kasem tedei oli ol profet blong God folem wan laen we i no save brok kam kasem Presiden Russell M. Nelson. Hem i bin wan bigfala blesing blong mi blong “lukaotem ol profet” mo blong kam kolosap moa long God tru long ol tijing blong wanwan long olgeta.

Mi tru witnes blong mi long olgeta we oli singaotem olgeta i go long tabu wok blong wan aposol anda long daereksen blong ol profet ia, oli bin mo oli ol spesel witnes blong Jisas Kraes raon long ful wol. Hem i wan spesel janis ia blong luk mo muv i go fored long Jisas Kraes tru long ol tijing blong ol witnes ia.