“Seves Olsem Hemia blong Kraes I Mekem Ol Hat Oli Kam Sofsof, Openem Ol Doa long Corsica,” Liahona, Jenuware 2026.
Seves Olsem Hemia blong Kraes I Mekem Ol Hat Oli Kam Sofsof, Openem Ol Doa long Corsica
Blong stap givim help long olgeta we oli stap laef long ples ia long eni wei we oli save, ol misinari oli go long medel blong wol long ol aelan ia, oli gat strong tingting blong invaetem ol pipol blong kam long Kraes.
Meya blong Bastia i bin save gud se ol misinari we oli stap stanap long fored blong hem oli kam long ol defren kantri. Hem i stap tingting se, ?from wanem ol yang man olsem we oli blong ol narafala kantri oli kam blong givim help long ol pipol blong hem long Corsica?
Hem stop smol taem, hem i akseptem wanem we oli stap mekem mo jalenjem olgeta blong kam eli long nekis moning blong peintem smol hotel blong hem.
Oli stap tru long stamba tingting blong olgeta, ol yang man ia oli kam long 7:00 klok long moning, wetem strong tingting mo rere blong wantem fanisim ol samting insaed long hotel blong meya long naesfala aelan aotsaed long Franis long Medel blong Bigfala Solwota.
Taem we meya i kam long hotel long dei ia blong faenemaot spos ol misinari oli stap wok yet long san long saed blong solwota, “hem i sapraes tumas blong luk mifala long ples ia,” Jake Lowry i bin talem, wan long ol misinari we i bin stap givim seves long tetaem ia.
Hem i sapraes long tingting blong hat blong olgeta blong wantem blong benem bak blong olgeta blong helpem ol pipol we oli no save, meya i mekem hat blong hem i sofsof mo i “askem mifala blong sidaon mo talem long hem wanem mifala i nidim,” Brata Lowry i talem.
Ol misinari oli bin serem gospel, mo talem se stamba tingting blong olgeta i blong blesem ol pipol blong ol aelan blong solwota long Corsica. Oli talemaot hadtaem we oli stap fesem blong lukaotem wan apatmen, from ol man long ples ia oli fraet blong akseptem man defren ples blong stap wetem olgeta. Sam manis i jes pas, oli bin karemaot evri misinari aot long aelan from sam sefti risen. Be naoia, ol elda ia oli bin openem bakegen from misinari wok.
Meya ia i lisin long ol elda. “Long nekis moning,” Brata Lowry i talem, “hem i bin faenem wan apatmen we i stap long wan gudfala ples we i sef blong mifala mo i bin raetem wan naes notis.”
Long naet ia, afta we oli kam stap long niufala apatmen blong olgeta, “tu man we tufala i ripresentem ofis blong meya, tufala i dresap gud, tufala i kam blong talem halo mo givim hop long mifala se mifala i welkam mo sef insaed long siti,” Brata Lowry i bin talem.
Kwiktaem, meya mo waef blong hem tufala i stat blong stap kam long ol Sandei miting wetem branj, long ples ia tufala i laekem tumas blong stap singsing ol hym. I no longtaem, waef blong meya i kasem baptaes.
Gudfala Graon
Stat long ol simpol samting we oli stap hapen long stat long eli 1990, Jos i stanap strong long aelan ia we plante oli stap tokbaot se ples we Napoleon Bonaparte i bon long hem. Misinari wok i stat blong kam antap gud. Afta long tri manis, moa long 40 pipol oli stap atendem ol Sandei seves insaed long wan naesfala miting ples we meya i arenjem.
“Blong stap lukluk i gobak, yumi save luk se han blong Lod i bin stap olsem wan pruf long taem mo long ol aksen we oli tekem blong stap stanemap Jos long aelan blong Corsica,” Richard W. Thatcher i bin talem, long taem ia hem i misin presiden blong France Marseille Mission, we naoia hem i France Lyon Missin.
Be blong putum wan leg long aelan i no bin isi. Long stat, i tekem efot blong putum ol misinari i go wetem fasin blong stap agens mo ol strong toktok we i denja. “Ol fas samting we oli stap gohed blong hapen, olsem blong no stap gud fren o go agens, mo fasin blong no trastem Franis, mo ol polisi blong Franis, i bin kam antap long eli 1990,” Brata Thatcher i bin talem.
Ol man ples Corsica oli soem fasin blong no laekem ol man we oli kam long nara kantri, mo oli stap mekem ol bom long hom blong smasem gud ol bisnis mo propeti blong olgeta we oli blong narafala kantri. “Hem i nomol oltaem blong stap harem plante bom i stap faerap evri dei insaed long siti,” Elda Darin Dewsnup i bin talem afta. Mifala i no blong Franis mo tu, mifala i no blong Corsica tu.”
Oli givim ol woning long ol misinari abaot ol denja mo taem wan bom i faerap long neba eria blong olgeta, oli karemaot ol fofala misinari long aelan i go long wan narafala pat blong misin long mein graon blong Franis.
“Ol misinari blong mifala oli nomo stap long aelan,” Brata Thatcher i bin talem, mo stap talem se problem ia, i bin givim wan janis blong lan mo fasin blong kam antap.
Seves Olsem Hemia blong Kraes I Bin Ansa Ia Nao
Blong andastanem moa gud ol stamba tingting blong heven, ol misinari oli komitim olgeta blong stadi long laef mo ministri blong Sevya blong lanem moa gud ol wei blong Hem. Oli stadi long ol aksen blong seves blong Hem mo fasin blong Hem blong gat sore mo lav long ol narawan, we i tekem tu, fasin blong stap fidim, hilim mo stap soem lav. Oli endem blong talem se seves i impoten blong kasem tras blong ol pipol mo blong stap givim seves long wei blong Lod.
Wetem tingting we oli putum bakegen blong lukluk nomo long fasin blong givim seves bakegen, oli bin sendem tri misinari blong openem bakegen wok long Corsica long Maj 1992. Be naoia, oli sendem olgeta i go long nambatu bigfala siti, Bastia. Long ples ia oli tingting strong blong mitim ol pipol long wan nomol fasin be i no blong stap noknok long ol doa, we samtaem i mekem ol manples ia oli gat fraet.
“Ol prea blong mifala oli kasem ansa. Mifala i kam blong luksave se seves i save soemaot tru tingting blonghat blong mifala long komuniti mo mekem hat blong ol pipol we oli no akseptem ol nara pipol blong nara kantri, i kam sofsof,” Brata Thatcher i bin talem.
Ol niufala misinari oli introdiusum olgetawan long ol pipol we oli stap long ples ia taem oli stap givim help long eni wei we oli save mekem. Oli karemaot ol rabis gras we i gro long ol garen, oli fiksim ol trak mo long situesen blong meya, oli peintem gud bakegen hotel blong hem. Oltaem oli mekem fren, mo ol pipol oli glad long ol hadwok blong olgeta. Oltaem bae oli askem olgeta blong sidaon mo drink wan kap blong “limonata” (lemonet) mo blong “talem long mifala abaot jos blong yufala,” Brata Thatcher i bin talem. I no longtaem, “ol laki situesen blong mifala oli kam tru.”
Wan riferol we oli givim faswan i lid i go long wan baptaes blong famli Lota, we afta, i lid i go long wan nara riferol we oli givim. Taem we ol misinari oli kam insaed long hom blong riferol ia, mama blong famli we i bin stap prea blong save trutok i “foldaon long ni blong hem mo i krae blong talem tangkyu long Lod blong ansarem ol prea blong hem.”
Katemdaon Fasin blong Gat Difren Lukluk
Fas seves we oli bin mekem long Bastia, ol misinari oli bin volontia long mein Katolik hospital, be bigfala man blong Katolik we i responsibol long ples ia i no akseptem seves blong olgeta taem hem i faenemaot relijin blong olgeta. Hem i no wantem akseptem olgeta we oli gat defren bilif blong oli tekpat insaed long hospital.
Sam manis i pas, long Mei 1992, wan bigfala pat blong futbol stedium i foldaon long taem blong wan jiampionsip maj blong futbol, we i kilim ded 19 man mo i sendem taosen long ol pipol ia we oli kam wajem gem i go long hospital.
Taem wan futbol stedium i foldaon long Corsica, mo i kilim ded 19 mo givim kil long taosen pipol we oli kam wajem gem, ol misinari oli spendem ol longfala aoa blong stap help blong supavaesem olgeta we oli nidim imejensi kea long lokol hospital.
Foto i kam long Craig Peterson
Olgeta we oli kasem kil oli fulumap hospital. Olgeta we oli laekem tumas futbol mo oli kasem kil, oli fulumap ol rum mo ol ples blong wokbaot insaed long hospital. Oli sendem sam oli flae long plen i go long meinlan long Franis blong kasem tritmen. Bigfala man blong Katolik ia i wantem tumas olgeta we oli save volontia, i tingbaot wan kad we ol misinari oli bin livim wetem hem mo hem i ringim olgeta blong oli kam help.
Blong 36 aoa, ol misisna ia oli ronron long wan wok i go long nara wok, blong stap helpem ol defren pipol we oli nidim imejensi kea, olsem blong hangem ol botel long olgeta, fasem ol strap blong stopem blad, blong stap klinim ol rum mo stap help blong muvum olgeta we oli kasem kil. Oli givim ol prishud blesing long ol memba blong branj we oli kasem kil long taem we stedium i foldaon.
Taem we bigfala man blong Katolik i luk ol hadwok blong ol misinari we i gogohed , hem i singaotem olgeta i kam tugeta mo lidim olgeta i go raon long hospital, mo stap talem long ol sikman se ol misinari oli ol man blong God mo blong oli letem olgeta blong givhan long olgeta we oli gat sik.
Brata Thatcher i tingtingbak mo talem se: “Mifala i kasem respek mo fasin blong luksave mo glad long ol wok blong mifala tru long wan bigfala man blong siti mo wan impoten eklesiastik man we i gat atoriti, tru long seves blong mifala.” Hem i talem se, hemia i mekem ol hat oli kam sofsof mo i help blong karemaot fasin blong no akseptem narafala man insaed long komuniti. “Hemia i impoten tumas long sakses blong ol hadwok blong mifala blong stap proslaet.”
Jason Soulier, presiden blong Franis Lyon Misin long 2024, i bin talem se: “Tedei ol merikel blong kam antap long Corsica i stap gohed, nomata long ol problem. Long 2024, 14 long ol memba blong Bastia Branj oli travel i go long Paris Franis Tempol blong oli mekem ol tempol wok blong plante dei, wan bigfala grup ia blong aelan ia we i stap hemwan long medel blong bigfala solwota, blong go long wan tempol. Wetem help blong ol senia kapol mo blong faevfala strong elda mo sista misinari, Lod i gohed blong blesem paradaes aelan ia wetem ol niu konvet.”