« កាលអំពើបាបបង្កនូវភាពវឹកវរ នោះព្រះគ្រីស្ទនាំមកនូវភាពសុខសាន្ត » លីអាហូណា ខែមករា ឆ្នាំ២០២៦ ។
មកពី យុវមជ្ឈិមវ័យ ប្រចាំសប្តាហ៍
កាលអំពើបាបបង្កនូវភាពវឹកវរ នោះ ព្រះគ្រីស្ទ នាំមកនូវភាពសុខសាន្ត
សូម្បីតែនៅក្នុងភាពវឹកវរនៃជីវិត ព្រះគ្រីស្ទអាចនាំមកនូវពន្លឺ របៀបរៀបរយ និងភាពសុខសាន្តដល់ព្រលឹងរបស់បងប្អូនបាន ។
រចនារូបភាពដោយ ខេត ប៊ីច
តើជីវិតធ្លាប់មានអារម្មណ៍ថាវឹកវរ … បន្តិចឬទេ ?
ការមានអារម្មណ៍វឹកវរគឺជាអ្វីមួយដែលយើងទាំងអស់គ្នាជួបប្រទះនៅពេលណាមួយ ។ ភាពស្មុគស្មាញរបស់ពិភពលោកនេះធ្វើឲ្យវាងាយស្រួលក្នុងការភ្លេចថា យើងគឺជាវិញ្ញាណដែលមានបទពិសោធន៍នៃជីវិតរមែងស្លាប់—ជាអ្វីដែលយើងមិនធ្លាប់ធ្វើពីមុនមក ។
អំណោយទានអព្ភូតហេតុពីរដែលព្រះបានប្រទានឲ្យដល់យើង គឺរូបកាយ និងសិទ្ធិជ្រើសរើស ។ អំណោយទានទាំងនោះអនុញ្ញាតឲ្យយើងមានអារម្មណ៍ បំណងប្រាថ្នា និងធ្វើសកម្មភាពសម្រាប់ខ្លួនឯង ។ ដោយតាមធម្មជាតិ រឿងខ្លះអាចមានអារម្មណ៍ថារញ៉េរញ៉ៃ ឬមិនប្រាកដប្រជា ដោយសារតែជម្រើសរបស់មនុស្សខាងសាច់ឈាមអាចងាយនឹងធ្វើ ។
យើងទាំងអស់គ្នាធ្វើកំហុស ។ ប៉ុន្តែនៅពេលយើងពុះពារជាមួយនឹងអំពើបាប ឬទម្លាប់ដែលយើងហាក់បីដូចជាមិនអាចយកឈ្នះបាន ទោះបីជាយើងព្យាយាមដើម្បីផ្លាស់ប្តូរយ៉ាងណា វាងាយស្រួលក្នុងការមានអារម្មណ៍ច្របូកច្របល់ណាស់ ។ ផ្នែកម្ខាងនៃវិញ្ញាណរបស់យើងទាញឆ្ពោះទៅកាន់ស្ថានសួគ៌ ហើយផ្នែកម្ខាងទៀតនៃជីវិតរមែងស្លាប់ទាញយើងឆ្ពោះទៅកាន់លោកិយ នោះក្នុងចិត្តអាចមានអារម្មណ៍ថាដូចជាទាញទៅទាញមកឥតឈប់ឈរ ។
មិនថាយើងខិតខំពុះពារជាមួយបញ្ហារឿងដូចជា ការនិយាយដើមគេ កំហឹង ការវិនិច្ឆ័យគេមិនត្រឹមត្រូវ ការលេងជាមួយប្រព័ន្ធផ្សព្វផ្សាយច្រើនពេក ការមើលរូបអាសអាភាស ឬអ្វីៗផ្សេងទៀតនោះទេ មារសត្រូវនឹងធ្វើឲ្យមានភាពអាម៉ាស់ ភាពអស់សង្ឃឹមកើនឡើងយ៉ាងឆាប់ ហើយទីបំផុតឈានទៅរកភាពវឹកវរខាងវិញ្ញាណ ។
សំណាងល្អសម្រាប់យើង ព្រះវរបិតាសួគ៌ និងព្រះយេស៊ូវគ្រីស្ទជ្រាបដឹងពីរបៀបដោះស្រាយភាពវឹកវរ ។
ការស្វែងរកពន្លឺរបស់ទ្រង់គឺជាជំហានដំបូងគេ
ក្នុងអំឡុងពេលការបង្កបង្កើត—ការចាប់ផ្តើមនៃអ្វីៗគ្រប់យ៉ាងដែលយើងស្គាល់—ពិភពលោកត្រូវបានពិពណ៌នាថាស្ថិតនៅក្នុងស្ថានភាពវឹកវរ មិនមានការរៀបចំ ៖ « ផែនដីបានខូច ហើយនៅទទេ មានសុទ្ធតែងងឹតនៅគ្របលើជំរៅទឹក » ( លោកុប្បត្តិ ១:២ ) ។ ភាពវឹកវរ និងភាពងងឹតដ៏អស់សង្ឃឹមនេះរំឭកពីរបៀបដែលមារសត្រូវអាចធ្វើឲ្យយើងមានអារម្មណ៍បែបនោះនៅពេលយើងមានបាប ឬធ្វើការជ្រើសរើសដែលប្រឆាំងនឹងតម្លៃរបស់យើង ។ មារសត្រូវចូលចិត្តធ្វើឲ្យយើងមានអារម្មណ៍ជាប់ជំពាក់ ហើយជាញឹកញាប់លើកទឹកចិត្តយើងឲ្យលាក់ខ្លួន ។
ប៉ុន្តែដូចស៊ីស្ទើរ ថាម៉ារ៉ា ដបុលយូ រូនៀ ទីប្រឹក្សាទីមួយក្នុងគណៈប្រធានក្រុមយុវនារីទូទៅ បានបង្រៀន « ព្រះយេស៊ូវគ្រីស្ទប្រទានពន្លឺដល់អស់អ្នកដែលអង្គុយនៅក្នុងភាពងងឹត ។ ដូច្នេះ នៅថ្ងៃទាំងនោះ នៅពេលបងប្អូនទទួលអារម្មណ៍ពីសំឡេងនោះប្រាប់បងប្អូនឲ្យពួន ថាបងប្អូន គួរតែ ពួននៅក្នុងបន្ទប់ងងឹតនៅតែម្នាក់ឯង នោះខ្ញុំសូមអញ្ជើញបងប្អូនឲ្យមានសេចក្តីក្លាហាន ហើយជឿលើព្រះគ្រីស្ទ ! ដើរទៅ ហើយបើកភ្លើង—ជាពន្លឺដ៏ឥតខ្ចោះនៃសេចក្តីសង្ឃឹម » ។
នៅក្រោមការដឹកនាំរបស់ព្រះ ក្នុងអំឡុងពេលការបង្កបង្កើត រឿងដំបូងគេដែលព្រះយេស៊ូវគ្រីស្ទបានធ្វើដើម្បីបំបាត់ភាពងងឹតនៃភាពវឹកវរ គឺនាំមកនូវពន្លឺ ( សូមមើល លោកុប្បត្តិ ១:៣; ម៉ូសេ ២:២–៥ ) ។ ចេញពីទីនោះ ទ្រង់បានយាងបន្តរៀបចំគ្រប់ផ្នែកដែលវឹកវរចាប់តាំងពីស្ថានសួគ៌ដ៏ធំរហូតដល់សំណាបតូចៗបំផុត ។
ប្រសិនបើទ្រង់អាចនាំមកនូវសណ្តាប់ធ្នាប់ដល់សកលលោកនេះ សូមស្រមៃមើល តើអ្វីដែលអាចកើតឡើងនៅពេលដែលបងប្អូនបែរទៅរកព្រះរាជបុត្រារបស់ទ្រង់សម្រាប់ព្រះចេស្តានៃការព្យាបាល និងការប្រោសលោះជារៀងរាល់ថ្ងៃនោះ ។ នៅពេលបងប្អូនមានអារម្មណ៍ថាមានបន្ទុកដោយសារបញ្ហារបស់បងប្អូន និងភាពងងឹតនៃពិភពលោកនេះ ការឈោងទៅរកពន្លឺរបស់ព្រះគ្រីស្ទ គឺជាជំហានដំបូងគេឆ្ពោះទៅរកភាពសុខសាន្ត និងអង្គការដ៏ទេវភាព ។
បន្ទាប់មក សូមចងចាំថាបងប្អូនគឺជានរណា
ក្រោយពីស្ថានសួគ៌ និងផែនដីត្រូវបានរៀបចំ និងធ្វើឲ្យមានសោភ័ណភាពហើយ នោះព្រះវរបិតាសួគ៌បានរៀបចំផ្លូវសម្រាប់បុត្រាបុត្រីខាងវិញ្ញាណរបស់ទ្រង់ឲ្យមកកាន់ផែនដី និងទទួលបានរូបកាយ ។ ប៉ុន្តែក្នុងអំឡុងពេលរបស់យើងនៅលើផែនដីនេះ មារសត្រូវខិតខំប្រឹងប្រែងធ្វើយ៉ាងណាឲ្យយើងភ្លេចថាយើងគឺជានរណា ។
យើងអាចមើលឃើញការខិតខំរបស់វាក្នុងការបំបែរយើងចេញពីអត្តសញ្ញាណដ៏ទេវភាពរបស់យើង នៅពេលដែលព្រះមានបន្ទូលទៅកាន់ព្យាការីម៉ូសេ ហើយចែកចាយចំណេះដឹងនេះជាមួយលោក ។ នៅក្នុង ម៉ូសេ ១ ព្រះមានបន្ទូលទៅកាន់ម៉ូសេដោយហៅឈ្មោះ ហើយហៅលោកម្តងហើយម្តងទៀតថាជាបុត្រារបស់ទ្រង់ ។
ប៉ុន្តែភ្លាមៗ នៅពេលដែលព្រះយាងចាកចេញទៅ នោះសាតាំងបង្ហាញខ្លួន ហើយហៅម៉ូសេថាជា « កូនមនុស្ស » ( ម៉ូសេ ១:១២ ) ល្បួងលោកឲ្យភ្លេចថាលោកជានរណាឲ្យពិតប្រាកដ ។
សាតាំងចង់ឲ្យយើងភ្លេចថា តើខ្លួនយើងជានរណា ។ វាបង្កើតការសង្ស័យទៅលើសមត្ថភាពរបស់យើងក្នុងការផ្លាស់ប្តូរ ។ វាចង់ឲ្យយើងជឿថា យើងជាមនុស្សធម្មតា ដែលមិនអាចផ្លាស់ប្តូរបាន ហើយនឹងនៅដូច្នោះជានិច្ច ។
ប៉ុន្តែអែលឌើរ ផាទ្រីក ខៀរ៉ុន ក្នុងកូរ៉ុមនៃពួកសាវកដប់ពីរនាក់ រំឮកយើងថា « បងប្អូនអាចមករកព្រះគ្រីស្ទដោយទំនុកចិត្តលើសេចក្តីសប្បុរសរបស់ទ្រង់ ហើយទទួលអំណោយទាំងអស់នៃអំណរ សេចក្តីសុខសាន្ត ក្តីសង្ឃឹម ពន្លឺ សេចក្តីពិត វិវរណៈ ចំណេះដឹង និងប្រាជ្ញា ។ … បងប្អូនជាបុត្រីជាទីស្រឡាញ់របស់ព្រះ បងប្អូនគឺជាបុត្រាជាទីស្រឡាញ់របស់ព្រះ ហើយទ្រង់បានប្រទានអំណោយដល់បងប្អូននូវព្រះរាជបុត្រាដ៏វិសុទ្ធដ៏ឥតខ្ចោះរបស់ទ្រង់ ដើម្បីប្រោសលោះបងប្អូន រាប់ជាសុចរិត និងញែកបងប្អូនជាបរិសុទ្ធ ។
សាតាំងពុំដែលមានសេចក្តីប្រោសលោះនោះទេ ។ ហើយនៅពេលយើងពឹងផ្អែកទៅលើអត្តសញ្ញាណខាងវិញ្ញាណរបស់យើង នោះយើងអាចនិយាយបាន ដូចដែលម៉ូសេបាននិយាយថា ៖
« តើអ្នកជានរណា ? ដ្បិតមើលចុះ ខ្ញុំជាបុត្រា [ ឬ បុត្រី ] នៃព្រះនៅក្នុងរូបដូចជាព្រះរាជបុត្រាបង្កើតតែមួយរបស់ទ្រង់ ។ …
« នែ៎សាតាំង ចូរឯងថយចេញទៅ ចូរកុំបញ្ឆោតខ្ញុំអី ព្រោះព្រះទ្រង់បានមានព្រះបន្ទូលមកខ្ញុំថា ៖ អ្នកមានរូបដូចជាព្រះរាជបុត្រាបង្កើតតែមួយរបស់យើង » ( ម៉ូសេ ១:១៣, ១៦ )
ប្រសិនបើជីវិតមានភាពវឹកវរ ចូរផ្អាកបន្តិច ។ ចូរចងចាំពីអត្តសញ្ញាណដ៏ទេវភាពរបស់បងប្អូន ។ ចូរឲ្យសេចក្ដីពិតនោះដែលថា បងប្អូនគឺជាបុត្រដ៏ជាទីស្រឡាញ់របស់ព្រះ ទាញបងប្អូនទៅកាន់ស្ថានសួគ៌ ។ ចូរបែរទៅរកព្រះយេស៊ូវគ្រីស្ទ ដើម្បីទ្រង់អាចជួយបងប្អូនស្តារសណ្តាប់ធ្នាប់ដល់ព្រលឹងរបស់បងប្អូនវិញ ។
ជាចុងក្រោយ ចូរអនុញ្ញាតឲ្យព្រះគ្រីស្ទបង្វែរភាពវឹកវរឲ្យទៅជាភាពសុខសាន្ត
នៅពេលលោកអ័ដាម និងនាងអេវ៉ា បានចាកចេញពីសួនច្បារអេដែនហើយ នោះភាពសាមញ្ញដែលពួកលោកតែងតែស្គាល់នៅទីនោះត្រូវបានជំនួសដោយពិភពមួយដ៏ឯកោ និងគួរឲ្យភ័យខ្លាច ។ ប៉ុន្តែព្រះវរបិតាសួគ៌បានសន្យាថា ពួកលោកអាចមានភាពសុខសាន្ត ដោយសាតែទ្រង់បានរៀបចំព្រះអង្គសង្គ្រោះមួយអង្គដើម្បីប្រោសលោះពួកលោកពីអំពើបាប និងទុក្ខព្រួយទាំងឡាយរបស់ពួកលោក ( សូមមើល ម៉ូសេ ៥:៧–១០ ) ។
នៅពេលបងប្អូនមានអារម្មណ៍ធុញថប់ដោយសារជីវិតរមែងស្លាប់ សូមចងចាំពីសេចក្តីពិតនេះ ៖ ព្រះវរបិតាសួគ៌បានជ្រាបដឹងថាយើងនឹងប្រឈមមុខនឹងការល្បួង ធ្វើខុស និងមានបាបនៅក្នុងការធ្វើដំណើរត្រឡប់ទៅផ្ទះទៅរកទ្រង់វិញ—នោះគឺជាផ្នែកទាំងអស់នៃផែនការនេះ ។
តាមរយៈព្រះយេស៊ូវគ្រីស្ទ ព្រះវរបិតាសួគ៌តែងតែអាចជួយយើងច្រានចោលអំណាចនៃភាពងងឹតនៅក្នុងជីវិត ហើយជំនួសដោយពន្លឺវិញបាន ។ មិនថាយើងមានភាពវឹកវរប៉ុន្មានដងនោះទេ ដោយសារតែព្រះអង្គសង្រ្គោះរបស់យើង នោះយើងអាចប្តូរភាពវឹកវរទៅជាភាពសុខសាន្តនៅក្នុងព្រលឹងរបស់យើងបាននៅពេលដែលយើងប្រែចិត្ត ។
ប្រធាន រ័សុល អិម ណិលសុន បានថ្លែងទីបន្ទាល់ ៖
[ ព្រះយេស៊ូវគ្រីស្ទ ]នឹងពង្រឹងបងប្អូន ។ ទ្រង់នឹងប្រទានពរដល់បងប្អូននូវភាពសុខសាន្ត សូម្បីតែនៅកណ្តាលភាពវឹកវរក្តី ។
« ព្រះយេស៊ូវគ្រីស្ទបានលើ កដាក់លើអង្គទ្រង់នូវអំពើបាប របស់បងប្អូន ការឈឺចាប់ របស់បងប្អូនការឈឺចិត្ត របស់បងប្អូន និងជំងឺ របស់បងប្អូន ។ បងប្អូនមិនចាំបាច់ទ្រាំទ្រតែម្នាក់ឯងឡើយ ! ទ្រង់នឹងអត់ទោសដល់បងប្អូន នៅពេលដែលបងប្អូនប្រែចិត្ត ។ ទ្រង់នឹងប្រទានពរដល់បងប្អូននូវអ្វីដែលបងប្អូនត្រូវការ ។ ទ្រង់នឹងព្យាបាលព្រលឹងដែលរងរបួសរបស់បងប្អូន ។
រាល់បញ្ហាដែលបងប្អូនអាចជួប នៅពេលបងប្អូនបែរទៅរកព្រះវរបិតាសួគ៌ និងព្រះយេស៊ូវគ្រីស្ទ ដើម្បីទូលសុំជំនួយ នោះទ្រង់ទាំងទ្វេតែងតែអាចស្ដារឡើងវិញនូវអ្វីដែលកំពុងរង្គោះរង្គើ ធ្វើឲ្យបងប្អូនរួចពីភាពវឹកវរនៃអំពើបាប និងការល្បួង ហើយធ្វើឲ្យជីវិតរបស់បងប្អូនមានភាពស្រស់ស្អាតជានិច្ចបាន ។
ទ្រង់ទាំងទ្វេបានធ្វើវាម្តងហើយម្តងទៀត ។