ការស្វែងរកព្រះគ្រីស្ទ និងសេចក្ដីសញ្ញា ៖ គន្លឹះទាំងឡាយរបស់នីហ្វៃក្នុងការអានព្រះគម្ពីរសញ្ញាចាស់

លីអាហូណា ខែមករា ឆ្នាំ២០២

ការស្វែងរកព្រះគ្រីស្ទ និងសេចក្ដីសញ្ញា ៖ គន្លឹះទាំងឡាយរបស់នីហ្វៃក្នុងការអានព្រះគម្ពីរសញ្ញាចាស់

ដោយ ដេវីឌ អ័រ ស៊ីលី

សាស្រ្តាចារ្យព្រះគម្ពីរបុរាណ របស់សាកលវិទ្យាល័យ ព្រិកហាំ យ៉ង់

នីហ្វៃបានចែកចាយការយល់ដឹងមួយចំនួនដែលអាចជួយបងប្អូនក្នុងការសិក្សារបស់បងប្អូន ។

ខ្ញុំចូលចិត្តអានព្រះគម្ពីរសញ្ញាចាស់ ប៉ុន្មានឆ្នាំមកនេះ ខ្ញុំបានរកឃើញគន្លឹះពីរក្នុងការរកមើលនៅក្នុងព្រះគម្ពីរសញ្ញាចាស់ ដើម្បីនាំមកនូវភាពសុខសាន្ត និងបង្កើនការយល់ដឹង ៖ ព្រះគ្រីស្ទ និងសេចក្ដីសញ្ញាទាំងឡាយ ។

នេះគឺជាវិធីមួយចំនួនដែលយើងអាចរកឃើញព្រះគ្រីស្ទ និងសេចក្តីសញ្ញាទាំងឡាយនៅក្នុងការសិក្សារបស់យើងអំពីព្រះគម្ពីរសញ្ញាចាស់នៅឆ្នាំនេះ ។

ការស្វែងរកព្រះគ្រីស្ទ

នីហ្វៃបានអានបទគម្ពីរចេញពីផ្ទាំងលង្ហិន បានថ្លែងថា « មើលចុះ ព្រលឹងខ្ញុំត្រេកអរក្នុងការបញ្ជាក់ដល់ប្រជាជនខ្ញុំនូវការពិតអំពីការយាងមកនៃព្រះគ្រីស្ទ ហើយដោយគោលបំណងនេះ ទើបក្រឹត្យវិន័យលោកម៉ូសេត្រូវបានប្រទានមក ហើយអស់ទាំងអ្វីដែលព្រះទ្រង់បានប្រទានដល់មនុស្ស ចាប់តាំងពីកំណើតលោកិយមក គឺជាគំរូអំពីព្រះអង្គ » ( នីហ្វៃទី២ ១១:៤ ) ។

យើងអាចរកឃើញព្រះយេស៊ូវគ្រីស្ទនៅក្នុងព្រះគម្ពីរសញ្ញាចាស់តាមវិធីជាច្រើន ។

Moses and the Brass Serpent [ ម៉ូសេ និងពស់លង្ហិន ] ដោយ យូឌីត អេ មេហរ៍ Christ on the Cross [ ព្រះគ្រីស្ទនៅលើឈើឆ្កាង ] ដោយ ខាល ហេនរីក ប្លក់

ព្រះនៃព្រះគម្ពីរសញ្ញាចាស់

ដោយសារយើងដឹងតាមរយៈវិវរណៈសម័យទំនើបថា ព្រះយេស៊ូវគ្រីស្ទជាព្រះនៃព្រះគម្ពីរសញ្ញាចាស់ ( សូមមើល គោលលិទ្ធ និងសេចក្តីសញ្ញា ១១០:៣–៤ ) នោះយើងអាចមើលឃើញព្រះចេស្ដារបស់ទ្រង់នៅក្នុងការបង្កបង្កើត និងជាអង្គដែលបង្កើតច្បាប់នៅលើភ្នំស៊ីណាយ ដែលកំពុងបង្រៀនសាសន៍អ៊ីស្រាអែលពីរបៀបដើម្បីក្លាយដូចជាព្រះ ។ យើងរៀនពីព្រះគុណរបស់ទ្រង់ នៅក្នុងការប្រោសលោះចេញពីទាសភាពនៅក្នុងស្រុកអេស៊ីព្ទ សេចក្តីស្រឡាញ់របស់ទ្រង់ក្នុងការថែររក្សាប្រជារាស្រ្តរបស់ទ្រង់នៅក្នុងទីរហោស្ថាន ហើយនាំពួកគេទៅកាន់ទឹកដីសន្យា ហើយការបន្តព្រួយបារម្ភរបស់ទ្រង់តាមរយៈការបញ្ជូនព្យាការី និងផ្តល់នូវការអភ័យទោសដល់អ៊ីស្រាអែល នៅពេលពួកគេបានប្រែចិត្តពីអំពើបាបរបស់ពួកគេ ។

និមិត្តរូបជាច្រើននៃព្រះយេស៊ូវគ្រីស្ទ

មាននិមិត្តរូបជាច្រើន ( ឬតំណាងជាច្រើន )អំពីព្រះយេស៊ូវគ្រីស្ទនៅក្នុងដំណើររឿងក្នុងព្រះគម្ពីរសញ្ញាចាស់ ដែលភាគច្រើនព្យាករអំពីអនាគតរបស់ទ្រង់ដែលនឹងមកដល់ ដែលបានកត់ត្រានៅក្នុងព្រះគម្ពីរសញ្ញាថ្មី និងនៅក្នុងព្រះគម្ពីរមរមន ។ ដំណើររឿងរបស់អ័ប្រាហាំ និងអ៊ីសាកប្រាប់ទុកជាមុនអំពីព្រះជាព្រវរបិតាដែលបានលះបង់ព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ។ យ៉ូសែបបានជួយសង្គ្រោះបងប្អូនរបស់គាត់ពីភាពស្រេកឃ្លានខាងរាងកាយ ដូចគ្នានឹងព្រះយេស៊ូវគ្រីស្ទជួយសង្គ្រោះយើងពីភាពស្រេកឃ្លានខាងវិញ្ញាណផងដែរ ។ ម៉ូសេបានរំដោះប្រជាជនរបស់គាត់ពីទាសករដូចដែលព្រះយេស៊ូវបានរំដោះយើងចេញពីអំពើបាបដែរ ។ ព្រះអម្ចាស់បានបង្រៀនកូនចៅនៃអ៊ីស្រាអែលអំពីអំណាចនៃសេចក្តីជំនឿនៅក្នុងទ្រង់ និងដង្វាយធួនរបស់ទ្រង់នៅក្នុងដំណើររឿងរបស់ពស់លង្ហិននៅក្នុងទីរហោស្ថាន ។ អេលីយ៉ា និង អេលីសា បានយកគំរូតាមព្រះអង្គសង្គ្រោះ នៅពេលពួកគេបានព្យាបាលអ្នកឈឺ ហើយប្រោសមនុស្សស្លាប់ឲ្យឡើងវិញ ។

ការយល់ដឹងអំពីព្រះអង្គសង្គ្រោះនៃព្រះគម្ពីរសញ្ញាថ្មី

ព្រះយេស៊ូវគ្រីស្ទគឺជានិមិត្តរូបនៅក្នុងដំណើររឿងនៅក្នុងព្រះគម្ពីរសញ្ញាចាស់ និងក្រឹត្យវិន័យរបស់ម៉ូសេ ។ ដំណើររឿងនៃពិធីបុណ្យរំលង និងការលះបង់នៅក្នុងក្រឹត្យវិន័យរបស់ម៉ូសេចង្អុលបង្ហាញទៅកាន់ព្រះគ្រីស្ទ ។ ដោយការប្រាប់ទុកជាមុនអំពីបេសកកម្មរបស់ព្រះយេស៊ូវ ពួកព្យាការីនៅក្នុងព្រះគម្ពីរសញ្ញាចាស់ដែលបានព្យាបាលអ្នកឈឺ និងប្រោសមនុស្សស្លាប់ឲ្យរស់ឡើងវិញ ។ តាមរយៈព្យាការីយេរេមា ព្រះអម្ចាស់បានសន្យានឹងយើងនូវ « សេចក្តីសញ្ញាថ្មី » មួយ ( យេរេមា ៣១:៣១ សូមមើលផងដែរ ខទី ៣២ ) ។

នៅក្នុងព្រះគម្ពីរសញ្ញាថ្មី ព្រះយេស៊ូវយាងមកជាការបំពេញតាមក្រិត្យវិន័យ និងព្យាការីក្នុងព្រះគម្ពីរសញ្ញាចាស់ ។ ទ្រង់បាននាំមកនូវសេចក្តីសញ្ញានៅក្នុងទេសនកថារបស់ទ្រង់នៅលើភ្នំ និងបានបង្កើតនិមិត្តសញ្ញានៃសេចក្តីសញ្ញាក្នុងអំឡុងពេលពិធីបុណ្យរំលងអាហារចុងក្រោយ ។ ព្រះយេស៊ូវបានបង្រៀនយើងឲ្យស្រឡាញ់ និងបម្រើគ្នាទៅវិញទៅមកដូចពេលដែលទ្រង់បានព្យាបាលអ្នកឈឺ និងប្រោសមនុស្សស្លាប់ឲ្យរស់ឡើងវិញ ។ ទ្រង់បានប្រោសលោះយើងពីអំពើបាប និងសេចក្តីស្លាប់តាមរយៈដង្វាយធួនរបស់ទ្រង់ ហើយទ្រង់បានបង្កើតសាសនាចក្ររបស់ទ្រង់នៅលើផែនដី ។ នៅពេលយើងស្គាល់ព្រះយេស៊ូវជាព្រះនៃព្រះគម្ពីរសញ្ញាចាស់ នោះយើងអាចយល់ពីទ្រង់កាន់តែច្បាស់នៅក្នុងព្រះគម្ពីរសញ្ញាថ្មី ។

ការស្វែងរកសេចក្ដីសញ្ញាទាំងឡាយ

នីហ្វៃក៏បានបង្រៀនយើងឲ្យរកមើលសេចក្តីសញ្ញានៅក្នុងបទគម្ពីរផងដែរ ៖ « ហើយព្រលឹងខ្ញុំក៏ត្រេកអរចំពោះសេចក្ដីសញ្ញាទាំងឡាយនៃព្រះអម្ចាស់ ដែលទ្រង់បានធ្វើជាមួយនឹងពួកអយ្យកោរបស់យើងដែរ » ( នីហ្វៃទី២ ១១:៥ ) ។

ប្រធាន រ័សុល អិម ណិលសុន ក៏បានសង្កត់ធ្ងន់ផងដែរអំពីសារៈសំខាន់នៃសេចក្ដីសញ្ញាទាំងឡាយ ។ លោកបានមានប្រសាសន៍ថា ៖ « ការសរសើរដ៏ធំបំផុតដែលអាចទទួលបាននៅក្នុងជីវិតនេះ គឺការដែលត្រូវបានគេស្គាល់ថាជាអ្នករក្សាសេចក្ដីសញ្ញា ។ រង្វាន់សម្រាប់អ្នករក្សាសេចក្តីសញ្ញានឹងត្រូវបានគេទទួលស្គាល់ទាំងនៅក្នុងជីវិតនេះ និងនៅជីវិតក្រោយ » ។

ឱ ជាការសន្យាដ៏អស្ចារ្យណាស់ ! សូម្បីតែបន្ទាប់ពីបានទទួលពិធីបុណ្យជ្រមុជទឹក និងការចុះសេចក្តីសញ្ញានៅក្នុងព្រះវិហារបរិសុទ្ធ យើងប្រហែលជាមិនដឹងថា ការសន្យាទាំងនេះអាចមានឥទិ្ធពលលើជីវិតប្រចាំថ្ងៃរបស់យើងឲ្យកាន់តែប្រសើរឡើងប៉ុនណានោះទេ ។ ប៉ុន្តែ ព្រះគម្ពីរសញ្ញាចាស់រំឭកយើងអំពីអ្វីដែលវាពិតជាមានន័យដើម្បីធ្វើជា « មនុស្សនៃសេចក្តីសញ្ញា » និងពីរបៀបដែលយើងអាចយល់កាន់តែច្បាស់ពីពរជ័យ និងការទទួលខុសត្រូវដែលមកជាមួយសេចក្តីសញ្ញានោះ ។

សេចក្តីសញ្ញាដ៏សំខាន់ដែលបានរៀបរាប់នៅក្នុងព្រះគម្ពីរសញ្ញាចាស់គឺសេចក្តីសញ្ញាអ័ប្រាហាំ ។ យើងអាចស្វែងរកសេចក្តីពិតអំពីដំណឹងល្អរបស់ព្រះយេស៊ូវគ្រីស្ទនៅក្នុងសេចក្ដីសញ្ញានេះ ដែលដឹកនាំយើងទៅរកព្រះយេស៊ូវគ្រីស្ទ ដែលនៅក្នុងទ្រង់យើងរកឃើញសេចក្ដីសង្គ្រោះ ។

ខាងក្រោមនេះគឺជាវិធីមួយចំនួនដែលព្រះគម្ពីរសញ្ញាចាស់ជួយយើងឲ្យយល់កាន់តែច្បាស់ និងរក្សាសេចក្តីសញ្ញារបស់យើង ។

ការយល់ដឹងពីតួនាទីរបស់យើងនៅក្នុងសេចក្តីសញ្ញាអ័ប្រាហាំ

សេចក្តីសញ្ញាអ័ប្រាហាំ គឺជាបណ្តុំនៃការសន្យា និងពរជ័យដែលបានផ្តល់ឲ្យអ័ប្រាហាំ ដែលនៅបន្តរហូតមកដល់សព្វថ្ងៃនេះនៅក្នុង « សេចក្ដីសញ្ញាថ្មី និងអស់កល្បអស់កាលជានិច្ច » ដែលបានស្តារឡើងវិញដោយព្យាការី យ៉ូសែប ស្ម៊ីធ ( សូមមើល គោលលិទ្ធ និងសេចក្តីសញ្ញា ១៣២:៣០–៣១ ) ។ ប្រធាន ណិលសុន បានបង្រៀនថា ៖

« ព្រះអម្ចាស់បានបង្ហាញព្រះកាយនៅក្នុងថ្ងៃចុងក្រោយនេះ ដើម្បីរំឭកសេចក្ដីសញ្ញាអ័ប្រាហាំនោះ ។ ចំពោះព្យាការី យ៉ូសែប ស្មីធ លោកគ្រូបានប្រកាសថា ៖

« ‹ លោកអ័ប្រាហាំបានទទួលសេចក្ដីសន្យាអំពីពូជរបស់លោក និងអំពីផលនៃពោះរបស់លោក—គឺអ្នករាល់គ្នាចេញពីពោះ អ្នកនោះហើយ … ថា យ៉ូសែប ជាអ្នកបម្រើរបស់យើង ។ …

« ‹ សេចក្ដីសន្យានេះក៏ជាសេចក្ដីសន្យាដល់អ្នកដែរ ពីព្រោះអ្នករាល់គ្នាជាពូជពីលោកអ័ប្រាហាំ › [ គោលលទ្ធិ និងសេចក្ដីសញ្ញា ១៣២:៣០–៣១ ] » ។

តាមរយៈសេចក្តីសញ្ញានេះ ព្រះអម្ចាស់បានបង្កើតគ្រួសារដ៏សុចរិតមួយ ដែលលោកអាចបង្រៀនដំណឹងល្អរបស់ទ្រង់ និងនាំបុត្រាបុត្រីរបស់លោកទៅរកព្រះយេស៊ូវគ្រីស្ទ ។ សាវកប៉ុលបានបង្រៀនយើងថា ប្រសិនបើយើងមករកព្រះគ្រីស្ទ នោះយើងក្លាយជាផ្នែកមួយនៃគ្រួសាររបស់លោកអ័ប្រាហាំ ៖ « បើអ្នករាល់គ្នាជារបស់ផងព្រះគ្រីស្ទ នោះក៏ពេញជាពូជរបស់លោកអ័ប្រាហាំហើយ ក៏ជាអ្នកគ្រងមរតកតាមសេចក្តីសន្យាផង » ( កាឡាទី ៣:២៩ សូមមើលផងដែរ ខទី ២៧ ) ។ តាមរយៈសេចក្តីសញ្ញាអ័ប្រាហាំ សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ក្លាយជាវង្សអ៊ីស្រាអែល និងជាអ្នកគ្រងមរតកនៃពរជ័យនៃសេចក្តីសញ្ញាអ័ប្រាហាំ ។

យើងអាចរៀនអំពីតួនាទីរបស់យើងនៅក្នុងសេចក្តីសញ្ញានេះបាន តាមរយៈការដកពិសោធន៍ក្នុងជីវិតរបស់អ្នកទាំងឡាយណានៅក្នុងព្រះគម្ពីរសញ្ញាចាស់ តាមរយៈការសិក្សាពីការសន្យាដែលព្រះអម្ចាស់បានធ្វើចំពោះបុត្រាបុត្រីរបស់ទ្រង់នៅក្នុងបទបញ្ញត្តិទាំងឡាយ និងតាមរយៈការស្តាប់តាមព្យាការីពីបុរាណ ដែលបានអង្វរដល់កូនចៅអ៊ីស្រាអែលឲ្យប្រែចិត្ត ហើយគោរពតាមសេចក្តីសញ្ញាទាំងឡាយរបស់ពួកគេ ។

ការស្វែងរកពរជ័យដែលបានសន្យាតាមរយៈសេចក្ដីសញ្ញារបស់យើង

ពេលយើងអានព្រះគម្ពីរសញ្ញាចាស់ យើងអាចរកមើលការចង្អុលបង្ហាញអំពីព្រះអម្ចាស់ដែលទ្រង់រក្សាការសន្យាដែលបានធ្វើនៅក្នុងសេចក្ដីសញ្ញាអ័ប្រាហាំបាន ។ ពរជ័យដ៏ឧត្តុងឧត្តមបំផុតទាំងបីគឺផែនដី ជានិមិត្តរូបនៃមរតកនៅក្នុងនគររបស់ព្រះវរបិតាសួគ៌ ។ កូនចៅជាសេចក្តីសន្យានៃការរីកចម្រើនដ៏អស់កល្ប ហើយជាពរជ័យនៃដំណឹងល្អ និងបព្វជិតភាព « ដែលជាព្រះពរទាំងឡាយខាងសេចក្ដីសង្គ្រោះ គឺខាងជីវិតដ៏នៅអស់កល្បជានិច្ច » ( អ័ប្រាហាំ ២:១១ ) ។

អ័ប្រាហាំទទួលបានការសន្យាថា តាមរយៈគ្រាប់ពូជរបស់លោក « គ្រប់ទាំងគ្រួនៅផែនដីនឹងបានពរដោយសារឯង » ( លោកុប្បត្តិ ១២:៣ ) ។ នេះមានន័យថា ព្រះយេស៊ូវគ្រីស្ទនឹងយាងចូលមកក្នុងពិភពលោកតាមរយៈពូជពង្សរបស់អ័ប្រាហាំ ហើយប្រទានពរដល់ប្រជាជាតិទាំងអស់នៅលើផែនដីតាមរយៈដង្វាយធួន និងការរស់ឡើងវិញរបស់ទ្រង់ ( សូមមើល កាឡាទី ៣:១៦ ) ។

រូបភាពព្រះអង្គសង្គ្រោះកំពុងអធិស្ឋាននៅក្នុងសួនច្បារគែតសេម៉ានី

តើអ្នកមើលឃើញពរជ័យអ្វីខ្លះនៅក្នុងជីវិតរបស់អ្នកនាពេលសព្វថ្ងៃនេះ ដោយសារតែសេចក្តីសញ្ញាអ័ប្រាហាំ ?

កាតព្វកិច្ចដើម្បីប្រមូលផ្តុំអ៊ីស្រាអែល

រួមជាមួយនឹងពរជ័យទាំងឡាយ ការក្លាយជាផ្នែកនៃសេចក្ដីសញ្ញាអ័ប្រាហាំ រួមបញ្ចូលនូវការទទួលខុសត្រូវជាក់លាក់មួយចំនួន ។ តាមរយៈការសិក្សាព្រះគម្ពីរសញ្ញាចាស់ យើងរៀនអំពីរបៀបដើម្បីរស់នៅតាមសេចក្តីសញ្ញារបស់យើង ។ ក្នុងនាមជាគ្រួសាររបស់អ័ប្រាហាំ សមាជិកនៃសាសនាចក្រត្រូវបានហៅឲ្យប្រមូលផ្តុំអ៊ីស្រាអែល ។ នៅពេលដែលយើងចូលរួមក្នុងកិច្ចការផ្សព្វផ្សាយសាសនា ក្នងការងារបម្រើ កិច្ចការព្រះវិហារបរិសុទ្ធ ការហៅក្នុងសាសនាចក្រ និងការបង្រៀន និងការចិញ្ចឹមបីបាច់គ្រួសាររបស់យើង នោះយើងកំពុងប្រមូលផ្តុំអ៊ីស្រាអែលតាមរយៈការនាំអ្នកដទៃទៅកាន់តែជិតព្រះគ្រីស្ទ ។

ប្រធាន ណិលសុន បានបង្រៀន « រាល់ពេល ដែលបងប្អូនធ្វើ អ្វីមួយ ដើម្បីជួយ នរណាម្នាក់—ទាំងសងខាងនៃវាំងនន—ឲ្យបោះជំហានទៅធ្វើសេចក្ដីសញ្ញាជាមួយនឹងព្រះ ហើយទទួលពិធីបរិសុទ្ធនៃពិធីបុណ្យជ្រមុជទឹក និងព្រះវិហារបរិសុទ្ធដ៏សំខាន់របស់ពួកគេ នោះបងប្អូនកំពុងជួយប្រមូលអ៊ីស្រាអែលហើយ » ។

ការរៀនស្រឡាញ់ព្រះគម្ពីរសញ្ញាចាស់

នៅក្នុងឆ្នាំនេះ នៅពេលបងប្អូនអានព្រះគម្ពីរសញ្ញាចាស់សម្រាប់ការសិក្សា ចូរមកតាមខ្ញុំ របស់យើង បងប្អូនអាចរៀនស្រឡាញ់ការបង្រៀនរបស់វា ដោយធ្វើតាមគំរូរបស់នីហ្វៃនៅក្នុងការស្វែងរកប្រធានបទទាំងពីរនេះ ៖ ព្រះគ្រីស្ទ និងសេចក្តីសញ្ញា ។ នៅក្នុងការធ្វើដូច្នេះ បងប្អូនអាចយល់កាន់តែច្បាស់អំពីព្រះយេស៊ូវគ្រីស្ទ ដង្វាយធួន និងដំណឹងល្អរបស់ទ្រង់ ។ បងប្អូនក៏អាចរៀនបន្ថែមទៀតអំពី « សេចក្ដីសញ្ញាថ្មី ហើយអស់កល្បអស់កាលជានិច្ច » និងតួនាទីរបស់បងប្អូននៅក្នុងសេចក្ដីសញ្ញានោះក្នុងនាមជាសិស្សរបស់ព្រះគ្រីស្ទ និងជាសមាជិកនៃវង្សអ៊ីស្រាអែល ។

ដំណើររឿង និងការបង្រៀននៅក្នុងព្រះគម្ពីរសញ្ញាចាស់ អាចជួយឲ្យទំនាក់ទំនងរបស់យើងជាមួយនឹងព្រះអង្គសង្គ្រោះ ការយល់ដឹង និងការប្តេជ្ញាចិត្តរបស់យើងចំពោះសេចក្តីសញ្ញារបស់យើងផ្ទាល់ខ្លួនឲ្យកាន់តែស៊ីជម្រៅ ។