Pe A Liua E Le Atua Le Faanoanoa i le Olioli

O lou igoa o Le Van N‘gon Yolann ma ou te sau mai Niu Kaletonia. E 14 ou tausaga, o le ulumatua i lou aiga. E i ai lou uso laitiiti, ma sa i ai lou tuafafine laitiiti na maliu i le tasi ma le afa o ona tausaga ona o se ma‘i tuga.

A o lei fanau mai lo‘u tuafafine laitiiti, sa fai mai fomai ia i matou e i ai se faaletonu i lona fatu ma o le a ola mo nai itula pe a fanau mai. I le faalogo ai i lea talafou, sa matou tootutuli ai ma lo‘u aiga i le tatalo, ma fesili atu i le Alii pe mafai ona Ia faatagaina i matou e tauave o ia mo se taimi umi atu. O po uma, sa matou faaauau ai ona faia lea talosaga e tasi.

I le aso 13 o Fepuari, 2019, sa fanauina ai e lou tina lou tuafafine laitiiti. Ua mavae itula, ma sa i ai pea o ia faatasi ma i matou. Na mavae atu aso ma vaiaso, ma sa i ai pea i o matou autafa. E lei mafai ona faamatala e fomai lenei vavega.

Mo le 18 masina, sa aumaia ai e lo‘u tuafafine laitiiti se olioli tele i lo matou aiga. Sa matou faapelepele i aso uma na matou i ai ma ia.

Ona, oo lea i le aso 28 o Aukuso, 2020, sa maliu ai lo‘u tuafafine laitiiti. Sa ou faanoanoa lava—nutililii lo‘u fatu, ma sa ou le manao e talia lona maliu. Ou te lei manao e faaali atu i se tasi le tele o lo‘u mafatia, pe na ou manao foi e talanoa e uiga i lou faalogona.

Sa alu se taimi mo au e malamalama ai, ae e lemu lava na amata ona ou vaai o le Alii na tali ia matou tatalo. Na ia aumai ia i matou na masina taua e 18—na sili atu lena taimi nai lo le taimi na fai mai fomai o le a matou maua. Ona tupu ai lea o se mea sili ona ofoofogia.

I le aso 28 o Aukuso, 2022—i le atoaga tonu o le lua tausaga talu le maliu o lo‘u tuafafine—sa papatisoina ai lo‘u tama. Sa ou matua olioli lava ua ia faia lenei faaiuga i le maea ai ona avea ma uo a le Ekalesia mo le 15 tausaga. O le vaaia o le vavega i le olaga o lo‘u tuafafine na pa‘i atu i lona loto. Na mafai ona ia liua lenei aso o le tiga—28 o Aukuso—i se aso o le olioli mo lo matou aiga.

O le aso nei, o ou matua, lo‘u uso laitiiti, ma au ua sauni e ulufia le maota o le Alii ina ia mafai ona faamauina i matou i lo‘u tuafafine laitiiti ma avea ai ma aiga e faavavau. O lea ua ou malamalama o le maliu o lo‘u tuafafine e le o le mutaaga lea—o le amataga o le malaga a lo matou aiga e agai atu i le faavavau.

Ou te molimau atu o loo soifua le Atua, ma e ala atu i Lona Alo, o Iesu Keriso, e mafai ai ona faamalosia i tatou i taimi o tofotofoga ma luitau tatou te feagai.

“Ou te mafaia mea uma lava i le faamalosi mai o Keriso ia te a‘u” (Filipi 4:13).