O Fea E Tatau Ona Tatou Iai

Sa fuafua lava e le au Warwoods e o atu i se misiona o ni tagata matutua, ma sa mautinoa e Sister Warwood sa ia iloa le mea na manaomia ai o ia e le Alii e auauna ai. I le avea ai ma se fomai o pepe fou, sa ia lagona ai le tosinaga i galuega fesoasoani i atunuu tauatia’e.

“E masani lava ona ou mafaufau o le a ou auauna atu i se misiona o fesoasoaniga alofa i se atunuu e vaivai le tamaoaiga, se mea e uiga i tina ma pepe,” sa ia faamalamalama ai. Ae ina ua la asiasi atu i Aferika i le tausaga a o lumanai le la valaauga o le misiona, sa tupu ai se mea e le‘i mafaufauina. “Ina ua ou mafaufau ifo ia te a‘u lava, o le a ma iinei i le tausaga e sosoo ai,’ sa i ai so‘u lagona popole,” na manatua e Sister Warwood.

I le aiga, a o faagasolo se fonotaga a faifeautalai matutua, sa fesili atu ai taitai faaamaopoopo e uiga i o latou manaoga. Sa ia tali atu, “Atunuu vaivai, se mea tau faafomai, laveaiina o ola.” Sa toe foi mai le popole. “Sa ou manatu,’‘Ou te mate ou te le i manao moni e auauna atu i se misiona. O se lagona le lelei lenei.’

Sa fesuia‘ia mea uma ina ua iloa e taitai faamaopoopo le talaaga o le ulugalii—o le tama o se tausitusi, o le tina o se tausi soifua. Sa o latou faamalamalamaina e faapea “o le Faufautua Faasoifuamaloloina a le Misiona (MHA) o se galuega aupito sili ona manaia i le misiona ona e te faamasani, iloa ma auauna atu i faifeautalai uma.” Sa iloa e Sister Warwood o le MHA “sa faia le tele o mea sa ou faia i le NICU—ae ua o ni pepe matutua atu!”

“E oo ane i le taimi na ma tuua ai le fonotga, e aunoa ma le lagonaina o le popole, sa matua ou fiafia lava.” Sa ia iloaina: “Sa taumafai le Alii e ta‘u atu ia te oe o le fesoasoaniga alofa lona tolu i le lalolagi e le o le mea lea e tatau ona e i ai. Sa le mafai ona Ia iloagofie."

Sa taliaina e le au Warwoods le valaau i le misiona a Aukilani Niu Sila, lea sa faamaonia ai i le tele o taimi lena taitaiga. I se tasi mea e le mafaagaloina, o se tamaitai faifeautalai sa valaau e i ai ni ma‘i pe a tausami i nisi meaai. Sa ia taumafaina ni maso ma sa lagonaina le tiga o le faa‘i ma le faafaufau. A o latou talanoa, sa faateteleina lona ma‘i.

“Sa fulafula lona laulaufaiva ma foliga, sa faigata ona ia foloina meaai, sa lilivau, tale ma tupu le mageso,” e manatua e Sister Warwood. Sa ia faamaopoopoina le tausiga, faagaoioia ni telefoni se fa i le taimi e tasi—o le faifeautalai, ona taitai, femalagaaiga, ma le nofoaga tutotonu o tausiga manaomia—ina ia o latou saunia e togafitia o ia i le taunuu atu.

“O le nofoaga o tausiga manaomia sa tali vave mai,” na ia maofa ai, “leai se umi ‘o faatali’, e pei ona masani ai.” Sa maua e le faifeautalai se togafitiga vave. “Sa sologa manuia mea uma,” ua manatunatu ai Sister Warwood. E le teenaina le aao o le Alii i lenei mea na tupu.

I le taimi nei, sa maua ai e Elder Warwood lona lava ala e lei mafaufauina. “Ina ua ma omai sa ou le‘i iloa po o le a la‘u mea o le a fai,” ua ia ioeina. Ina ua toe vave foi atu le isi ulugalii faamisiona matutua i le fale, sa tauave e Elder Warwood lo la tiute o le vaaia o uila vilivae, lea sa itiiti sona poto masani i ai. “Sa lava lo‘u iloa e uiga i le faaleleia o uila ou te oo atu ai i se faaletonu,” ua ata o ia.

O le vaifofo sa oo mai i le aiga. Sa fuafua lona uso o Dan e asiasi atu i Niu Sila mo na o le tasi le vaiaso ma lona toalua. Sa fautuaina e Sister Warwood e faaopoopo le la nonofo. “E manaomia moni lava e Gary se fesoasoani i uila.” Sa vave ona tali mai lona tuafafine-faale-tulafono: “Oi, e fiafia lava Dan i lena tulaga.”

O Dan, o se inisinia atamai, na uma ane ua nofo mo le toeitiiti tolu vaiaso, e aoaoina Elder Warwood i mea uma e uiga i le lipeaina o uila. “Sa ia faaleleia soo se mea,” ua fai mai ai Elder Warwood ma le agaga faafetai. “Ua na ona saunia e le Alii lena fesoasoani.” O le taimi nei ua ia pulea ai tupe a le misiona ma tausia le tele o uila vilivae ia lelei.

E pei ona aoao mai Peresitene Thomas S. Monson, “O le ua valaauina e le Alii, e faaagavaaina e le Alii.” Ua aoaoina e Elder Warwood o lenei mataupu faavae e faatatau ua le na o le valaauga, ae o luitau uma e alia‘e mai, “aua ua ou iloa e lē tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou” (1 Nifae 3:7).

E toafa alo o le au Warwoods, e toalua e i ai luitau, na avea ai le tuua o le aiga ma mea aupito sili ona faigata. Ae o le faamanuiaga o lo la vaetofiaina na aofia ai se folafolaga e faapea “o le a omai tagata i o latou olaga e fesoasoani ma auauna atu ia i latou i auala e le mafai ona ma faia mai se nofoaga mamao ese,” ua faasoa mai ai Sister Warwood.

O lena folafolaga sa aoaoina o ia i se faatuatua fou. “Ou te maua le filemu pe a ou faapea atu, ‘Ua lelei, le Alii e, ou te le mafai ona fai o se mea e uiga i lenei, ae e te mafaia. O lea, o le a ou tuu ai ia te Oe.’ E aveesea ai le popole.” Sa suia e le misiona lana vaaiga. “Sa ou aoaoina e mafaufau atili faaselesitila, vaaia le mea aupito taua i le faaiuga, ma le mea e le taua.”

Ua vaaia e Elder Warwood lenei faatulagana paia i soo se mea. “Ua tuu e le Alii tagata i o ma avanoa—o lenei paso jigsaw tele lea Na te silafia tonu lava le mea e tatau ona tatou i ai e fesoasoani atu ai i isi. Na te faataunuuina manaoga o tagata uma.”

I lena lava paso jigsaw, o vaega uma ua maea ona mamanuina mo lona nofoaga tonu. A o la‘ua mafaufau muamua pe faapefea ona la‘ua ofi i totonu o aafiaga faalemisiona a tagata matutua, sa aoaoina e le au Warwoods sa tapenaina i la‘ua e le Alii mo lenei galuega i o la‘ua olaga atoa. Ua uma ona avea i la’ua ma vaega sa Ia manaomia.