Tu’u Atu ia Susulu le Malamalma o Keriso e Ala Atu ia i Tatou—Toe Manatunatuga i Lo’u Tama

Ata na tusia e David Green

Atonu o loo i ai se tasi ua maliu ma alu atu i le isi itu o le veli—o se tasi e te faaaluina sina taimi faaopoopo e mafaufau i ai ia Tesema ma i le taimi o le Kerisimasi.

Mo a’u, o lo’u tama lena. O lona aso fanau e ia Tesema. Na maliu o ia ina ua faatoa mavae le Kerisimasi i le toeitiiti atoa le 18 tausaga talu ai.

O lo’u tama e i ai lava i taimi uma sana galuega e manaomia ai le malaga.

Sa malaga o ia i se vaalele i se taimi a o lei i ai ni vaega faaonaponei pei o meafaalogo sulu i le ulu po o taliga. Sa leai se lau i tua o le nofoa i ona luma. Leai ni faafiafiaga i luga o le initoneti. Leai se telefoni feaveai, tapeleti, po o se komepiuta feaveai.

I na aso, ina ia faapasi le taimi a o e malaga, e tolu au filifiliga: moe; faitauina o se tusi, mekasini, po o se nusipepa; po o le talanoa i le tagata o loo nofo i ou autafa.

E filifili i taimi uma e lo’u tama le lona tolu.

Sa sau o ia i le fale mai malaga uma ma se tala e uiga i le tagata na nofo i ona autafa. O lana tala o le olaga!

Ou te le iloa po o le a le tele o se vaega e uiga i lo‘u tama sa ia ta‘u atu. Ae sa i ai sona tomai uiga ese, o se meaalofa a se tagata e faalogo. Sa lagona e tagata le toafimalie i le faatasi ai ma ia. Se lagona ua lava lelei le toafiamalie e faasoa atu ai a latou tala patino—lototiga ma manumalo ma mea uma i le va.

Ma talu ai o lo’u tama sa avea ma se tagata talitonu lelei, o se soo moni o Iesu Keriso, ou te iloa na tuua e tagata a latou faigamalaga i se tulaga ua iloaina, ua lagonaina, alofaina, fiafia, ma sili teisi atu le faamoemoe nai lo le taimi na latou o atu ai i luga o lena vaalele.

Sa talitonu lo’u tama i se mea na tusia i se tasi taimi e Elder Neal A. Maxwell (1926–2004) o le Korama a Aposetolo e Toasefululua: “O le Atua lava e tasi na tuuina le fetu i se siosiomaga patino i le afe tausaga a o lei alia’e mai i Peteleema i le faamanatuga o le soifua mai o le Pepe, ua tuuina mai ai le gauai lava e tasi i le faatulagaga o i tatou taitoatasi i siosiomaga o tagata ina ia mafai ai, pe afai o le a mafai, ona tatou malamalama i o tatou olaga taitoatasi, ina ia le gata e taitaiina ai isi e lo tatou malamalama, ae faamafanafanaina ai foi i latou.”

I se isi taimi, sa faailoa mai ai e Elder Maxwell le manatu faapenei: “O le fuafuaga ma le maelega a [le Atua] e le gata i taamilosaga o fetu, la, masina ma mea uma i le vanimonimo ae faapea foi ile taamilosaga a le tagata soifua. … E pei o le fetu o le Kerisimasi, o i tatou taitoatasi, pe afai e faamaoni, e i ai se faataamilosaga faau’uina.”

Pe o le a e gauai atu ea i tagata ua i ai i lau taamilosaga faaletagata?

O ai ua tuuina atu e le Atua moni o le atulaulau i lou ala?

I le avea ai ma se soo o Iesu Keriso, e mafai faapefea ona e faia ma le naunauta‘i atili le faamafanafanaina ma le faamalamalamaina o o latou ala?

O le puna o le malamalama uma—lo tatou Faaola, o Iesu Keriso—ua fetalai mai ia i tatou ia faasusulu atu le malamalama tatou te maua mai ia te Ia e ala atu ia i tatou (tagai i le Mataio 5:14–16; 3 Nifae 12:14–16). O se tasi o auala tatou te faia ai o le gauai atu lea i tagata o siomia i tatou. Faailoa i latou. Faalogo atu ia i latou. Alofa ia i latou. E susulu tele atu lo tatou malamalama pe a tatou alolofa atu e pei ona alofa mai Iesu.

I lenei vaitau pe a tatou faamanatuina le soifua mai o Ia o lē o le punavai o le malamalama uma, ou te faasoa atu lo’u talitonuga maumaututu o loo Ia silafia i tatou taitoatasi, ma e alofa o Ia ia i tatou taitoatasi. E le gata ina Ia faamalamalamaina le ala ae faapea foi, e ala i Lana Togiola e le i’u ma le taua, e maua ai le ala i le aiga.