“O Le Taimi Sili ona Fiafia o Lo’u Olaga,” Liahona, Tes. 2025.
Atatusi o le Faatuatua
O Le Taimi Sili ona Fiafia o Lo’u Olaga
Ina ua ou ole atu i le Atua pe sa ou faia le filifiliga sa’o e ala i le suia o lo’u olaga, sa Ia tali mai e ala i le auina mai o faifeautalai faamisiona i lo’u faitotoa.
Ata na pueina e Stefan Huysmans
Mo le 11 tausaga, sa fai ma a’u vaisu le aisa. Sa matua tele naua le faaletonu ma le lē fiafia i lo’u olaga. O tagata sa latalata mai ia te a’u sa taumafai ae lei manuia ina ia tata’i ese a’u mai fualaau faasaina.
Sa ou i ai i se nofoaga pogisa, sa ou tauivi ma le atuatuvale matuiā ma le popole, ma ulaula pea se’ia faasolo atu ina leaga ai lo’u mafaufau. Sa soloatoa mea uma na siomia ai a’u. Sa oo foi ina ou taumafai e faauma lo’u lava ola. O se vavega lo‘u le oti ai. Mulimuli ane, o lo’u manatu muamua lava o le, “E le tatau ona ou oti. O loo i ai so’u faamoemoega.”
O la’u vaisu na aafia ai a’u sootaga uma, aemaise lava i le va ma lo’u atalii e 13 tausaga le matua, o Lincoln. I se tasi aso sa ia fai mai ai ia te a’u pe mafai ona ou resitalaina o ia i le aoga fusu kiki. Sa ou fai atu ia te ia o le a ou faia, ae sa ia tilotilo mai ia te a’u ma fai mai, “Tama, ou te lē talitonu ia te oe.”
“Aisea e te lē talitonu ai?” Sa ou fesili atu ai.
“O lau mea lava lea e fai,” o le tali lea a Lincoln. “E te aumai ia te a’u se faamoemoe ae leai lava se mea e taunuu.”
Na nutimomoia lo’u loto. Sa ou lagona se tulaga leaga tele. Sa ou iloa o lea ua ou le toe talanoa i lo’u atalii pepe. O lea ua ou talanoa atu i se alii talavou e 13 tausaga le matua, o se ua iloaina le mea o loo tupu. Sa ou tauto e suia. Sa ou folafola ia te a’u lava o le a ou le toe ulaina lava se aisa. O po uma lava, ou te faapea ifo ai ia te a’u lava, “O le a ou faia ni filifiliga lelei atu.”
Sa mavae le lua vaiaso a o ou galue ai e faaleleia le ma va ma Lincoln. Nai lo le faatauina o fualaau faasaina, sa ou resitalaina o ia i se faletaalo e faia ai le taaloga o le fusu kiki. Sa ou lagona le fiafia i le tulaga alualu i luma sa ou i ai.
I se tasi aso a o timu, sa manao Lincoln e fai ni keke sukalati (brownies). Sa ia aoina mai mea e manaomia ma saeu le paluga. A o ou vaavaai atu ia te ia, sa faatumulia lo’u loto i le mitamita. Sa i ai so’u loto ua tumu i le faafetai ona ua faaleleia le ma mafutaga ma tuputupu ae i le faatuatuaina i le na o le lua vaiaso.
I lena taimi, sa ou faia ai se tatalo le leoa: “Le Atua e, o o’u faia ea le mea sa’o? Pe o le mea ea lenei e tatau ona ou faia?”
O Se Tuitui i le Faitotoa
O le taimi lava na ou fesili atu ai i le Atua i lena fesili, sa ou faalogoina se tu’itu’i i le faitotoa. Sa ou tilotilo atu i fafo o le faamalama ma vaaia ai ni faifeautalai se toalua o tutu i le timu. Sa ou iloaina i la’ua o ni tagata sa o atu e talai atu e uiga i le Atua, o lea sa ou valaauliaina ai i la’ua i totonu. O le taimi lena na ou iloa ai sa faatasi le Atua ma a’u. Sa ou iloa sa Ia vaavaaia a’u.
Sa ta’u mai e faifeautalai ia te a’u e uiga i le Tusi a Mamona ma valaaulia a’u i le lotu. Sa ou alu, ma auai i le lotu i vaiaso taitasi ina ua mavae lena. Ae sa ou le mautinoa po o fea e amata faitau ai i le Tusi a Mamona. Pe tatau ona ou amata mai le pito i luma, le pito i tua, pe faitau ni nai itulau i le ogatotonu? Ina ua ou fesili atu i faifeautalai po o le a le mea e tatau ona ou faia, sa la valaaulia au e faitau le “O Le Molimau a le Perofeta o Iosefa Samita” e latalata i luma o le tusi ma tatalo.
I se tasi po a o ou taoto i luga o lo’u moega i se potu pogisa, sa ou pikiina i luga la’u Tusi a Mamona ma faia se tatalo. Sa ou ole atu i le Tama Faalelagi pe moni mea sa ou aoaoina ma pe o le a Ia fesoasoani mai ia te a’u ia ou iloa e moni.
Sa amata ona ou faitauina le molimau a Iosefa Samita ma susu’e le itulau. Sa amata ona susulu ma susulu atili itulau. Na faafuasei lava ona matua pupula ua i‘u ina moeiini ai o‘u mata. I lalo ane o o’u si’u mata, sa ou vaaia ai le faatagata o Keriso—o se ataata o Iesu Keriso ma Ona aao o faaloaloa mai.
I lena lava taimi, Sa ou iloaina ai e moni le Tusi a Mamona. E leai se faafitia o lena mea. E moni foi Le Ekalesia a Iesu Keriso o le Au Paia o Aso e Gata Ai.
Sa ou filifili o le a ou le toe liliuina lava lo’u tua i le Tama Faalelagi ma Iesu Keriso. I nai masina mulimuli ane, na papatiso ai loa a’u. Sa siomia a’u e a’u uo, aiga, ma le uarota e lagolagoina a’u. O le taimi sili lea ona fiafia o lo’u olaga. Ua tumu lo’u loto.
“Ua fesoasoani mai le Tama Faalelagi ia te a’u e fatufatu ni sootaga lelei atu ma sili atu ona faatuatuaina ma isi—aemaise lava ma lo’u atalii, o Lincoln,” o le tala lea a Cassidy.
Ina ua ou sailia le fesoasoani a le Tama Faalelagi, sa Ia aveesea o’u tiga uma—o le atuatuvale, popole, ma le pogisa—ma tuuina mai ia te a’u le malosi e faatoilalo ai la’u vaisu. Ua ia fesoasoani ia te a’u e fatufatu ni sootaga lelei atu ma sili atu ona faatuatuaina ma isi—aemaise lava ma lo’u atalii.
Pe a tou “oofu i le ofutau o le amiotonu,” e mafai ona tou “lulu ese filifili ua noatia ai outou … ma tutulai mai i le efuefu” (2 Nifae 1:23). Afai e te sailia se suiga i lou olaga, o le a fesoasoani le Atua ia te oe. Afai e te ole atu ia te Ia mo se fesoasoani e faia ai filifiliga amiotonu, o le a Ia faamanuiaina oe. O le alofa o le Tama Faalelagi na ou maua ai le malosi e faatoilalo ai la’u vaisu, salamo, ma avea ma se tagata fou (tagai i le 2 Korinito 5:17).