O le a Ou Alu i le Aiga

Ata na tusia e Caitlin Droubay

O le la’uina o le suau’u i nofoaga i tua o Dakota i Matu, ISA, e seāseā ou vaaia sina agalelei. O le taimi o le Kerisimasi e le ese mai ai.

I ni nai tausaga ua mavae, sa ou mafaufau ai, “E mafai faapefea ona ou fesoasoani e suia lena mea?” A o ou mafaufau loloto i lenei fesili, sa amata ona ou okaina se pusa atoa o pusa sukalati i Tesema uma lava ma tufa atu i isi loli ma tagata i nofoaga o le suau’u.

O taeao uma ae ou te lei alu e la’u le suauu, ou te ole atu i le Tama Faalelagi e fesoasoani mai ia te a’u e faia la’u galuega i se tulaga sa’o, lelei, ma le saogalemu. Ona ou ole atu lea ia te Ia e fesoasoani mai ia te a’u e saili ni tagata e mafai ona faaaogaina sina fiafia o le Kerisimasi. A o ou mulimuli i uunaiga, sa mafai ona ou iloa o avega a tagata sa faamāmāina i le na o le talanoa atu o se tasi ia i latou ma tuu atu ia i latou ni sukalati.

I se tasi taeao sa uunaia a’u e ave ni pusa se lua. A o ou afe atu i totonu o se nofoaga o le suauu i lena aso, sa uunaia a’u e le Agaga e tuuina atu se pusa i se alii iina. Ina ua uma ona ia faafetai mai ia te a’u, sa amata ona ou toe faasolomuli atu la’u loli i le nofoaga sa i o’u tua atu. O le tamaloa sa i tua ma lana masini la’u vai sa fai si mamao atu ma a’u na amata ona ia ee mai ia te a’u, ona o lo’u solomuli atu i le nofoaga sa ia mafaufau o ia e onaina.

Ae paga lea, sa ou toe ee atu ia te ia. Sa ou alu atu lava ma ave le nofoaga ma faatalitali a o faatumulia la’u loli i le suauu. Ina ua tumu la’u loli suau’u ma amata ona ou aluese mai le nofoaga o le suauu, sa ou toe vaai foi i le tamaloa.

Sa oo mai ia te a’u se uunaiga malosi mai le Agaga Paia: “E manaomia e lena tagata se pusa sukalati.”

Sa ou tetee atu, “Oi, leai la, e le mo le alii lea.”

Peitai, sa ou iloaina, ou te lei tuuina atu ni sukalati ina ia ou maua ai so’u lava lagona lelei. Sa ou faia auā sa ou manao e mulimuli i uunaiga mai le Alii ma fai le mea sa Ia finagalo ou te faia mo isi—e tusa lava po o le a le faigata o le mulimuli i na uunaiga.

Sa ou savali atu i le tamaloa, o le sa pupula to’a mai ia te a’u a o ia vaai mai ua ou latalata atu.

“Atonu ua sese le vaega sa ta feiloai ai muamua,” sa ou fai atu ai. “O a’u o Vaun Kearsley. Ou te manao e tuuina atu ni moomooga o se Kerisimasi fiafia ia te oe.”

Sa ou tuuina atu ia te ia le pusa o sukalati ma lulu lona lima. Ae na te le’i faamamuluina lo’u lima, sa faafuase’i ona maligi ona loimata.

“Vaun, sa ou i ai i le nofoaga o le suauu mo le ono tausaga,” o lana tala lea. “O le tulaga o le leai o se agalelei iinei e nutimomoia ai lava le loto. Ou te lagona e pei e agaleaga tagata uma i le tasi ma le isi. E fai lava mea a le tagata ia ma e le popole lava le tasi tagata i le isi iinei.”

Ona ia faaopoopo mai lea: “O le asō na ou fai atu ai afai e leai se tagata e toatasi e agalelei mai ia te a’u, e oo loa i la’u uta mulimuli o le aso, o le a ou faatumuina la’u loli i le mamafa tele e mafai ai ma aveina sa’o atu lava ia fetoai ma se pa puipui.”

Sa ou uuina o ia i le lima ma fai atu, “Faamolemole aua e te faia lena mea. Aua le lafoaia lou olaga.”

Sa ou ta’u atu ia te ia e uiga i le Faaola o Iesu Keriso ma Lana talalelei. Sa ou ta’u atu ia te ia le alofa, malamalama, ma le silafia o loo ia te Ia mo tagata uma. A o ma talanoa, sa ou iloa ai sa i ai sona atalii laitiiti i Idaho lea na ia misia. Sa ou aioi atu ia te ia ia aua nei faaumatia lona ola pe faatiga i olaga o i latou sa ia alofa i ai ona o le tiga sa ia lagonaina. A o ma feopoai, sa ou fai atu ia te ia, ou te faamoemoe e toe vaai ia te ia ma faamoemoe o le a suia lona mafaufau.

Mo ni nai vaiaso na sosoo ai, sa ou vaaia ma faafeiloaia o ia i aso uma. I le taimi o se malologa i le aso 23 o Tesema, sa ia savali mai ia te a’u ma fai mai, “O lo’u aso mulimuli lenei, Vaun. O le a ou toe foi i le fale ma faalatalata atu i lo’u atalii.”

O le faamuamua o le Atua i o tatou olaga, na saunoa ai Peresitene Russell M. Nelson: “Pe o le a e faatagaina ea Ana afioga, Ana poloaiga, ma Ana feagaiga e uunaia mea e te faia i aso taitasi? Pe o le a e faatagaina ea Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?”

O le tufaina atu o pusa o sukalati o se faatinoga faigofie lea o le faatuatua, ae na faia e le Alii o se mea e sili atu (tagai i le Mataupu Faavae ma Feagaiga 64:33). Ou te le iloa po o le a se mea semanu e tupu i lena aso pe ana ou alu ese atu i la‘u loli ma le amanaiaina le Agaga Paia. Pau lava le mea ua ou iloa sa ou mulimuli i se uunaiga, ma sa mulimuli mai ai ma se mea lelei tele.

E i ai le mana i le usiusitai i poloaiga, faalogo i le Agaga, ma le faaalia o le agalelei. E tatau ona tatou taumafai e manatua o tagata uma tatou te vaai i ai o se atalii po o se afafine o lo tatou Tama oi le Lagi. Pe a tatou tauaveina le Malamalama o Keriso ma faasoa atu, e iloaina e Lana fanau (tagai i le Mataupu Faavae ma Feagaiga 84:45–46).