Ou te Le Manaomia Se Isi Mea

Ata na tusia e Caitlin Droubay

Ia Tesema ina ua iva tausaga o lo’u tina, sa tuua ai e lona tama fai le aiga e sue galuega. Sa ia tuua lo’u tinamatua, lo’u tina, ma le tuagane laitiiti o lo’u tina e aunoa ma se tupe, leai se meaai, leai se laau Kerisimasi, leai ni meaalofa. I upu a Tina, “Sa leai ni mea ia i matou.”

Sa alu lo’u tina e savalivali i lena Po o le Kerisimasi. Sa ia manatua le tilotilo atu i le faamalama o se fale tuaoi ma vaaia ai ni tamaiti fiafia, o loo ataata ma siomia se laau Kerisimasi, faatasi ai ma meaalofa ma tagata o le aiga o loo latalata ane. Sa tagi Tina a o ia faasoa mai lena manatuaga a o lei oo i le Kerisimasi i ni nai tausaga a o lei maliu o ia. O se tasi lea o le tele o Kerisimasi sa aunoa ma se mea ia te ia.

Tuu mai i luma i le 1969, ua 14 tausaga talu ona faaipoipo o’u matua. Sa matou nonofo i se taulaga laitiiti i Kalefonia tutotonu, ISA. O iina na tu’itu’i mai ai ni faifeautalai faamisiona se toalua i lo matou faitotoa ma aumai ai ia i matou le talalelei toefuataiina a Iesu Keriso. I se tausaga mulimuli ane, sa faamauina ai o’u matua i le tasi ma le isi i le Malumalu o Oakland Kalefonia, ma sa faamauina i matou ma o’u uso e toalua ia i laua.

Mo o’u matua, na sosoo ai ma tausaga o le avea ma soo, e aofia ai le auauna atu i le tele o valaauga i le Ekalesia, auauna atu i le anoanoai o isi tagata, faamalolosia o a latou molimau i se misiona i Florida, sa olioli i a latou fanau tuputupu ae, ma i ai i se tulaga faateleina o faamanuiaga ia e oo mai i le “olioli ia Iesu Keriso” ma le avea ma tagata auai i “le ekalesia o le olioli.”

E lei leva ona maliu lo’u tama i le 2018, ae tusi atu e lo’u tina se tusi o le Kerisimasi i lana fanau, e lisi ai faamanuiaga na tumu ma mauoa ai lona olaga.

“Pe a ou maua ni taimi filemu, e oo mai mafaufauga ma manatuaga ia te a’u—o mea ua tuuina mai ia te a’u,” na ia tusia ai. Faatasi ai i meaalofa na ia mauaina, sa ia tusiaina ai “se tane e faavavau” ma se aiga e mafai ona faatasia e faavavau i luma o le Tama ma le Alo; le talalelei toefuataiina; perofeta ma aposetolo soifua; tusitusiga paia o aso e gata ai; o le meaalofa o le Agaga Paia; o se molimau i le Faaola o Iesu Keriso; ma “lenei taimi faapitoa e faamanatu ai Lona soifua mai.”

A o laitiiti lo’u tina, sa leai ni mea sa ia te ia. E oo atu i le taimi na maliu ai o ia, sa ia te ia mea uma na tāua.

“O outou ma le talalelei o lo’u ola lea,” sa ia faaiuina ai. “Ou te le manaomia se isi mea. Manuia le Kerisimasi. Alofa ia te oe e faavavau.”