“O Mai ia Keriso ma Maua Ana Meaalofa,” Liahona, Tes. 2025.
O mai ia Keriso ma Maua Ana Meaalofa
E ala mai ia Keriso, le meaalofa silisili o meaalofa uma, tatou te maua ai mea uma e taua moni lava—i le taimi nei ma le faavavau.
A o ou talavou, sa ou faamoemoe ma le naunautai i se meaalofa taugata mo le Kerisimasi, ma ou te talanoa solo lava ma ta’uta’u e aunoa ma le mafaufau i tulaga tautupe a o’u matua.
Ina ua oo mai le Kerisimasi, o le meaalofa sa ou moomoo i ai sa le’i i ai i lalo o le laau. I le amataga, sa ou lagona le lē fiafia, ae e le’i umi ae liua lo’u lē fiafia i le maasiasi ina ua ou iloaina sa tauaveina e o’u matua ni avega mamafa tautupe—i le lagolagoina o lo’u uso o loo i se misiona ma lo’u tuafafine i le kolisi, faapea foi ma le tausiga o a’u, le la ui’i.
A o faagasolo pea le taeao, sa ou matauina sa laiti lava nai mea sa i lalo o le laau mo i la’ua ae sa tele lava mea mo a’u. I lo’u manatu faapito, sa ou tauaso i le alofa ma le ositaulaga na faaali mai e o’u matua ia te a’u i le taimi atoa.
I ni tausaga mulimuli ane, ina ua ou foi mai i la’u misiona, sa ou toe fai Kerisimasi foi na o a’u lava ma o’u matua. Sa pei o se la susulu o la foliga i le olioli a o la vaavaai mai ia te a’u o tatala meaalofa mai lalo o le laau, ma sa toe tupu foi le tulaga lava lea e tasi, toeitiiti lava o meaalofa uma sa mo a’u.
O le taimi lea, sa ese la’u vaai atu i nei vaega. O o’u aafiaga i lo’u talavou sa aoaoina ai a’u i se lesona taua. Sa le na ona ou faafetai mo meaalofa—sa matua ootia lava a’u i le alofa o o’u matua ma osigataulaga sa la faia ma le loto i ai mo a’u.
O Le Meaalofa Sili Ona Tāua
Ua oo ina ou malamalama o nisi o meaalofa e sili atu ona tāua nai lo isi, ma e masani lava, o na meaalofa e manaomia ai le ositaulaga mai le tagata foai.
Ua tautino mai e le Tusi a Mamona, “e i ai se mea e tasi ua sili atu ona taua nai lo ia mea uma” (Alema 7:7), ma o le soifuaga lena ma le misiona a Iesu Keriso. O le mea moni, o le meaalofa silisili na tuuina mai i tagata o Iesu Keriso—Lona soifua mai, Lona soifuaga atoatoa, Lana taulaga togiola, ma Lona Toetu mamalu.
O lenei meaalofa na oo mai e ala i le ositaulaga tele, ma o faamanuiaga uma e faavavau e tafe mai ia te Ia. O le taliaina o Lana valaaulia e “o mai ia te [Ia]” (Mataio 11:28), tatou te tatalaina ai meaalofa e tāua moni lava.
Faatinoina o le Faatuatua ia te Ia
O le faatuatua e sili ona manaomia i le taimi e foliga mai ai ua itiiti lona galueaiina. E mafai ona faigata ona faatumauina lo tatou faatuatua i taimi o luitau. Peitai, afai tatou te tumau, e faamanuiaina i tatou e le Alii.
Sa feagai sa Nifae faamaoni ma le taufaamata’u o le faatafunaga pe afai o le a lē faaalia mai faailoga o le soifua mai o Keriso. E ui lava i o latou tulaga faanenefu, sa tumau pea lo latou mausali i lo latou faatuatua. (Tagai i le Helamana 14:2–5; 3 Nifae 1:6–9.)
Sa tatalo faatauanau le perofeta o Nifae, e saili le laveaiga mo lona nuu. I le tali atu i ai, na tuuina mai ai e le Alii lenei faamautinoaga faamafanafana: “Inā ea ia lou ulu ma ia olioli; …ma o le po nei o le a tuu atu ai le faailoga, ma o taeao ou te alu atu ai i le lalolagi” (3 Nifae 1:13).
I lena po, e lei oo mai se pogisa. O le aso na sosoo ai, na faaali mai ai se fetu fou i le lagi, ma folafola atu ai le soifua mai o Iesu Keriso—”o le malamalama, o le ola, ma le faamoemoe o le lalolagi.” O i latou o e na tutū mausali sa faamanuiaina i le malamalama e faapea o lea ua oo mai le Alii na valoia.
O le Faatuatua o se Meaalofa
Ua faamalamalama mai e Elder Neil L. Andersen o le Korama a Aposetolo e Toasefululua e faapea o le faatuatua ia Iesu Keriso o se meaalofa paia, e tuuina mai a o tatou filifili e talitonu ia te Ia ma saili atu ma le faamaoni ia te Ia. I le Tusi a Mamona, na aoao mai ai Eteru e faapea a o tuputupu ae lo tatou faatuatua, e mafai ona tatou faamoemoe mo se lalolagi sili atu ona lelei (tagai i le Eteru 12:4).
I tausaga ua mavae, a o i ai i se malaga faapisinisi i Pasila, sa ou nofo ai i autafa o se alii i se faigamalaga sa le’i leva ona maliu lona afafine e toatasi i se faalavelave tau taavale. Sa nutimomoia lona loto ma sa aunoa ma se faamoemoe. Ina ua sa’o le taimi, sa ma talanoa e uiga i mea paia e mafai ona fusia faatasi ai aiga mo le faavavau. Sa ou faasoa atu la’u molimau e faapea, e ala ia Keriso, e mafai ai ona toe faatasia o ia ma lona afafine e faavavau. Sa liua lona faanoanoa i le faamoemoe, ma sa tagi o ia i lenei malamalama fou.
Ou te le iloa pe na auai lenei alii i le Ekalesia, ae i lena taimi, ou te iloa na ia maua le faamoemoe e na o le ositaulaga ma faamanuiaga a Iesu Keriso e maua ai.
O Le Ositaulaga e Faalatalata Atu ai i Tatou ia te Ia
O le faataitaiga sili o le taulaga o le naunau lea o lo tatou Tama Faalelagi e auina mai Lona Alo, o Iesu Keriso, i le lalolagi (tagai i le Ioane 3:16). Ma o Keriso, i le usiusitai atoatoa, na ositaulagaina mea uma e gauai atu ai i le finagalo o le Tama (tagai i le Mataio 26:39, 42).
Afai tatou te alolofa moni ia Keriso, o le a tatou ofoina atu ia te Ia a tatou lava taulaga—o se loto maualalo ma se naunautaiga e mulimuli ia te Ia (tagai i le Mataupu Faavae ma Feagaiga 59:8).
Na aoao mai le Aposetolo o Paulo o le tulafono o se ta’ita’itama e aumaia i tatou ia Keriso ina ia mafai ai ona tauamiotonuina i tatou e ala i le faatuatua. Peitai, o le taimi lava e tauamiotonuina ai i tatou, ua le toe i ai i tatou i lalo o le ta’ita’itama, aua ua avea i tatou ma fanau a le Atua. (Tagai i le Kalatia 3:24–26.)
A o tatou tuputupu ae i le faatuatua, e avea poloaiga ma se vaega o lo tatou natura. Latou te fesoasoani ia i tatou ia latalata atili atu i le Faaola, ma ua Ia folafola mai e faalatalata mai ia i tatou (tagai i le Mataupu Faavae ma Feagaiga 88:63). Ma le isi, e ala i le usiusitai, tatou te avea atili ai e faapei o Ia. A o tatou faia, ua tatou saunia i tatou lava ia maua le meaalofa silisili o le ola e faavavau (tagai i le Mataupu Faavae ma Feagaiga 14:7).
Fusifusia ia te Ia
Ua fesouaiga le lalolagi, ma ua saili Satani e faalavelave ia i tatou i le fefe ma le lē mautonu (tagai i le Mataupu Faavae ma Feagaiga 45:26; Luka 21:26). Peitai, ua saunia e le Tama se ala e faatoilalo ai: o Lona Alo, o Iesu Keriso.
E ui atonu e i ai ni luitau i le olaga, ae o le fusia o i tatou lava ia Keriso e ala i sauniga ma feagaiga, e tuuina mai ai ia i tatou le avanoa e maua ai Lona malosi ma le mana togiola. Na aoao mai Peresitene Russell M. Nelson e faapea o le avea ma ni o i feagaiga e fusia ai i tatou i le Alii “i se auala lea e faafaigofie ai mea uma e uiga i le olaga.” Faigofie atu, e le o le faigofie. Ma o loo avanoa le mana mo i latou o e naunau e osia ma tausia feagaiga paia. O nei foi mea, o nisi ia o meaalofa sili a le Atua ia i tatou, o Ana fanau.
I lenei vaitau o le Kerisimasi, ou te molimau atu ai e ala ia Keriso, le meaalofa silisili o meaalofa uma, tatou te maua ai mea uma e taua moni lava—i le taimi nei ma le faavavau.