Auauna atu i le Suafa o Iesu Keriso

Ata na tusia e Caitlin Droubay

O lo’u tinamatua o le tagata foa’i sili lea. O ana meaalofa sa magafagafa ma patino, o meaalofa taitasi sa afifiina i se pepa matagofie ma sa nonoaina faatasi ma se lipine lelei atoatoa. O lana meaalofa o le Kerisimasi o le meaalofa lea sa le mafai ona e faatali e mauaina.

I le faaiuga o le 2016, na maua ai tinamatua i le kanesa. O lenei tamaitai sa faasoa atu le olioli sili i le Kerisimasi, o le a i ai i le falemai i le aso malolo e sili ona ia fiafia i ai. A o ou mafaufau ia te ia, sa ou tomanatu pe mafai faapefea ona ou fesoasoani ia avea le vaitau o le Kerisimasi o se vaitau fiafia. I lo’u tulaga malamalama lelei ia Tinamatua, semanu na te faia ana fuafuaga mo meaalofa i se taimi umi ae lei oo mai le aso Kerisimasi ma o le a matua le fiafia lava i le le faataunuuina.

Fai mai Tamamatua o le tulaga moni lava lea. I le ofoina atu o le fesoasoani, sa tuuina mai ai ia te a’u le galuega o le sauniaina o meaalofa mo fanau a fanau e toa 13, o o latou taitoalua, ma le silia ma le 27 fanau a fanau a fanau. Sa ou taumafai e afifi e pei ona faia e Tinamatua. Sa ou filifilia ma le faaeteete ato o meaalofa, pepa solo, ma teutusi.

Sa ou tuu i ai lana savali tusilima masani i tausaga taitasi e ala i le kopiina mai i se kata mai se tausaga ua mavae e faapea: “Alofa e faavavau, Tinamatua ma Tamamatua.”

Sa ou manao i mea uma ina ia atoatoa—ia faia e pei lava o le tulaga e i ai pe ana ia faia. Ina ua pe a ma le afa o a’u ato, o mea iila, ma kata, sa musumusu mai le Agaga ia te a’u, “O se vaega lenei e faapea uma lava le tulaga o le ave o le suafa o se tasi i ou luga. O le uiga lenei o le galue i le igoa o se isi tagata.”

I lena taimi patino loloto, sa aoaoina atili ai a’u e uiga i le tauaveina o le suafa o Iesu Keriso i o’u luga.

O vaiaso taitasi a o tatou aai ma feinu i le faamanatuga, tatou te molimau atu ai ua tatou naunau e tauave i o tatou luga le suafa o Iesu Keriso ma manatua pea o Ia (tagai i le Moronae 4:3; Mataupu Faavae ma Feagaiga 20:77). Ua ou taliaina lena valaaulia i le taimi nei i se tulaga patino sili atu. Ua ou malamalama atili o le tauaveina i o’u luga o le suafa o Keriso e aofia ai le ola faapei ona Ia faia.

Sa ou iloa le ala na faia ai le foa’i a Tinamatua auā sa avea a’u ma tagata na mauaina lona alofa ma le mafaufau loloto i le tele o taimi. Ua ou iloa auala e alofa ma foai mai ai le Tama Faalelagi ma Iesu Keriso auā ua ou molimauina o La’ua aao i lo’u olaga. O a’u o se e mauaina le alofa tunoa o Keriso. Ou te fia faia le mea o le a Ia faia. Ou te manao i le olaga o loo ou ola ai, o le auaunaga ou te tuuina atu, ma le alofa ou te faasoa atu e atagia ai Lona soifua, auaunaga, ma le alofa—ia lagona e pei na sau mai ia te Ia.