O Le Fuafuaga a le Atua mo se Aiga e Faavavau

O se tasi o mea na muai fiafia i ai o’u matua i le talalelei toefuataiina a Iesu Keriso o le faataua lea e tuuina e le Ekalesia i luga o le aiga ma aoaoga e faapea “o le tele o le galuega a le Atua o le faaolataga ma le faaeaga e faataunuuina e ala i le aiga.” A o lei papatisoina i laua, sa matua faagaeetia o’u matua i mea sa la aoaoina lea na la valaaulia ai tuaoi e auai faatasi ma i laua mo lesona a faifeautalai.

A o la feiloai ma faifeautalai, ma faaauau pea ona suesue i le talalelei ina ua mavae lo la papatisoga, sa aoao o’u matua i auala “e tausia ai [a la] fanau i le malamalama ma le upumoni” ma le auala e “faatulagaina lelei ai faaleagaga [lo latou] lava fale” (Mataupu Faavae ma Feagaiga 93:40, 43).

Sa la aoaoina e faapea “o le aiga o le totonugalemu lea o le fuafuaga a le Foafoa mo le taunuuga e faavavau o Lana fanau” ma o le “fiafia i le olaga faaleaiga e tele lava ina ausia pe a faavae i aoaoga a le Alii o Iesu Keriso.”

Sa la aoaoina “o faaipoipoga ma aiga manuia e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”

Sa la aoaoina e mafai ona faavavau aiga ma o “lea lava mafutaga ua i ai ia te i tatou iinei o le a i ai ia i te i tatou iina, ae o le a na’o na faatasia ma le mamalu e faavavau” (Mataupu Faavae ma Feagaiga 130:2).

Ma sa la’ua aoao foi e faapea “o le faamoemoega tupito lava o aoaoga uma, gaoioiga uma i le Ekalesia o le fiafia o matua ma a latou fanau i le aiga, faamauina i se faaipoipoga e faavavau, ma faafesootaiina i o latou augatupulaga.”

Faatasi ai ma lena malamalama, sa la mananao ai ia faamauina o se aiga e faavavau.

Ina ua uma ona papatisoina o’u matua, sa la faataitaia mea sa la aoaoina, ma siitia atu mai le lalolagi i le malo o le talalelei. Sa la galulue e tuufaatasia lo matou aiga e ala i le faia o afiafi faaleaiga ma suesuega faaleaiga o tusitusiga paia, auai ma le faamaoni i sauniga a le Ekalesia, ma le faia o galuega o talafaasolopito o aiga. Faatasi ai ma na taumafaiga agai atu i le lotogatasi, sa la’ua faamoemoe ai e fatu se aiga e faatotonugalemu i le fuafuaga o le faaolataga ma se vaaiga/taulaiga agai i le faavavau.

I le 1965, o le tausaga na papatiso ai o’u matua, o le malumalu aupito lata ane i São Paulo, Pasila, sa i Mesa, Arisona, toeitiiti atoa le 6,000 maila (9,650 km) le mamao. Sa taugata tele le malaga mo lo matou aiga, o lea sa tatau ai i o’u matua ona faatali seia oo i le faapaiaga o le Malumalu o São Paulo Pasila i le 1978 a o lei mafai ona maua o la sauniga o le malumalu ma faamauina. I lena taimi, sa ou auauna atu i se misiona i Rio de Janeiro.

Pe a ma le lua masina ae ou te lei faaiuina la’u misiona ia Fepuari 1980, na faatagaina ai e la’u peresitene o le misiona la’u soa ma a’u e o atu i se malaga e alu ai ma le po faatasi tagata o le siteki mai Rio de Janeiro i le malumalu i São Paulo ina ia mafai ona ou maua faaeega paia ma faamauina i o’u matua. E pei o o’u matua, sa ou faatalitali mo le tele o tausaga mo faamanuiaga folafolaina o sauniga ma feagaiga o le malumalu.

O lena aafiaga na suia ai la’u vaaiga mamao i le lumanai ma aumaia ai ia te au la’u vaaiga muamua i le moni o upu talu ai nei a Peresitene Russell M. Nelson: “O le taimi i le malumalu e fesoasoani ai ia te oe e mafaufau faaselesitila ma maua ai se vaaiga mamao po o ai moni oe, po o ai e mafai ona avea ai oe, ma le ituaiga olaga e mafai ona e maua e faavavau.”

O lo’u taimi puupuu i le malumalu i lena taimi na matua uunaia ai le vaega na totoe o la’u auaunaga faafaifeautalai. Faatasi ai ma lena vaaiga fou, o le molimau atu e uiga i le malumalu ma le taua o le fuafuaga a le Atua mo aiga sa i ai foi se aafiaga tumau i lo’u olaga.

Ina ua ma faaipoipo ma lo’u toalua o Rosana i le lua tausaga talu ona uma la’u misiona, sa faamauina i ma’ua i le malumalu ma se vaaiga mamao o le tausia o lo ma aiga e faavavau. Ina ia faia lena mea, sa ma galulue faatasi e fatufatu ni tu ma aga faaleaiga e pei o tu ma aga na aoaoina ai i matou e o matou matua, sa taulai uma atu i le Faaola, o Ana aoaoga, ma aoaoga a Ana perofeta o aso nei.

O aso nei o loo tausia e la ma fanau a latou fanau i mataupu faavae lava e tasi o le fiafia. Mo i matou, o le aiga o mea uma aua ua tatou malamalama i le totonugalemu o le aiga i le fuafuaga a le Atua.

I le avea ai ma se Pulega Aoao, sa ou maua le faamanuiaga o le faamauina o la’u fanau e toatolu i o latou taitoalua i le malumalu. O le vaai atu i o latou mata i le taimi na latou tootutuli ai i le fatafaitaulaga i le malumalu o se aafiaga matagofie. Sa mafai ona ou vaaia le faamanuiaina o a’u fanau i mataupu faavae lava e tasi o le talalelei na aoaoina ai a’u e o’u matua ma sa ma aoaoina ai ma Rosana i latou. Sa mafai ona ou vaai i na faamanuiaga o loo faaauau pea i tupulaga i le lumanai. Ma sa faamanatu mai ia te a’u po o ai ua mafai ai.

O Se Faamanatu o le Kerisimasi

O le aiga e totonugalemu i le fuafuaga o le fiafia a le Atua, ae a aunoa ma le Faaola o Iesu Keriso, o le a le mafai ona faia lena fuafuaga. O Lana Togiola ma sauniga ma feagaiga o loo maua i Lana talalelei ua mafai ai ona maua le folafolaga o le faaeaga.

Na folafola mai e Peresitene Nelson: “O le faaeaga o se mataupu e faaleaiga. E na o sauniga faaola o le talalelei a Iesu Keriso e mafai ona faaeaina ai aiga. O le taunuuga tupito lea o loo tatou taumafai i ai ia tatou fiafia o se aiga—maua faaeega paia, faamauina, ma saunia mo le ola e faavavau i le afioaga o le Atua.”

Pe a ou asiasi i nofoaga ou te lei vaai muamua lava i ai, ou te taumafai e sue se vaaiga laitiiti o le Soifua Mai o Iesu e faamanatu mai ai ia i ma’ua ma Rosana le Faaola. O loo ou fauina se faaputuga uiga ese.

A o ma mafaufau ai i na vaaiga lotomaualalo o le Soifua Mai o Iesu, sa ma mafaufau loloto ai ma lo’u toalua, “O le a le mea e sili ona taua moni i o tatou olaga?” Ioe, o le tali, o le Faaola, Lana talalelei, ma lo tatou aiga. Ina ia faamanatu mai ia i tatou le alofa o lo tatou Tama Faalelagi mo i tatou, ma e ala mai i le Faaola le mafai ona maua o folafolaga o aiga e faavavau, a o le’i oo i le Kerisimasi i ni nai tausaga ua mavae, sa ma tuuina ai a ma seti uma o le Soifua Mai o Iesu i ni fata tetele se lua i lo matou fale—ma tuua ai i latou nai lo le tuuesea o i latou pe a mavae aso malolo o le Kerisimasi. O lena tu masani e fesoasoani ia i tatou e faatumauina ai le agaga o le Kerisimasi i lo tatou tausaga faaleaiga.

O aso uma a o tatou vaavaai atu i na vaaiga o le Soifua Mai o Iesu, latou te faamanatu lemu mai ai ia i tatou le matafaioi tutotonu a le Faaola i o tatou olaga. Latou te faamanatu mai ia i tatou o le filemu i le lalolagi i le taimi nei (tagai i le Luka 2:14) ma o le fiafia e faavavau i le isi lalolagi e faalagolago i le Faaola ma le faamamaluina o feagaiga ua tatou osia ma Ia. Ma e faamanatu mai ai ia i matou “e faapea na afio mai o ia i le lalolagi, o Iesu lava, e faasatauroina mo le lalolagi, ma tauave agasala a le lalolagi, ma faapaia le lalolagi, ma faamamā mai amioletonu uma;

Ina ia mafai ona faaolaina e ala ia te ia i latou uma o e na tuu e le Tamā i lona mana ma faia e ia” (Mataupu Faavae ma Feagaiga 76:41–42).

E pei lava ona ma aoaoina nei upumoni mai o ma matua, sa ma galulue foi ma Rosana e tuufaasolo atu i le ma fanau. O lea la ua aoao atu e a ma fanau nei lava upumoni e tasi ia latou fanau. O fatu na totoina i loto o o’u matua i le 60 tausaga ua mavae i lo matou tama’i fale i Pasila ua fuga mai ma fua mai “lea ua sili ona pele, lea ua sili ona suamalie i mea uma ua suamalie, ma lea ua sili ona paepae i lo mea uma ua papae, ioe, ma mamā i lo mea uma ua mamā” (Alema 32:42).

Ou te molimau atu o i latou o e taliaina le fuafuaga a le Atua mo aiga, alolofa e pei ona alofa le Faaola, ma faamamaluina a latou feagaiga o le a i ai se aso e mautofi ai “i faamanuiaga o le ola e faavavau ma le atoatoaga o le olioli” faatasi ma e pele ia i latou ma le Tama ma le Alo.