O Le Aiga e Totonugalemu i le Fuafuaga a le Atua

I se vaaiga ofoofogia, na iloa ai e Mose o le galuega a le Atua o se galuega o le faaolataga ma le faaeaga mo Lana fanau uma (Mose 1:39).

Sa aoaoina e le Perofeta o Iosefa Samita o le meaalofa aupito silisili o meaalofa uma a le Atua o le ola lea e faavavau (Mataupu Faavae ma Feagaiga 14:7).

Sa faamaonia mai e Peresitene Dallin H. Oaks e faapea O le “taulaiga autu a Le Ekalesia a Iesu Keriso o le Au Paia o Aso e Gata Ai o le fesoasoani lea i ona tagata auai ia maua le faaeaga, o le tikeri aupito maualuga o le mamalu i le malo selesitila.”

O lenei taulaiga paia i le faaeaga ua faaalia ai le mafuaaga e matuai totonugalemu ai le aiga i le fuafuaga a le Atua. Sa faamalamalama mai e Peresitene Russell M. Nelson e faapea “sa matua faamanino mai e le Faaola lava Ia e ui ua faamautinoa mai e Lona Toetu o le a toetutu moni tagata uma o e soifua mai ma ola e faavavau, ae e tele atu isi mea e manaomia pe afai tatou te mananao ia maua le faamanuiaga maualuga o le faaeaga. O le faaolataga o se mataupu e patino i le tagata, ae o le faaeaga o se mataupu faaleaiga.”

O le Folafolaga ua toe faaailoa atu e faapea, “fegalegaleaiga faaleaiga i tala atu o le tuugamau, ua mafai i sauniga paia ma feagaiga ua maua i malumalu paia.”

O faaaliga o aso nei o loo aoao mai e faapea e saunia e le Atua mo i tatou ia ‘mamanu’ o le ola amiotonu ina ia le faaseseina i tatou i pepelo ma taufaasese a Satani (Mataupu Faavae ma Feagaiga 52:14).

Ina ua uma ona foafoaina le tagata, sa fetalai atu le Atua i Lona Alo Pele “e lē lelei ona nofo toatasi o le tagata; o le mea lea, o le a Ou faia ai se fesoasoani e tatau ai mo ia” (Mose 3:18). Ona faia lea e le Atua o Eva, ma “aumai le fafine i le tamaloa” (Mose 3:22).

Sa aoao mai Peresitene Iosefa Filitia Samita (1876–1972): “O le Faaipoipoga e pei ona faavaeina i le amataga o se feagaiga e faavavau. O le uluai tane ma le uluai fafine sa lei faaipoipoina e oo i le oti e tuueseese ai i la’ua, mo lena taimi e lei oo mai le oti i le lalolagi. O le sauniga i lena tulaga sa faatinoina e le Tama Faavavau Lava Ia, o Lana galuega e tumau e faavavau. O le finagalo o le Alii e faapea o faaipoipoga uma e tatau ona tutusa uiga, ma i le avea ma ‘tino e tasi’ e faaauau e le tane ma le fafine i le tulaga faaipoipo, e tusa ai ma le fuafuaga a le Alii, i le faavavau atoa e faaapea foi i lenei olaga faaletino.”

Mulimuli mai i le la faaipoipoga, sa tuu atu ai e le Atua ia Atamu ma Eva le poloaiga e “fanafanau ma uluola” (Mose 2:28). O lenei uluai poloaiga e faatatau i o la gafatia paia o le tane ma le ava ia avea ma matua.

O le malamalama i le mamanu paia a le Atua i le faaipoipoga e faavavau e taua lea i le malamalama i le natura o aiga e faavavau. Ina ua uma ona faaipoipoina i la’ua, sa tuuina atu ai le poloaiga i a Atamu ma Eva ina ia fanafanau ma faatumuina le lalolagi. O le faasologa o lenei poloaiga e aoga ma faamoemoeina.

Muamua, o le faaipoipoga i le va o se alii ma se tamaitai ua faauuina e le Atua ma e taua tele i le alualu i luma e faavavau o Lana fanau.

Lua, ua i ai i fanau le aia tatau e fananau mai ai i totonu o noataga o le faaipoipoga, ma ia tausia e se tama ma se tina o e faamamaluina tautoga faalefaaipoipoga ma le faamaoni atoatoa.

Tolu, o le tausiaina o fanau i totonu o mamanu paia a le Alii o le faaipoipoga e faavavau e faamautinoa ai ua “fananau mai i totonu o le feagaiga.” O fanau e fananau i matua o e ua faamauina i le malumalu paia e mautofi i faamanuiaga o lena feagaiga ma e otometi lava ona faamauina i o latou matua mo le faavavau. O le sauniga o le faamauga ua tuuina mai ai e le gata i le faamautinoaga o i latou o se aiga e faavavau ae o le folafolaga foi o na sootaga paia o le a tumau i talaatu o le tuugamau ma i le faavavau.

O lenei mamanu paia sa faavaeina i le amataga o loo faaauau i aso nei e ala i sauniga o le malumalu. O soo se faaipoipoga e faamauina e tusa ai ma le tulafono paia a le Atua—e ala i Lana pule o le perisitua ma i lalo o le taitaiga a ki o le perisitua i Ona malumalu paia pe a ulufale iai ma le agavaa ma faamauina e ala i le Agaga Paia o le Folafolaga—“o le a taulia atoatoa pe a iai i laua i fafo o le lalolagi” (Mataupu Faavae ma Feagaiga 132:19). O nei faaipoipoga, e faavaeina e ala i sauniga paia ma feagaiga o le malumalu, e taitai atu ai i le faaeaga ma le faaauauina o sootaga faaleaiga e faavavau (Mataupu Faavae ma Feagaiga 132:19–21).

O nei lava faamanuiaga e faavavau ua faalautele atu foi i tane ma ava ua faamauina i le maea ai o se faaipoipoga faalemalo; muamua, i le tasi ma le isi, ma le lona lua, ona faamauina lea o a latou fanau ia i latou. O faamanuiaga folafolaina uma o se faaipoipoga e faavavau e faamauina i o latou luga—ma luga oa latou fanau. E ala i le sauniga o le faamauga, ua fusia faatasi ai lo latou aiga e faavavau, faatasi ai ma faamanuiaga folafolaina uma o loo tumau pea ona aoga atoatoa pe a mavae le oti ma tua atu o le tuugamau, pe afai latou te tausia feagaiga latou te osia ma le Atua. Mo i latou o fanau a le Tama Faalelagi latou te le maua le avanoa mo faaipoipoga faaselesitila i le olaga nei, o le a latou maua le avanoa mo nei faamanuiaga e faavavau i le taimi ma le ala lava ia a le Atua.

I se faatusatusaga, o soo se faaipoipoga e le faatinoina i tulafono a le Atua ma Lana pule a le perisitua ma le faamauina i le Agaga Paia o le Folafolaga i Ona malumalu paia, e le aoga pe a mavae le oti ma o le a le tumau i talaatu o le tuugamau (Mataupu Faavae ma Feagaiga 132:15–18).

E pei ona folafola mai e le Alii, “O feagaiga, maliega, ioega, tautinoga, tautoga, folafolaga, tu, sootaga, mafutaga, po o faamoemoega uma . . . e leai se aoga, mamā, po o se malosiaga . . . pe a oti tagata,” vagana ua faamauina e le pule talafeagai o le perisitua e tusa ai ma le tulafono paia a le Atua (Mataupu Faavae ma Feagaiga 132:7).

Ua fausia e le Tama Faalelaagi ia malumalu i lo tatou lotolotoi e molimau ma faamautinoa le natura paia o aiga. Ua ia auina mai ia i tatou perofeta o e ua folafola atu ma le lototele e faapea e mafai ona faavavau aiga. Ma, ua Ia tuuina mai ia i tatou Lana mamanu mo aiga e faavavau. E ala i sauniga paia o le malumalu, o feagaiga ma le mana faamau o le Atua, e mafai ona tuufaatasia aiga e faavavau i le alofa, faamoemoe, ma le mamalu. E pei o lena malumalu ou te vaaia i taeao ma afiafi taitasi, o lenei upumoni e tu o se molimau faifai pea i o tatou olaga. Ou te molimau atu o aiga e faavavau ua le na o se manatu faamoemoeina—e mafai ona avea ma mea moni paia.