“Keememejļo̧k Būreejtōn Nelson,” Liaona, Nob. 2025.
Nuuj ko an Kabun̄ in
Keememejļo̧k Būreejtōn Nelson
Baam̧le, ro m̧ōttan, im ritōl ro rej kautiej Būreejtōn eo kein ka 17 an Kabun̄ in kōn iakwe, jerbal, im kijejeto eo an n̄an Jisōs Kraist.
Ruo raan ālkin kar kilōke kweilo̧k eo eļap, ritōl ro an Kabun̄ in im ro uwaan baam̧le raar tūbļotak Būreejtōn Russell M. Nelson āinwōt juon jemān im ļeo palel eļap iakwe ippan, juon m̧ōttan eo eaorōk, rikaļoor eo etiljek an Irooj Jisōs Kraist, im rikanaan an Anij eim̧we.
Mour eo an Būreejtōn Nelson “ear kam̧ool naan in kam̧ool eo an āinwōt juon rikanaan im rijerbal an Irooj Jisōs Kraist,” Būreejtōn Dallin H. Oaks ekar ba ilo iien ilomeje Būreejtōn Nelson ilo Oktoba 7, 2025, ilo Conference Center. Būreejtōn Oaks ear ņa etan Būreejtōn Nelson, eo ear jako ilo aenōm̧m̧an im̧weo im̧ōn ilo raan in Jeptōm̧ba 27, 2025, “m̧ōtta eo em̧m̧antata im aō rūkaki.”
Būreejtōn Oaks ear bar ņa etan Būreejtōn Nelson “juon iaan mijenede ro an Israel rekajoor.” Ear ba, “Ettōn̄dikdik eo an, mera in ainikien, im kajoor in ao eo an ekar un̄ur būruōn” laļ ko im ritōl ro an kabun̄.
Būreejtōn Oaks im bar ļalem rikōnono raar kautiej Būreejtōn Nelson kōn iakwe, jerbal in jipan̄, im kijejeto n̄an Irooj Jisōs Kraist im ajri ro nejin Anij peļaakin laļ.
Ippān rikōnono ro jet, ekar Kam̧m̧oolol Sister Wendy Watson Nelson kōn oņaak im jipan̄ eo an n̄an Būreejtōn Nelson ium̧win 19 iiō in pālele eo aer. Ekar bar kam̧m̧oolol kōrā eo ejako ippān Būreejtōn Nelson, Dantzel White Nelson, im ajri ro 10 nejier kōn tiljek eo aer n̄an “ta eo ear katakin im mour kake.”
Elder Henry B. Eyring, eo ear jerbal ippān Būreejtōn Oaks im Būreejtōn Nelson ilo Būreejtōnji eo Kein Kajuon, ekar kam̧ool kōn kūr in kanaan im maron̄ im ikdeelel eo an Būreejtōn Nelson n̄an kōjeraam̧m̧an ro jet.
“Ke iar jerbal turin ilo Būreejtōnji eo Kein Kajuon, ijjino ilo Jānwōde 2018, Iar erom juon rikam̧ool n̄an m̧ool eo ke Irooj ej im̧we rikanaan eo an,” Elder Eyring ekar ba. “Ij kam̧m̧oolol n̄an kar jeļā kajjeen Būreejtōn M. Nelson.”
Ilo kōnono ko aer, Elder Jeffrey R. Holland jān Doulul eo an Jon̄oulruo Rijilōk ro im Būreejtōn Camille N. Johnson, Būreejtōn eo an Doulul eo an Kōrā ro, raar tūbļotak Būreejtōn Nelson kōn jouj eo an n̄an armej ro ilowaan im inabōjin Kabun̄ in.
“IIen em̧m̧an eo n̄an lo an iakwe armej ro im an armej ro iakwe e ekar kōm̧m̧an kein kakeememej ko raiboojoj tata,” Elder Holland ekar ba. Ekar keememejļo̧k Būreejtōn Nelson āinwōt “rijōbjōb pā im kōmour bōro ko.”
Būreejtōn Johnson ekar kakkobaba, “Būreejtōn Nelson ear ilo m̧ool ukōt laļin juon illo̧k juon, im ekar karuwanene kōj n̄an kōm̧m̧ane ejja menin wōt ilo ad ewo̧o̧r jān kajoor eo an Anij āinwōt kōrā im em̧m̧aan in bujen ro.”
Ruo iaan ajri ro nejin Būreejtōn Nelson, Laurie N. Marsh im Russell M. Nelson Jr., raar ba jemaer ear mour ilo m̧ōņōņō kōnke ear likūt Rilo̧mo̧o̧r Jisōs Kraist ilo ioļap in mour eo ad im kaorōk jerbal in karejar n̄an ro jet.
“Kōm kar ruttoļo̧k ilo m̧weo me Rilo̧mo̧o̧r ej pād ioļap im eobrak kōn m̧ōņōņō,” Sister Marsh ekar ba. Liin ekar ba kōttōpar eo an baam̧le eo ekar n̄an juon baam̧le indeeo.
Brother Nelson ekar kakkobaba ke jemān ekar jab m̧ok ilo jerbal eo an. “Būreejtōn Nelson ekar kwaļo̧k n̄an kōm ke ejjeļo̧k ‘kakkije’ ilo Jepļaaktok eo. Ekar ba ke kar kūr e n̄an tōl Kabun̄ in, jemān ekar kallim̧ur in jerbal n̄an Jemān im Nejin m̧ae iien emej. “Im ekar kōm̧m̧ane menin.”
Marjorie N. Lowder im Gloria N. Irion, kōrā ro nejin Būreejtōn Nelson, raar jar ilo iien ilomej eo. The Tabernacle Choir at Temple Square raar letok al ko.
Ilomej eo an Būreejtōn Nelson ekar itok ālkin juon iien kakeememej kar kōm̧m̧ane n̄an kautieje ilo Oktoba 1 im kar diwōjļo̧k jān Tabernacle on Temple Square. Būreejtōn Oaks, Elder Holland im Eyring, Presiding Bisop Gérald Caussé, Elder Carl B. Cook jān Būreejtōnji eo an Jiljilimjuonn̄oul ro, im Būreejtōn eo Eutiej an Būraimere Susan H. Porter raar bar letok naan in kautiej im kwaļo̧k en̄jake ko aer make ilo jerbal ippān Būreejtōn Nelson im en̄jake ko aer kōn waanjon̄a in mour eo an, jerbal eo an Kraist, im katak ko an reim̧we.
Ilo naan in kautiej eo an, Būreejtōn Oaks ekar ba ke Būreejtōn Nelson “juon rikanaan in iakwe” eo “ekar katakin gospel in iakwe.”
N̄an meļeļe ko reļapļo̧k kōn mour im jerbal eo an Būreejtōn Nelson, lale In Memoriam: President Russell M. Nelson, 1924–2025, kar publish āinwōt juon kakkobaba ilo māākjiin ko an Kabun̄ in ilo Nobōm̧ba 2025.