Rej Er ro Aer Make Riekajet

Jibadbad ko reļļaptata ilo karōk in m̧ōņōņō eo eļap an Jemād rej n̄an letok n̄an ajri in jetōb ro Nejin iien n̄an bōk juon ānbwin, n̄an ekkatak” em̧m̧an jān nana” ilo aer mour in wabanban, n̄an eddōkļo̧k ilo jetōb, im n̄an wōnm̧anļo̧k n̄an indeeo.

Ta eo Katak im Bujen Ko rej kōnono kaki āinwōt “anemkwoj im kāālet an kanniōk” ej io̧ļapļap ilo karōk an Anij n̄an kakūrm̧ool jab wabanban im mour indeeo an ļaddik im leddik ro Nejin. Pedped in eaorōk ej bareinwōt kōmeļeļeik ilo jeje ko rekwojarjar āinwōt anemwkoj in kāālet im anemkwoj eo n̄an kāālet im n̄an kōm̧m̧ane.

Naan eo “anemkwōj in kāālet an kanniōk” ej kōmeļeļe. Naan ko repaakeļo̧k naan in “kanniōk” rōkitbuuj “em̧m̧an,” “m̧ool,” im “erreo.” Naan ko repaakeļo̧k naan in “kāālet” rōkitbuuj “kōm̧m̧ane,” “m̧akūtkūt,” im “jerbal.” Kōn menin, “anemkwōj in kāālet an kanniōk” emaron̄ meļeļein maron̄ im kōjeraam̧m̧an eo n̄an kāālet im jerbal n̄an kōj make ilo wāween ko rejim̧we, rem̧ool, reerreo, im reutiej.

Kōm̧anm̧an ko an Anij rekoba aolep “men ko n̄an kōm̧m̧an im men ko rej kipel n̄an kōm̧m̧an jim̧or.” Im anemkwoj in kāālet an kanniōk ej kōm̧anm̧an eo ekwojarjar “kōn kajoor in bun̄ten jenolo̧k” eo ej kōmaron̄ kōj āinwōt ro nejin Anij n̄an erom̧ riņa anikien ro im rej jerbale men ko n̄an kōm̧m̧an im men ko rej kipel n̄an kōm̧m̧an jim̧or.

Laļ in kar kōm̧anm̧an āinwōt ijo im ajri ro nejin Jemedwōj Ilan̄ remaron̄ kam̧ool n̄an lale ke remaron̄ “kōm̧m̧ane aolep men ko jabdewōt Irooj aer Anij enaaj jiron̄ er.” Juon unleplep eaorōk kōn Kōm̧anm̧an eo im ad mour in wabanban ej n̄an letok n̄an juon jeraam̧m̧an n̄an jerbale im erom̧ ta eo Irooj ej karuwainenetok kōj n̄an erom.

Irooj ekar katakin Inok:

“Kwōn lo rein jeiūm̧ im jatūm; er rej eļtan pā ko Peiū make, im Iaar leļo̧k n̄an er jeļāļo̧kjeņ eo aer, ilo raan eo Iaar kōm̧anm̧an er; im ilo Jikin Kallib in Iden, Iaar leļo̧k n̄an armej an anemkwōj in kāālet;

“Im n̄an ro jeiūm̧ im jatūm Iaar ba, im barāinwōt leļo̧k kien eo, bwe ren iakwe doon, im bwe er ren kāālet Eō, eo Jemāer.”

Pedped in kōttōpar ko n̄an kōjerbal anemkwoj in kāālet rej n̄an iakwe doon im n̄an kāālet Anij. Im kōttapar kein ruo rej iookļo̧k kien ko m̧oktata im kein karuo reļļap, n̄an yokwe Irooj aṃ Anij kōn aolepen būruoṃ im kōn aolepen aṃ, im kōn aṃ ḷōmṇak otemjej im n̄an yokwe ri turuṃ im āinwōt kōj make.

Ļōmņak bwe em̧ōj kakien kōj—im jab kakkōl, rōjan̄ ak kapilōk ak kakien—n̄an kōjerbal anemkwoj in kāālet eo ad n̄an iakwe doon im kāālet Anij. Imaron̄ ke lewaj juon ļōmņak ilo jeje ko rekwojarjar, kakōm̧anm̧anļo̧k naan eo “kanniōk” ejjab baj juon adjective ak bōlen ej bar juon kūr ekwojarjar kōn elmen an anemkwoj in kāālet eo ad aikuj in jerbal.

Juon al in jar eo jej jeļā kake ej taitōļ “Kāālet Jim̧we eo” n̄an juon un. Jejan̄in kar bōk kōjeraam̧m̧an kōn anemkwōj in kāālet an kanniōk eo n̄an kōm̧m̧an jabdewōt jekōņan iien ko otemjeļo̧k jenaaj. Ijoke, ekkar n̄an karōk eo an Jemād, jekkar bōk anemkwōj in kāālet an kanniōk n̄an pukot im kōm̧m̧an ekkar n̄an m̧ool indeeo. Āinwōt “armej ro rej kāālet [n̄an kōj make],” ej aikuj in bōk koņaad ilo jerbal ko rem̧m̧an, “kōm̧m̧an elōn̄ men kōn [ad] make kāālet im kakūrm̧ool eļap em̧m̧an ko.”

Men eo eaorōktata kōn anemkwōj in kāālet an kanniōk ej lukkuun kalikkar kōn mour eo m̧okta ilo bwebwenatoin jeje ko rekwojarjar. Lucifer ekar jum̧ae karōk eo an Jemād n̄an ro Nejin im kappukot n̄an ko̧kkure kajoor in jerbale im makeļo̧k. Einļo̧k wōt, jab pokake eo an ekar kalimjōk wōt ioon pedped in katak eo an anemkwōj in kāālet an kanniōk.

Anij ekar kōmļeļeik, “Kōn menin, kōnke men in … Setan eaar jum̧ae eō, im kappukot n̄an ko̧kkure anemkwōj in kāālet eo an armejIaar kōm̧m̧ane bwe ren jolaļļo̧k e.”

Pepe eo an rikapo eo n̄an kar e make eaar n̄an bōk jān ļaddik im leddik ro nejin Anij menin letok eo n̄an erom̧ “ripinej jenkwaer make” ro remaron̄ kōm̧m̧an kāālet ilo jim̧we. Kōttōpar eo an ej bwe aolep ro nejin Jemedwōj Ilan̄ ren jet ro ren maron̄ kipel n̄an kōm̧m̧an jim̧or.

Būreejtōn Dallin H. Oaks ekar kwaļo̧k bwe gospel in an Jisōs Kraist ej kūrtok kōj jim̧or n̄an jeļā juon men im n̄an erom̧ juon men kōn kōm̧m̧an wānōk an anemkwoj in kāālet an kanniōk. Ekar ba:

“Elōn̄ Baibōļ im jeje ko rekwojarjar raan kein rej kōnono kōn ekajet eo āliktata ilo an aolep armej naaj leļo̧k n̄an er jinōkjej ekkar n̄an jerbal ko ak ikideelel ko an būruweer. Ak jeje ko jet rekwojarjar rej kaļļapļo̧k an menin kōnono kōn ad nej ekajet jān jekjek eo jekar tōpare.

Rikanaan Nipai ej kōmļeļeiki Ekajet eo Āliktata ilo kōnono kōn ta eo jekar erom̧: ‘Im eļan̄n̄e jerbal ko aer raar ettoon rej aikuj naaj barāinwōt ettoon; im eļan̄n̄e rej bareinwōt ettoon emennin aikuj bwe ren jab jokwe ilo aelōn̄ in Anij’ [1 Nipai 15:33; eoon ko kar kobaiktok]. Moronai ekar ba, ‘E eo etoon enaaj ettoon wōt; im e eo e jim̧we enaaj jim̧we wōt’ [Mormon 9:14eoon ko kar kobaiktok].”

Būreejtōn Oaks ekar wōnmaanļo̧k wōt: “Jān kain katak kein jej kōjem̧ļo̧ke bwe Ekajet eo Āliktata ejjab baj juon etale in juon koba in aolep jerbal em̧m̧an im nana jim̧or—ta eo jaar kōm̧m̧ane. Ej juon tōprak in jerbal ko im ļōmņak ko rejelet mour ko ad āliktata—ta eo jaar erom

Jerbal ko ad im ikdeelel ko ad make rejjab lomoren kōj. “Ālkin aolep ijo jemaron̄ kōm̧m̧an make,” je kōlaajrak ippen Anij kōn wōt tūriam̧o im jouj eppeļo̧k kōn pinmuur eo indeeo im ejeļo̧k jem̧ļo̧kin an Rilomoor.

Alma ekar ba, “Eļan̄n̄e āindein, wo naaj itok ioomi; ak eļan̄n̄e ejjab āindein, innām kom̧in reilo̧k im jino tōmak ilo Nejin Anij, bwe Enaaj itok n̄an lo̧mo̧o̧ren armej ro An, im bwe Enaaj en̄taan im mej n̄an pinmuur kōn jero̧wiwi ko aer, im bwe Enaaj bar jerkak jān ro remej, eo enaaj kakūrm̧ool jerkakpeje, bwe aolep armej renaaj jutak Im̧aan, n̄an ekajet ilo raan eo āliktata im raan in ekajet, ekkar n̄an jerbal ko aer.”

“Kōmij tōmak bwe kōn Pinmuur eo an Kraist, aolep armej remaron̄ bōk lo̧mo̧o̧r, jān pokake kien ko im kain̄i ko an Gospel eo.” Jej aikuj lukkuun kam̧m̧oolol bwe jerawiwi ko ad im kōm̧m̧an ko renana reban jutak āinwōt juon naan in kam̧ool ņae kōj eļan̄n̄e jenaaj m̧ool in bar “ļotak,” kaminene tōmak ilo Ripinm̧uur, ukeļo̧k kōn, “m̧ool in bōro,” im ”bōro em̧ool” im “niknik n̄an jemļo̧kin.”

Elōn̄ iaad wōj remaron̄ kōtmāne bwe paotok eo ad imaan mejen Riekajet Indeeo enaaj ejja āinwōt eo an juon jikin ekajet an laļin. Juon jaj enaaj kōjeiikik. Menin kam̧ool ko renaaj kwaļo̧k. Juon jemļo̧k naaj letok. Im jenaaj maron̄ in jab jeļā im lukkuun mijak mae iien jej ekkatak kōn ta enaaj waļo̧k. Ak ij tōmak jekjek in kōmeļeļe eo an juon armej ejjab jim̧we.

Oktak jen ak ej āinwōt mijak ko kanniōk jej aolep iien iooni ej ta eo jeje ko rekwojarjar rej kōmeleleiki āinwōt “mijak anij” ak “mijak eo n̄an Anij.” Jab āinwōt mijak ko an laļ in im rej kōm̧m̧an idin̄ im mijak, mijak Anij ej men eo ej letok aenōm̧m̧an, kam̧ool, im lōke.

Mijak ilo jim̧we ij kajjieon̄ kōmeļeļeik ekitbuuj juon en̄jake em̧wilaļ an kautiej, jeļā ņae, im kūle n̄an Irooj Jisōs Kraist, pokake kien ko An, lem̧ōņōņō eo kōn iien ekajet eo, āliktata im kien tūriam̧o̧ ilo E. “Mijak anij ej jebar jen melele eo ejim̧we an lukkuun paaktokin im mijen eo an Irooj Jisōs Kraist, juon kōņaan n̄an ajeļo̧k kōtōpar ko ad n̄an kōtōpar eo An, im juon jeļā ke aolep em̧m̧an im kōrā renaaj eddoiki ikdeelel ko aer make, ļōmņak ko, naan ko, im jerbal ko an mour in kanniōk ilo Raan in Ekajet eo.

Mijak Irooj ejjab melele in m̧akoko in itok n̄an im̧aan Mejen n̄an ekajet. Bōtaab, ej jōkjōk eo kar waļo̧k n̄an kōj make “men ko āinwōt aer lukkuun waļo̧k” im “āinwōt aer naaj waļo̧k.”

Aolep armej ro rekar mour, ak renaaj mour ioon laļin, “naaj bōkļo̧k n̄an im̧aan jikin ekajet an Anij, n̄an ekajet er ekkar n̄an jerbal ko aer n̄e raar em̧m̧an ak n̄e raar nana”

Elan̄e ikdeelel ko ad renaaj kar em̧m̧an im jerbal ko ad rem̧m̧an—meļeļein jej kaminene tōmak ilo Jisōs Kraist, kōm̧m̧an im kōjparok bujen ko ippen Anij, im ukeļo̧k jen jerawiwi ko ad—innem jikin ekajet eo enaaj kam̧ōņōņō Āinwōt Inōs ekar ba, jej “naaj jutak im̧aan mejān [Ripim̧uur eo]; [naaj] lo turin mejān kōn m̧ōņōņō.” Im ilo raan eo āliktata jenaaj “leļok n̄an e jinōkjej n̄an weeppān.”

Bōtaab, elan̄e ikdeelel ko ad rekar n̄an men ko renana im jerbal ko ad rekar nana, innām jikin ekajet eo enaaj menin kaamjak. Jenaaj bōk “juon jeļā eo eweppān,” juon “ememej emeram,” im juon “kile ewāmourur kōn bōd ko [ad] make,” “Jej jamin maron̄ reilōn̄ļo̧k n̄an mejān ad Anij; im jenaaj m̧ōņōņōļo̧k elan̄n̄e je maron̄ kar jiron̄ dekā ko im to̧ļ ko n̄an noj kōj jān im̧aan mejān.” Im ilo raan eo āliktata jenaaj “bōk [ad] jinōkjej in nana.”

Ilo mool, aaet, jej make ad riekajet. Ejjeļo̧k juon enaaj aikuj in ba ia eo jen etal n̄an e. Ilo im̧aan mejān Irooj, jenaaj kile ta eo jekar kāālet n̄an erom̧ ilo mour in kanniōk im jeļā kōn kōj make ijo jenaaj aikuj in pād ie indeeo.

Meļeļe bwe Ekajet eo Āliktata emaron̄ in kam̧ōņōņō ejjab juon kōjeraam̧m̧an kar kakkoņe wōt n̄an Moronai.

Alma eaar kōm̧eļeļeik kōjeraam̧m̧an ko kar kallim̧ur kaki reppeļo̧k n̄an rikaļoor ro rem̧ool an Rilo̧mo̧o̧r. Ekar ba:

“A meļeļe eo an naan in kōjepļaak ej n̄an bar bōktok nana n̄an nana, ak men ko an kanniōk n̄an men ko an kanniōk, ak men ko an devil n̄an men ko an devil—em̧m̧an n̄an men eo em̧m̧an; wānōk n̄an men eo ewānōk; jim̧we n̄an men eo ejim̧we; tūriam̧o n̄an men eo ej tūriam̧o.

“… En jab kalijekļo̧k am̧ jerbal, ekajet ilo jim̧we, im jab bōjrak jān kōm̧m̧an em̧m̧an; im eļan̄n̄e kwōj kōm̧m̧an aolep men kein innām kwōnaaj bōk jinōkjej eo am̧; aaet, naaj bar kōjepļaakwaj tūriam̧o n̄an eok; im naaj bar kōjepļaakwaj n̄an eok jab kalijekļo̧k; im naaj bar kōjepļaakwaj n̄an eok ekajet ejim̧we; im naaj bar kōjepļaakwaj n̄an eok jinōkjej em̧m̧an.”

Ij lan̄lōn̄ ilo kam̧ool bwe Jisōs Kraist ej ad Riļom̧o̧o̧r em̧our. Kallim̧ur eo an Alma em̧ool im ej n̄an kwe im n̄a—rainin, ilju, im n̄an aolepen indeeo. Ij kam̧ool menin ilo āt eo ekwojarjar etan Irooj Jisōs Kraist, amen.