Kajoor eo an Jerbal in Karejar n̄an Kajjojo Armej

Ro jeiū im jatū, kom̧ em̧ool kōn tiljek im wujlepļo̧k eo ami ilo itok n̄an Jisōs Kraist ilo iien kein rapan̄. Kom̧ lukkuun em̧m̧an; kom aiboojoj; kom kajjojo ej juon ajri nejin Anij. En̄in jar eo aō in bwe jenaaj kile im̧we eo an Jetōb Kwojarjar ilo ad erom̧ im jipan̄ doon erōm̧ rikaļoor ro an Jisōs Kraist rej wujlepļo̧k ilo m̧ool im en̄jake lan̄lōn̄ eo An ilo ad kabun̄jar ilo m̧weeo im̧ōn Irooj.

Būreejtōn Russell M. Nelson ear kapilōk: “Kiiō ej iien bwe kwe im n̄a n̄an pojak n̄an Itok eo Kein Karuo an ad Irooj im Rilo̧mo̧o̧r, Jisōs Kraist. Kiiō ej iien bwe jen kōm̧m̧an bwe ad rikaļooraņ en jibadbad eo ad eaorōktata. Ilo an laļin eobrak kōn abwilōn̄lōn̄ ko, elmen ad maron̄ kōm̧m̧ane menin?

Ekar letok uwaak eo: “Emakijkij in Kabun̄jar ilo tampeļ enaaj jipan̄ kōj. Ilo m̧weeo im̧ōn Irooj, jej mije wōt Jisōs Kraist. … Jej jino jeļā E. … Aolep rikapukot ro rem̧ool an Jisōs Kraist renaaj lo E ilo tampeļ eo.”

Innām elmen ad erom̧ im jipan̄ doon erom̧ ro rikaļooran Jisōs Kraist rewujlepļo̧k? Jej jerbal in karejar n̄an kajjojo armej. Jerbal in karejar ilo wāween eo an Rilo̧mo̧o̧r ekitbuuj tūriam̧o, jouj, kijenmej, im iakwe ilo ejjeļo̧k ekajet. Ilo ad jerbal in karejar n̄an kajjojo armej, jej karuewaenene kajjojo armej n̄an itok n̄an Kraist im kabun̄jar ilo m̧weeo im̧ōn Irooj n̄an bōk kajoor in pinm̧uur eo An. Ilo bar jet naan, jej jipan̄ doon erom̧ rikaļoor ro rej wujlepļo̧k ilo ad jerbal in karejar n̄an kajjojo armej ilo wāween ko rej tōl ļo̧k n̄an im̧ōn Irooj.

Jej ekkatak jen Jisōs Kraist kajoor eo an Jerbal in Karejar n̄an Kajjojo armej kōn iakwe im jab ekajet. Komij ke kemeemej kōrā in Sameria eo ilo aebōj eo. Kōrā in emaron̄ kar en̄jake an ejjeļo̧k tokjān, ajimakeke, pere, im jab loi. Kōrā in emaron̄ kar en̄jake bwe ekar jab ekkar an pād ijo. Ilo aolepen mour eo an ekar wōr ļalem pāleen em̧m̧aan, im em̧m̧aan eo ekar jokwe ippen ekar jab pāleen. Ro jet raar ekajet ilo jab wānōk ilo ejjeļo̧k jeļā kōn jekjek ko ilo mour eo an. Menin emaron̄ in juon ian wūn ko ekar makeļo̧k iaan im itok n̄an aebōj eo ilo tōrein eo eļap bwil ilo raan eo. Im Aaet, ekar juon iaan kōrā ro jinointata Jisōs Kraist ekar kwaļo̧k ke E Messaia. N̄an E, kōrā in eaar juon leddik nejin Anij.

Jisōs Kraist ekar katakin kōrā eo bwe kōn E ejjeļo̧k juon emaron̄ bōk mour indeeo jān bōk mōttan dān in mour. Ekar kwaļo̧k, “A jabdewōt eo ej idaak dān eo I naaj leļo̧k n̄an e … e jāmin bar maro indeeo; a dān eo I naaj leļo̧k n̄an e … enaaj aebōj ilo e im naaj to̧o̧rļo̧k n̄an mour indeeo.”

Kōrā in Sameria eo ekar en̄jake iakwe eo an Rilo̧mo̧o̧r im kar bōk juon kam̧ool kōn Jetōb bwe E ej Messaia eo. Ālkin kam̧ool in, ekar bar jepļaakļo̧k n̄an jikin eo im kar kūr ro jet bwe ren itok im lo, im elōn̄ rekar tōmak Jisōs ekar “e em̧ool Kraist, Rilo̧mo̧o̧ren laļ.” Kraist ekar jerbal in karejar n̄an kajjojo armej kōn iakwe; ro jet raar jino erom̧ rikaļoor ro An rewujlepļo̧k.

Jej jeļā kōn kajoor eo an jerbal in karejar n̄an kajjojo armej kōn tūriam̧o jen Rijilōk ro an Kraist Piter im Jon. Kom̧ kemeemej juon em̧m̧aan, e kūrro jān ke ekar ļotak, rej likūt e raan otemjej ņae iturin kōjām in tampeļ eo im ej kajjitōk jāān. Em̧m̧aan in emaron̄ kar en̄jake an ejjeļo̧k tokjān, ajimakeke, pere, im jab loi. Em̧m̧aan in emaron̄ kar en̄jake bwe ekar jab ekkar an pād ijo.

“A Piter ej ba, Ejjeļo̧k silver ak gold ippa; ak men eo ewōr ippa [ij] lewōj n̄an [eok]: Ilo etan Jisōs Kraist ri Nazeret, kwon jutak im etal.”

Piter ej jibwe anmooņon pein im kar kajutak e, im em̧m̧aan eo ej mour. Ālkin wōt kabwilōn̄lōn̄ in, em̧m̧aan eo ej deļon̄ ilo tampeļ eo ippāerro Piter im Jon, “etetal, im kāke, im wūjtake Anij.” Piter im Jon rekar jerbal in karejar n̄an kajjojo armej ilo wāween ko me rekar tōl n̄an m̧ōn Irooj, im em̧m̧aan in ekar erom̧ rikaļoor eo wujlepļo̧k an Kraist.

Ro jera, emaron̄ kar wōr iien ko ilo mour eo aō n̄e ij bar en̄jake an ejjeļo̧k tokja, ajimakeke, pere, im jab loi. Em̧ōj aō en̄jake āinwōt ke ikar jab ekkar n̄an pād ijo. Iaar peptaij im kar kapen juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata jān ke ekar jon̄oulratimjuon aō iiō. Juon iiō tokālik, ikar bōk juon aō kūr n̄an jerbal āinwōt juon mijenede ej jerbal aolep raan, ijoke ekar jabwe aō jeļā kōn bwebwenatoon Kabun̄ in.

Tōrein jerbal in mijenede eo aō, ikar jeļā bwe eaar wōr juon iien me ro ineen ri Africa ro re Kilmeej rekar jab maron̄ in bōk aolep kōjeraam̧m̧an ko an kabun̄jar ilo m̧ōn Irooj. Ekkatak menin kein kajuon ekar bōktok en̄jake in illu, tarpok, pere, im mijak. En̄jake kein raar kanooj kametak bwe aō maron̄ in kile Jetōb Kwojarjar ekar jako iumin jidik iien.

Jejeraam̧m̧an, ekar wōr juon aō mijenede kampānien, Kevin Vick, eo ekar jerbal in karejar n̄an eō kōn iakwe, kijenmej, im meandwōd. Kajjojo bon̄ ilo an kam̧oole en̄jake in pere im tarpok ko aō, enaaj kar ba n̄an Elder Johnson eo edik “Ij iakwe eok.” Ālikin ruo wiik ko, ij kōtļo̧k n̄a make n̄an en̄jake iakwe eo an Kevin. Ikar bōk peran n̄an jar n̄an Jemed Ilan̄ ilo etan Jisōs Kraist. Ke ikar jar, iaar reel kōn jekjōn 6 in Katak im Bujen Ko, eoon 21–23, me ej ba:

“Lo, N̄a Jisōs Kraist eo Nejin Anij. … N̄a meram eo ej romaak ilo marok. …

“… Keememej ilo ļōmņak bon̄ōn eo kwaar kūr n̄an Eō ilo būruōm̧, bwe kwōn maron̄ jeļā ikijjien m̧ool in men kein.

“Iaar jab kwaļo̧k aenōm̧m̧an n̄an am ļōmņak kōn menin ke? Ta kam̧ool eļapļo̧k kwo maron̄ bōke ijeļo̧kin jān Anij?”

Ke ikar riit, ikar keememej ij kemeemej raan eo ikar jitlo̧k im kar jar n̄an jeļā bwe Bok in Mormon eo ej naan eo an Anij im bwe Josep Smith ej Rikanaan eo an Jepļaaktok eo. Ij kemeemej bujen ko kar kōm̧m̧ani ilo m̧ōn Irooj me rej kobaik eō n̄an ippen Jisōs Kraist ilo juon wāween an juon make im menin letok aorōk. Ikar en̄jake iakwe eo an Rilo̧mo̧o̧r, An tūriam̧o, im kam̧ool bwe Kabun̄ eo an Jisōs Kraist im Armej ro Rekwojarjar ilo Raan ko Āliktata ej aelōn̄ in kiin̄ eo An ion laļin im emenin aikuj n̄an kepooj kōj n̄an Itok eo An kein Karuo. Kōnke ij kemeemej, ikar maron̄ in kile Jetōb Kwojarjar eo im n̄an lukkuun meļeļe bwe Jisōs ej ri Kraist eo im N̄a ij An rikaļoor.

Ilo iien ko jenaaj ban uwaaki kajjitōk ko im en̄jake ko kōn en̄jake an ejjeļo̧k tokjān, ajimakeke, pere, im jab loi. Ijoke, ro jera, jej aikuj bun̄ m̧aanļo̧k kōn tōmak ilo Jisōs Kraist im kemeemej naan ko An:

“En jab pok būruemi.”

“Ilo laḷ koṃij en̄taan, a koṃwin ṃōṇōṇō; N̄a Iar bōk anjọ ioon laḷ.”

N̄aij juon rikam̧ool n̄an m̧ool eo an menin im kōn kōjeraam̧m̧an eo an Rilo̧mo̧o̧r kar kallim̧ur kake.

Innem ta eo jemaron̄ kōm̧m̧ane n̄an lale bwe jerbal in karejar eo ad n̄an kajjojo armej ilo wāween eo an Rilo̧mo̧o̧r en wājepdik? Mour kōn katak ko an Kraist enaaj jipan̄ kōj. “Mour kōn katak eo an Kraist,” āinwōt an Būreejtōn Nelson kar kōmeļeļeik: “emaron̄ kwaļo̧k eļap kajoor kōm̧m̧an ko rerreeo, kwaļo̧k kajoor in jetōb ilo mour ko ad.

“Ilo ad kajjieon̄ in mour kōn kien ko reutiejļo̧k an Jisōs Kraist, … Rilo̧mo̧o̧r ej ļōn̄aj kōj ilōn̄in māllijon̄ im kein kōm̧ad ko an laļin jen an kōjeraam̧m̧ane kōj kōn eļapļo̧k iakwe em̧ool, ettā bōro, em̧m̧an, meanwōd, jouj, rikaļooran, aenōm̧m̧an, im kakkije

“[Bun̄tōn in] kar waļo̧k jān mour kōn katak eo an Kraist,” Elder Dale G. Renlund ej kōmeļeļeik, “ejjab kōkajoor wōt oktak eo an paotok eo ekwojarjar ad n̄an mejān kajjik indeeo ak ej barāinwōt kōketak kōj n̄an [jerbal in karejar n̄an] ro jet ilo wāween ko rekkar.” Elder Renlund ej bar kakemeemej kōj bwe “jerbal eo an Rilo̧mo̧o̧r ej n̄an kemour [n̄an kemour kōj bar juon alen]. Jerbal eo ad ej n̄an iakwe—n̄an iakwe im jerbal in karejar ilo juon wāween eo me ro jet rej epaakeļo̧k Jisōs Kraist.”

Maron̄ eo ad n̄an mour kōn katak eo an Kraist enaaj ļapļo̧k kajjojo raan in ekkatak kōn Bok in Mormon eo im kajjojo wiik bōk m̧ōttan kwojkwoj eo. Būreejtōn Nelson ekar kwaļo̧k bwe Bok in Mormon eo “ej katakin katak eo an Kraist … [im] ej letok likio im meļeļe eo [ealikkar tata] kōn Pinmuur eo an Jisōs Kraist eo ej waļo̧k ilo aolepān.” Ij iakwe bok in. Im jar kake ilo bōk m̧ōttan kwojkwoj eo kajjojo wiik enaaj kaļapļo̧k ad meļeļe kōn Pinm̧uur eo an Jisōs Kraist im letok kōkāāl ilo jetōb, kaeņōm̧m̧an, im kajoor in āinwōt anij n̄an mour ko ad. Kemeemej, “ilo kain̄i ko ie an [priesthood eo], kajoor in āinwōt anij ej waļo̧k,” im kajoor in, eo ej itok jān Jisōs Kraist, ej kōkajoorļo̧k kōņaan eo ad im ad maron̄ in jerbal in karejar n̄an kajjojo armej.

Ekkatak eo aō kōn Bok in Mormon im bōk m̧ōttan kwojkwoj eo ej kadikļo̧k en̄jake in ebweer, kōlapļo̧k aō ikideelel in jerbal in karejar n̄an kajjojo armej ilo wāween eo an Rilo̧mo̧o̧r, im jipan̄ kōm̧m̧an bwe mour in rikalo̧o̧r eo en men eo aorōk tata ippa.

Ro jera, ij kallim̧ūr bwe ilo ad mour kōn katak eo an Kraist im jerbal in karejar n̄an kajjojo armej ilo wāween ko renej tōl n̄an m̧ōn Irooj, jenaaj bun̄ m̧aanļo̧k kōn tōmak ilo Jisōs Kraist aet ilubwiljin kajjitōk ko ban uwaaki im en̄jake ko kōn an ejjeļo̧k tokjān, ajimakeke, pere, im jab loi. Jenaaj karuwainenetok kajjojo armej n̄an itok n̄an Jisōs Kraist im n̄an kabun̄jar ilo m̧ōn Irooj n̄an bōk kajoor in pim̧uur im iakwe eo An. Ilo m̧ōn Irooj, jenaaj “en̄jake tūriam̧o an [Rilo̧mo̧o̧r]. [Jenaaj] lo uwaak ko n̄an kajjitōk ko am̧. [Im jenaaj] jino meļeļe kōn m̧ōņōņō in gospel in An.” Ilo etan Jisōs Kraist, amen.